भांगरभूंय | प्रतिनिधी
पणजेच्या विरोधी नगरसेवकांचो गंभीर आरोप
पणजीः पणजे म्हानगरापालिकेंत सत्ताधारी आनी विरोेधक अशे भेदभाव चालू आसात. महापौरान झाडां बेणपाच्या माक्नां पसत विरोधी नगरसेवकांक पयस दवरल्यात. देड म्हयने मायज जाले विरोधी नगरसेवकांच्या प्रभागांत धोको निर्माण करपी झाडां अजूनय बेणूंक नात. पालिकेच्या ह्या भेदभावाक लागून आमकां लोकांचे तिडकीक तोंड दिवचें पडटा, असो आरोप विरोधी नगरसेवकांनी केला.
पणजे म्हानगरपालिकेच्या तीन विरोधी नगरसेवकांनी आपयिल्ले पत्रकार परिशदेंत हो विशय मांडलो. ह्या वेळार प्रभाग १७ चे नगरसेवक जॅक सुखीजा, प्रभाग २९चे नगरसेवक लिबेर्टा फर्नानडीस आनी प्रभाग ७चे लियोनीड फुर्तादो हाजीर आशिल्ले.
पावसा पयलीं झाडांच्यो खांदयो बेणपाक आमकां सगल्या नगरसेवकांक स्काय लिफ्ट हीं माक्नां मेळटात. ३० मार्चा सावन म्हापालिका गठीत जाली तेन्नाच्यान आमकां तिनूय नगरसेवकांक एक वराक लेगीत हे माक्न दिवंकना, असो आरोप फुर्तादो हांणी केलो.
पणजेच्या वट्ट ३० प्रभागां खातीर दोन स्कायलिफ्ट आनी बेणपाचीं माक्नां आसात. तुमी सत्ताधारी नगसेवाकांच्या प्रभागांत पयलीं माक्नां दिता आसत जाल्यार आमकां कसलीच समस्या ना. मात आतां मार्च, एप्रिल, मे म्हयनो जावन आमी जून म्हयन्यांत पावल्यांत. अडेज म्हयनो जावन गेलो. मात म्हापालिके कडेन आमकां माक्नां धाडपाक एक वर लेगीत ना, अशी कागाळ फुर्तादो हांणी केल्या.
टोंकार रावपी म्हज्या मतदाराच्या मोटारीचें झाड कोसळ्ळें. मोटारी भितर नासलो ना जाल्यार तो मरपाचो. तुमी माक्नां धाडी नासतना पणजेच्या नागरीकांक वंचीत दवरतात. चडशे लोक अर्थीक मागास आसात. जर एक झाड एका घराचेर पडून लुकसाण जालें जाल्यार तें दुरूस्त करप तांकां परवडपा भायलें आसा. देखून लोक आमकां विचारतात आनी आमकां मतदारांक तोंड दाखोवंक लेगीत कुस्तार जातात, अशी तिडक फुर्तादो हांणी उक्तायल्या.
३० मार्चाक उप-महापौराक माक्नांचो ताबो दिवन तांकां हीं माक्नां दर प्रभागांत धाडपाची जापसालदारकी दिल्ली. आमी तांची भेट घेतले उपरांत तांणी आमकां महापौराक मेळपाक सांगलें. उपरांत आमी महापौर आनी आयुक्ताची भेट घेतली, मात तांणी बोट परते उप-महापौरांचेर दवरले. तुमी आमची कित्याक पिडणूक करता अशीं कितलींशींच पत्रां बरयलीं, मात जाप आयली ना, असो दावो फुर्तादो हांणी केला.
ह्या भेदभावाक लागून म्हजो एक मतदार फुर्योज जालो. तुमकां वेंचून हाडून कांय फायदो ना, झाडां बेणपाचें काम हांवें स्वता केलां अशीं उतरां आपल्याक आयकुचीं पडलीं, अशी कागाळ जॅक सुखीजा हांणी केली.
७५ दिसा मदलो एक दीस तरी माक्नां झाडां बेणपाक दिवपाक जाय आसलीं. आयत्या वेळार तुमी सांगतात, हें माक्न दुसरे कडेन धाडलां आनी तें दिवप शक्य ना. ही एक गरजेची सेवा आसा. देखून झाडां बेणपाचो विशय येता तेन्ना तुमी आमकां विस्वासांत दवरचें, अशी मागणी सुखीजा हांणी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
