भांगरभूंय | प्रतिनिधी
विश्वजीत राणेः दर्जो वाडोवपा सयत प्रतिसाद वेळ जातलो उणो
पणजी: सगल्या भलायकी केंद्रांनी आसपी 108 एम्बुलन्स सेवा हाताळपा सयत तिचेर नियंत्रण दवरपा खातीर कमांड सेंटर सुरू जातलें. 108 एम्बुलन्स सेवेचो दर्जो वाडोवपा सयत रिस्पॉन्स वेळ उणो करपाक कमांड सेंटराची मजत जातली. भलायकी मंत्री विश्वजीत राणे हांणी ही म्हायती दिली.
भलायकी सेवा ही एक गरजेची आसा. दरेका गोंयकाराक भलायकेच्यो बऱ्यो सेवा मेळच्यो म्हूण सरकाराचे येत्न आसात. 108 एम्बुलन्स सेवेचो नियाळ घेवपा खातीर भलायकी मंत्री विश्वजीत राणे हांणी उंचेल्या पांवड्याचेर बसका घेतली. भलायकी खात्याच्या अधिकाऱ्यांचे बसकेंत ते हाजीर आशिल्ले. 108 एम्बुलन्स सेवा ही एक गरजेची सेवा जावन आसा.
अपघात जालो वा कॉल आयलो काय थळाचेर बेगिनांत बेगीन एम्बुलन्स कशे तरेन पावूंक शकता, हाचेर विचार जालो. हाचे खातीर एम्बुलन्साचो आंकडो वाडोवपाची गरज आसा. तशेच सगल्या एम्बुलन्सा मदीं समन्वय सादपा खातीर कमांड सेंटर आसप फलदायी थारतलें. बेगिनूच कमांड सेंटर सुरू जातलें. कॉल आयलो काय खंयची एम्बुलन्स घडणूक थळाचेर बेगीन पावूंक शकता, ती एम्बुलन्स धाडप शक्य जातलें.
एखाद्या एम्बुलन्सी मदीं इबाड जालो जाल्यार दुसऱ्या एम्बुलन्सीची वेवस्था करप तशेंच चालक आनी नर्सी उपलब्ध करपा खातीर एक सुधारीत यंत्रणा तयार जातली. बसकेंत ह्या सगल्या विशयांचेर चर्चा जाली. भलायकी मंत्री विश्वजित राणे हांणी ही म्हायती दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
