भांगरभूंय | प्रतिनिधी
म्हापशें: म्हापशेंच्या स्थानबद्धता (डिटेंशन) केंद्रांतल्यान आलेक्झांडर आर्खिपोव नांवाचो कझाकिस्तान नागरीक कैदी पळून गेलो. कोसळिल्ले राखणे वण्टीचो फायदो घेवन दुबावीत कैदी केंद्रांतल्यान पळून वचपाक येसस्वी थारलो.
ही घडणूक सोमारा सकाळीं 8.45 वरांच्या सुमाराक घडली. केंद्रांतल्या कैद्यांक सकाळीं सदचे प्रमाण भायर काडले. हात धुंवपाक वचपाचे भासोवन आलेक्झांडर हो कैदी केंद्राचे फाटले वटेन आशिल्ल्या वॉश बेसिना कडेन गेलो. थंय कोसळिल्ले राखणे वण्टी वेल्यान उडी मारून तो पळून गेलो.
हो प्रकार नदरेक येतकच केंद्राच्या कर्मचाऱ्यांनी ताचे फाटल्यान धांव घेतली. पूण तो सांपडलो ना. उपरांत केंद्रांत सेवा दिवपी पुलीस आनी हेर कर्मचाऱ्यांनी सोद मोहीम राबोवन म्हापशें शारांत सगली कडेन ताचो सोद घेतलो. पूण दनपारां उसरां मेरेन आलेक्झांडर हो कैदी सांपडूंक नाशिल्लो. फुडलो तपास सुरू आसा.
मजगतीं, मांद्रें पुलिसांनी फाटल्या मे म्हयन्यांत आलेक्झांडर हाका वैध पारपत्र वा व्हिसा बगर गोंयांत बेकायदो राबितो केल्ल्याच्या आरोपा खाला अटक केल्ली. उपरांत पेडणें न्यायालयाच्या आदेशा प्रमाण दुबावीत कैद्याक म्हापशें डिटेंशन सेंटरांत धाडून दिल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
