भांगरभूंय | प्रतिनिधी
पणजीः कारापूर अभिनंदन लोढा प्रकल्पा आड दाखोवन दिल्ल्या पर्यावरण उल्लंघनाचेर आयज सुरू जाली बसका. हे बसकेंत थळाव्यांनी बरयल्ले कागाळीची दखल घेवन पर्यावरण खातें आपलो फुडलो निर्णय कळयतले.
फाटल्या शुक्रारा कारापूर प्रस्तावीत मेगा प्रकल्पाक लागून थळाव्यांनी आमदार विरेश बोरकार हांच्या फुडारपणा खाला पर्यावरण खात्यांत मोर्चा व्हेल्लो. थंयसर थळावे आनी पर्यावरण वावुरप्यांनी प्रकल्पांक लागून जाल्लें पर्यावरणाचें लुकसाण दाखोवन दिलें. उपरांत हे विशीं बसका आपोवपाचें आस्वासन खात्याचे संचालक सचिन देसाय हांणी दिलें.
थारायिल्ले प्रमाण पर्यावरण खात्यान आयज सांजेवेळार ३.३० वरांचेर बसका आपयल्या. हे फाटभूंयेर सकाळींच कारापूरचे लोक व्हडा संख्येन खात्या भायर हजर आशिल्ले. पर्यावरण खातें आयजचे बसकेंत थळाव्यांनी केल्ले कागाळींचें स्पश्टीकरण प्रकल्पाच्या प्रवर्तका कडल्यान मागतले. फुडलो निर्णय बसका जाल्या उपरांतूच कळटली.
शुक्रारा पर्यावरण खात्याच्या संचालकाक मेळपाक आयिल्लेे तेन्ना तांणी सांगिल्लें, खात्याची बसका अजून जावंक ना. आमच्योे कागाळी चर्चे खातीर दाखल जाल्यात तशेंच जी जनहीत याचिका दाखल केल्या ताची प्रत पयलींच आमी सादर केल्या. प्रतिवादीन आपलें प्रतिज्ञापत्र सादर केलां आनी हे विशीं ठोस निर्णय घेवपाक सांगलां. ह्या प्रकल्पा खातीरचो पर्यावरण प्रभाव मुल्यांकन अहवाल जावपाकच जाय म्हूण हे मागणेक आमी नेट धरला, अशें थळाव्यांचे प्रतिनिधी अजय प्रभुगांवकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
