भांगरभूंय | प्रतिनिधी
पणजी: भलायकी संचालनालयाच्या वतीन सुरू केल्ल्या टॅली मानस हेल्पलायन सेवेक गोंयच्यान व्हड प्रतिसाद मेळटा. हे हॅल्पलायनीचेर सध्या दिसाक सरासरी ५० ते ६० कॉल्स येतात. मे २०२३ते सुरू आशिल्ले हे सेवे खाला फाटल्या ३ वर्सांनी ३२ हजारां परस चड कॉल्स आयल्यात. त्या माध्यमांतल्यान गरजूंक योग्य समुपदेशन केलें, अशी म्हायती टेलीमानस सेवेच्या वरिश्ठ सल्लागार डॉ. स्नेहा पोकळे हांणी दिली.
मानसीक ताण, कुटुंबीक समस्या, अभ्यासाचो ताण तशेंच निरशेवणीक लागून खुबश्या भलायकेचेर वायट परिणाम जाता. ह्या मानसीक त्रासाक कंटाळून कांय जाण आत्महत्ये सारकिल्लें खर पावल उखलपाचो विचार करतात. अशा सगल्यांक मानसीक आदार दिवप, तांचें समुपदेशन करप आनी तांकां योग्य वैजकी सल्लो दिवप ह्या हेतान सरकारान ही फुकट टॅलीमानस सेवा सुरू केल्या.
मानसीक ताण आशिल्ल्या वा समुपदेशनाची गरज आशिल्ल्या मनशांनी १८००-८९१-४४१६ वा १४४१६ ह्या टोल फ्री नंबराचेर फोन करचो. ह्या नंबराचेर संपर्क केल्या उपरांत सल्लागार, अणभव आशिल्ले दोतोर आनी मानसोपचारतज्ञ संबंदीत लोकां कडेन संवाद सादतात आनी तांकां गरजेचो सल्लो आनी मार्गदर्शन दितात.
डॉ. स्नेहा पोकळे हांणी म्हायती दितना सांगलें, सुरवातेच्या काळांत मुखेलपणान शिषणीक ताण, परीक्षांचो भंय आनी निरशेणी विशीं चड कॉल्स येताले. मात, आतां जनजागृती जाल्ल्यान आत्महत्येचे विचार मनांत येवपी वा खर मानसीक त्रासांतल्यान वचपी लोकूय सरळ फोन करून मजत मागयता. ही सेवा मानसीक भलायके खातीर सामकी गरजेची थारता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
