भांगरभूंय | प्रतिनिधी
1 जुलय सावन येरादारीचेर ‘एआय’ची नदर
भांगरभूंय । प्रतिनिधी
पणजी : गोंयांत अपघात तशेंच रस्तो अपघातांत मरण येवपाचो आंकडो आसा. हे फाटभुंयेर आतां 1 जुलय सावन एआय कॅमेऱ्याच्या आदारान येरादारी नेम मोडप्यांक तालांव दितले. तशेंच सप्तकाच्या शेनवार वा आयतारा अल्कोमिटराच्या माध्यमांतल्यान चालकांची सोऱ्या खातीर तपासणी जातली. अपघातांची माळ परतून सुरू जाल्ल्यान येरादारी खातें तशेंच पुलिसांनी येरादारीचेर नदर दवरून वेवस्थापनाचेर भर दिवपा खातीर पावलां उखल्यांत.
आयतारा उपरांत सोमारा लेगीत अपघात जावन धारगळे दांपत्याक मरण आयलें. जून म्हयन्यात 15 दिसांत तरेकवार अपघातांत 14 जाणाक मरण आयलां. वाडट्या अपघातांक लागून गोंयचे रस्ते दिसान दीस असुरक्षीत जावपाक लागल्यात. पर्वरी सयत मुखेल रस्त्यांचेर गाडी चलोवप धोकादायक जालां.
मुखेल रस्त्यांचेर तशेंच जंक्शनाचेर एआय कॅमेरे बसोवपाची येवजण आसा. सध्या मेरशी, मडगांव, नुवें, पेडे, वेर्णा सयत 26 सुवातांचेर एआय कॅमेरे बसयल्यात. पयलीं 15 दीस हे विशीं जागृताय जातली. 1 जुलय सावन एआय कॅमेऱ्या वरवीं येरादारी नेम मोडप्यांक तालांव दितले. सप्टेंबर मेरेन हेर कडेन एआय कॅमेरे बसयतले. पांवड्या पांवड्यान एआय कॅमेऱ्यांचो विस्तार जातलो, अशी म्हायती येरादारी संचालक अरविंद खुटकार हांणी दिली.
हेल्मेट, सीट बेल्ट घालपा सयत येरादारी नेमा पाळपाची गरज आसा. येरदारी नेम मोडप आनी बेजापसालदारपणां हीं अपघाताचीं मुखेल कारणां आसात. साहाय्यक येरादारी संचालक (एडीटी) तशेंच मोटार वाहन निरिक्षक (एमव्हीआय) हांकां अचकीत भेटी दिवन येरादारीचेर नदर दवरपाचे आदेश दिल्यात. येरादारी नेम मोडतल्यांक तालांव जावन नेमाची खर तपासणी करतले, अशें येरादारी संचालक अरविंद खुटकार हांणी सांगलें.
आयतारा जे चार अपघात जाल्यात, तातूंतले दोन अपघात हे आपअपघात आसात. येरादारी पुलिसां कडल्यान लेगीत आतां येरादारीचेर नदर दवरपा खातीर खासा मोहीम सुरू जातली. शेनवार वा आयतारा अल्कोमिटरान चालकाची सोऱ्या खातीर तपासणी जातली. सोऱ्याचे चांचणे खातीर 200 अल्कोमिटर आसात. हे फुडें नेमान तपासणी जातली. तशेंच येरादारी नेमांची लेगीत खर कार्यवाही जातली, अशें येरादारी पुलीस अधिक्षक प्रबोध शिरवयकार हांणी सांगलें. काय दिसां पयलीं थारावीक सुवातांचेर वाहनांची तपासणी जाताली. पुलीस वाहनां आडावन सतावणूक करतात, अशें आरोप जावपाक लागले. हाका लागून वाहनांच्या तपासणीचें प्रमाण शिथील जालें, अशें येरादारी पुलीस अधिक्षक प्रबोध शिरवयकार हांणी सांगलें. हेल्मेट, सीट बेल्ट हाचे सयत हेर नेमांची लेगीत कार्यवाही जातली, अशेंय तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
