भांगरभूंय | प्रतिनिधी
मेरठ: मध्य प्रदेशांतल्या मुरैना हांगा जाल्ल्या रेल्वे अपघातांत उत्तर प्रदेशांतल्या ४ जाणांक मरण आयलें. मरण आयिल्ल्यां मदीं आवय-पुताचोय आसपाव. मोबायल स्फोटाक लागून उजो लागिल्ल्याच्या वावड्यां उपरांत उदयपूर इंटरसिटी एक्सप्रेसींतल्यान कांय प्रवासी भियेवन सकयल देंवले. हाचे मजगतीं ४ प्रवाश्या दुसरे ट्रेनीचो धपको लागलो.
ह्या अपघातांत मेरठ रावपी कंचन सिंह (२५) मोहित सिंह, आग्राच्या रुनकता हांगची शकुंतला सिंह (६०) भूरा सिंह, आग्राची आफरीन (३५) आनी आनी तिचो पूत असद (४) हांकां मरण आयलें.
रेल्वे वेवस्थापना प्रमाण, हो अपघात उत्तर हांगा रेल्वेच्या झाशी विभागांतल्या हेतमपूर-धौलपूर रेल्वे मार्गार जालो. गाडी नंबर- १९६६५ खजुराहो-उदयपूर इंटरसिटी एक्सप्रेस आयतारा सुमार ४:१५ वरांचेर हेतमपूर आनी धौलपूर स्टेशन मजगतीं चेन पुलिंगाक लागून मदीं राविल्ली.
रेल्वे प्रमाण, कोचींत अलार्म चेन पुलींग केल्ली. हाका लागून ट्रेन मदल्या स्टेशनाचेर थारली. हाचे मजगतीं ट्रेनीच्या एका कोचींत मोबायल स्फोटा सारकी वावडी पातळ्ळी. खुबश्या प्रवाश्यांनी ट्रेनींतल्यान देंवपाक सुरवात केली.
उदयपूर इंटरसिटी एक्सप्रेसींतल्यान देंविल्ले कांय प्रवासी लागींच्या अप-लाइनचेर पावले. हाचे मजगतीं गाडी नंबर- २०४२४ फिरोजपूर-सिवनी पातालकोट एक्सप्रेस वेगान थंयच्यान वताली. ट्रॅकार आशिल्ल्या ४ प्रवाशांक हे ट्रेनीचो धपको बसलो. घडणुके सुवातेरूच त्या चवगांकूय मरण आयलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
