भांगरभूंय | प्रतिनिधी
उदक सांबाळून वापरपाचो मंत्र्यांचो उलो
भांगरभूंय । प्रतिनिधी
पणजी : गोंयांत मॉन्सून दुबळो जाल्ल्यान पावसाचें प्रमाण उणें जालां. ताका लागून धरणांतलें उदक गतीन उणें जायत आसा. सोमारा उदका स्रोत मंत्री सुभाष शिरोडकार तशेंच पेयजल मंत्री सुभाष फळदेसाय हांणी हे विशीं खात्यां वतीन करतात त्या उपाय येवजण्यांची म्हायती दिली. मंत्री शिरोडकार हांणी सांगलें, अंजुणे धरणांतलें उदक उणें जालें जाल्यार पिसुर्लें खण पिटांतलें उदक उसपतले, जाल्यार मंत्री फळदेसाय हांणी सांगलें, प्रक्रिया केल्लें उदक हेर कारणां खातीर वापरचें न्हय हे खातीर आदेश काडटले.
मंत्री सुभाष शिरोडकार हांणी हे विशीं सोमारा खात्याच्या अधिकाऱ्यां वांगडा बसका घेतली. तांणी सांगलें, सध्या साळावली, पंचवाडी धरणांत फुडलो म्हयनो ते देड म्हयन्या मेरेन पावतलें इतलें उदक आसा. अंजुणे धरणांतलें उदक उणें जालां. हे खातीर ह्या धरणांतल्यान शेती खातीर करताले ती उदक पुरवण बंद केल्या. ह्या धरणांतल्या उदकाचो वापर फक्त पियेवपा खातीर करतात. अशें केल्ल्यान फुडले 20 दीस ह्या धरणांतलें उदक पावपाक शकता.
खात्या वतीन फाटलो म्हयनोभर धरणांतल्या उदकाच्या नियोजना संबंदांत बसका घेतात. सोमारचे बसकेंत विवीध विशयांचेर चर्चा केली. अंजुणे धरणांतलें उदक उणें पडल्यार पिसुर्ले खण पिटांतलें उदक उसपून पडोशेच्या उदका प्रकल्पांत हाडटले. हाचें काम बिरेस्तारा सावन सुरू जातलें. ते खातीर गरजेची पायपलायन आनी पंप बसोवपाचें कामूय बेगीन सुरू करतले. फुडले 15 दीस पावस पडलो ना जाल्यार तिळारी कानालांतलें उदक पडोश्यां हाडपाचो विचार चल्ला, अशें मंत्री शिरोडकार हांणी सांगलें.
फुडल्या वर्सां सावन गोंयांतल्या धरणांनी उण्यांत उणे दोन म्हयने अतिरिक्त उदक बाकी उरचें हे खातीर उपाय येवजण्यो करतले. फुडारांत गोंयांत उदकाचो उणाव जावचो न्हय, हे खातीर खात्या वतीन नवे प्रकल्प उबारतात. ते प्रमाण काजूमळ आनी चरावणें वाठारांत धरणां बांदतले. ते खातीर माती परिक्षण करपाचें काम चालू आसा. ते उपरांत ताचे खातीर डीपीआर काडून फुडले परवाने घेतले. काजूमळांतल्या धरणांतल्यान ओपा उदक प्रकल्पांत जाल्यार चरावणे सावन दिवचल वाठारांत उदका पुरवण करपाक मेळटली.
गरज थंयच प्रक्रिया केल्लें उदक : फळदेसाय
सध्या गोंयांतल्या धरणांनी फुडलो म्हयनोभर पावतलें इतलें उदक आसा. अशें आसलें तरीय आमी आतां सावनूच जतनाय घेतात. प्रक्रिया केल्लें शुद्ध उदक शेती आनी हेर कारणां खातीर वापरचें न्हय हे खातीर बेगिनूच आदेश जारी करतले. आदेश पाळटात, हाचीय खात्री करतले, अशें मंत्री सुभाष फळदेसाय हांणी सांगलें.
15 जून मेरेनचो उदकाचो सांठो (टक्क्यांनी)
साळावली 27.6
अंजुणे 9.9
चापोली 40.5
गावणें 44.1
पंचवाडी 19.4
आमठाणे 51.9
तिळारी 30.1
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
