भांगरभूंय | प्रतिनिधी
पणजी: सद्याच्या अनिश्चीत अर्थीक वातावरणांत दरेक नागरीक सुरक्षीत आनी खात्रीन परतावो दिवपी गुंतवणूक पर्याय सोदतात. बाजारांतले चडटे-देंवतेक लागून निर्माण जावपी धोको टाळपा खातीर लोक चडांत चड पारंपारीक गुंतवणूक पर्याया कडेन वळपाक लागल्यात. हे फाटभूंयेर, बँकांची मुजत ठेव येवजणेक एक उत्कृश्ठ आनी सुरक्षीत पर्याय म्हणून भारतीय टपाल विभागाची पोस्ट ऑफिस रेकरिंग डिपॉझिट येवजण मुखार आयल्या. मध्यम वर्ग आनी कामगार वर्गाक ल्हान बचती वरवीं दिर्घकाळ अर्थीक ध्येय साध्य करपाक ही येवजण खूब सोयीचें मानतात.
हे सरकारी ल्हान बचत येवजणेची मुजतवाड मुखेलपणान पांच वर्सांची आसता. सध्या हे येवजणेचेर वर्साक ६.७० टक्के चक्रवाढ व्याजदर दितात, जी जायत्या वेपारी बँकांच्या स्थिर ठेवी परस चड आकर्शक आसा. अर्थीक गणिताच्या मतान गुंतवणूकदारान हे येवजणेंत म्हयन्याक फकत १५०० रुपया गुंतवणूक केल्यार पांच वर्सांत ताची वट्ट मुळावी गुंतवणूक ९० हजार रुपया जाता. पाच वर्सांच्या काळा उपरांत चक्रवाढ व्याजा सयत मॅच्युरिटीवर सुमार १ लाख ७ हजार रुपयांचो निधी जमा जाता. तशेंच मासीक १००० रुपयांच्या गुंतवणुकीचेर वट्ट ६० हजार रुपयांच्या मुदतीचेर वट्ट ७१ हजार रुपयांचो परतावो मेळपाक शकता.
टपाल खात्याचें हे येवजणेंत खातें उगडपाची प्रक्रिया सामकी सोपी आनी पारदर्शक आसा. नागरिकांनी कसलोच अतिरिक्त सेवा शुल्क घेनासतना लागींच्या टपाल खात्यांत वचून हें खातें सक्रिय करूं येता. सुरक्षीतताय आनी तरलताय ह्या दोनूय निकशांचेर ही येवजण परिपूर्ण आशिल्ल्यान तरणाटे पिळगेक पयल्या पगारांतल्यान अशी शिस्तबद्ध गुंतवणूक सुरू करप खूब फायद्याचें थारतलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
