भांगरभूंय | प्रतिनिधी
पणजीः येता ती 2027 विधानसभा वेंचणूक आरजीपी पक्षाचे तिकेटीचेर लडयतलों. आरजी पक्षांत रावन पक्षाचें काम फुडें व्हरप हेंच आमचें लक्ष आसा. काँग्रेसींत प्रवेश करपा विशीं चलिल्ल्यो चर्चा सगल्यो वावड्यो, अशें स्पश्टीकरण आरजीपीचे आमदार विरेश बोरकार हांणी दिलें.
विरेश बोरकार हांणी कांय दीस पयलीं 18 जूनाक क्रांती दिसा निमतान क्रांती सुरू करुया असो सांकेतीक पोस्ट घाल्लो. आरजीपींत चलिल्लें अंतर्गत कोंफुसांवाचे फाटभुंयेर बोरकार हे बंड करतात काय कितें असो अर्थ कांय जाणांनी घेतिल्लो.
हे विशीं स्पश्टीकरण दितना बोरकार हांणी सांगलें, विरेश बोरकार हो आरजीपीच्या तिकेटीचेरच वेंचणूक लडयतलों. आरजीपीक मुखार व्हरप हें आमचें काम आसा आनी हें क्रांतीकारी काम आमी करत आसात. तशेंच येता त्या 18 जूनाक एकठांय रावन हें कार्य फुडें व्हरचें.
हांव काँग्रेसींत वता म्हूण खूब जाण वावड्यो पातळायतात. पूण हातूंत कांयच तथ्य ना. आमी क्रांतीच्या मार्गांतल्यान आयल्यात आनी फुडे क्रांतीच करपाक लागून उबे रावतले. गोंय आनी गोंयकार उरपाक जाय हो आमचो उद्देश आसा. गोंयकार जर उरतले जाल्यार सगल्या मेरेन वचून गोंयांत कितें चल्लां तें तांचे कडल्यान जाणून घेवचें पडटलें. जो गोंयचो नाश चल्ला तो थांबोवपा खातीर गोंयकारां मेरेन वच्चेंच पडटलें, अशें बोरकार हांणी सांगलें.क्रांती दीस ह्या इतिहासीक दिसाक 80 वर्सां पुराय जातात. ते निमतान 18 जूनाक आमी एक रॅली आयोजीत केल्या जाची सुरवात पणजे कदंब बस स्टॅण्डा वेल्यान जावन ती आझाद मैदाना मेरेन सोंपतली. जें बलिदान आनी योगदान आमच्या स्वातंत्र सैनिकांनी आनी गोंयकारांनी दिलां तांचे यादीक ही रॅली घडोवन हाडल्या. सांजे 4.30 वरांचेर रॅलीची सुरवात जावन आझाद मैदानार आमी शांतिकायेन निदर्शनां करतले अशी म्हायती बोरकार हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
