भांगरभूंय | प्रतिनिधी
पणजी : नेण्टे चलयेचेर लैंगीक अत्त्याचार करून तिका आवय केल्ल्या प्रकरणांत दिवचल पुलिसांनी दुबावीत मीर शाह (२०, मूळ उत्तर प्रदेश) ह्या तरणाट्याक अटक केली. दुबावीत हे घडणुके उपरांत राज्या भायर केल्लो. तांत्रीक तपासाच्या आदारार पुलिसांनी ताका सोदून उत्तर प्रदेशांतल्यान ताब्यांत घेतलो.
पुलिसांनी दिल्ले म्हायती प्रमाण, दिवचलच्या एका १५ वर्सां पिरायेच्या चलयेच्या कुटुंबीयांनी केल्-े कागाळी उपरांत तपास सुरू केलो. तपासा मजगतीं दुबावीत आनी पिडेस्त चली एकाच वाठारांत रावता अशें समजलें.
या प्रकरणांत भारतीय न्याय संहिता (बीएनएस), गोवा बाल कायदा तशेंच पॉक्सो कायद्या खाला गुन्यांव नोंद केला. पिडेस्ताचो जबाब नोंद करप, पिरायेचें वॅरिफीकेशन आनी वैजकी तपासणी हाचे सयत गरजेची प्रक्रिया पुराय केल्ल्याचें पुलिसांनी सांगलें.
दुबावीत राज्या भायर गेल्ल्यान ताचो सोद घेवपा खातीर विशेश यत्न केले. उत्तर प्रदेशांतल्या सिद्धार्थनगर जिल्ह्यांत तो सांपडलो. थळाव्या पुलिसांचे मजतीन ताका ताब्यांत घेवन न्यायालया वतीन ट्रान्झीट वॉरंट मेळयले. उपरांत आरोपीक गोंयांत हाडलो. ह्या प्रकरणाचो फुडलो तपास दिवचल पुलीस करतात.
मजगतीं, बलात्कारा उपरांत १५ वर्सां पिरायेची नेण्टी चली गुरुवार आशिल्ली. तिणें एका चल्याक जल्म दिले उपरांत हें प्रकरण उक्तें जालें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
