भांगरभूंय | प्रतिनिधी
आ मच्या मार्गांचेर 365×7×24 आडावण्यो घाल्ल्योच आसतात. त्यो तरातरांच्यो आसतात. कांय पुलीस घालतात, कांय भौशीक बांदकाम खातें घालता जाल्यार कांय (मोनजात बी) सैमीक आसतात. पुलीस हालीं प्लास्टिकाच्यो आडावण्यो घालतात. बांदकाम खातें, नगरपालिका, बी मार्ग खणपा खातीर आडावण्यो घालतात, पूण रातच्या वेळार खणिल्लो मार्ग आडावणे सयत काळखांत सांडून वतात. पणजे सारकिल्या राजपाटणाच्या शारांत गोरवां, सुणीं, बी असल्यो सैमीक आडावण्यो वेळावेळार दिश्टी पडटात. ते भायर, बेबदे रस्तो मेजतात तें वेगळेंच.
आमच्या मार्गांचेर हालीं कोण अपघात जातात! ह्या असल्या अपघातांनी कितले जीव वगडावले! निश्पाप मनशांचे प्राण गेले. सरळ रस्तो दिसतकच कांय जाणांनी घेतिल्ल्या ‘घोंटां’चो परिणाम मुखार येवंक लागता. तेन्ना मागीर कोण सरळमार्गी, कोण तिरपो-, वांकडो-, तिरकस- मार्गी हें कळप खुब्ब कठीण. पूण दोन घोंट पोटांत गेले म्हणटकच मेंदवाक आगळेच तरेची सुचोवणी मेळटा, तो सतर्क जाता आनी तो ते सुचोवणेचें रुपांतर पांयान accelerator दामपांत करता. हांगा करता हें उतर योग्य, काय जाता हें योग्य हें मानसशास्त्रज्ञांकूच सांगूंक येतलें.
आमी (हांगा ‘सरकार’ अशें वाच्चें) Rent-a-Cab सेवा चालू करूंक दिली. तशीच Rent-a-Bike हीय सेवा चलता. जायत्या तिठ्यांचेर pilot उबे आशिल्ले दिश्टी पडटात. गोंयांत pilot ही motorcycle taxi सेवा साठीचें दशक सोंपतां सोंपतां सुरू जाली अशी याद जाता. ही taxi सेवा दितल्यांक pilot हें नांव कशें पडलें ताचो एक ओडलायणो किस्सो एकदां आयकूंक मेळ्ळो. जालें अशें: एक अपघात जालो आनी पुलीस त्या थळार पावले. कोणें तरी म्हणलें खंय, “सायब, हो फास आशिल्लो.” त्या उतराक खंय पुलिसान ताका विचारलें, “तूं स्वताक pilot समजता काय कितें?” घेऽऽ! म्हऱ्यांत जमिल्ल्या काच्याबुच्यांनी “पायलट पायलट” म्हणून कुलकुलाट केलो. तेन्नाच्यान भाडीं मारपी मोटारसायकलकारांक गोंयकार पायलट ह्याच नांवान संबोधूंक लागले. हांगा बायलो लेगीत पायलटां फाटल्यान संकोचा बगर बसतात. अजून मेरेन खंयच्याच पायलटान कोणेच बायलेचेर आगळीक केल्ल्याची नोंद ना.
मजा म्हणजे ही सेवा फकत गोंयांत आसा. कोणेंच ती अजून copy करूंक ना. गोंयांत येवपी पर्यटक लेगीत हे सेवेचो वापर करताले. पूण… जे मेरेन ते ते मेरेन. अकस्मात कोणें तरी Rent-a-Bike ही सेवा सुरू केली आनी ती आज लोकप्रीय जाल्या. आज Rent-a-Bike आनी Rent-a-Cab सोंपेपणीं मेळटात. मधुचंद्राच्या निमतान जीं जोडपीं येतात तीं स्कुटरी भाड्याक घेतात. चौग- पांच जाण येवन मोटार घेतात. पूण दोग-तीग जाण मेळुनूय घेतात. पियेवन वाहन चलयतात आनी निश्पाप गोंयकारांक मारतात. अशेच तरेचो एक भिरांकूळ व्हिडियो मायाचे 27-28 तारखेक पळोवंक मेळ्ळो. एक मोटार चलता आनी फाटल्यान एक स्कुटर चलता. अचकीत Thar कम्पनीचें एक व्हडलें जड अशें वाहन तिका धपको दिवन उडयता. ती वचून पयलीं दिसताले ते मोटारीचेर फाटल्यान शेंवटता. ती Thar (थार) मोटार दाव्यांतल्यान व्हड गतीन वता आनी नाच्च जाता. तिका थार नाशिल्लो दिसता. पुलिसांनी चालकाक धरला.
हातूंतल्यान दोन-तीन निश्कर्श काडूं येतीत. एक, तो चालक सोरो पियेल्लो वा कसले तरी धुंदेंत चलयतालो. दोन, ताका लिसेंस नाशिल्लें. तीन, मार्गार कसलेंच बंधन, आडावणी, पुलीस, बी नाशिल्ल्यान तो मोटार दाव्यांतल्यान डफरायत गेलो. ताका कसलीच भंयभ्रांत ना. ताका कोणूच शूऽऽच्च करिना. विचारिना. विचारूंक ना. विचारचोय ना?!
ताचे दोन दिसां पयलीं एका तरणाट्यान नवीताल्ल मोटार दोना पावला वाठारांत तीन (एक नवी करकरीत) मोटारींचेर मोखली. नवी मोटार घेवन सगलें कुटुंब ‘पासेये’क गेल्लें आनी ध्यानींमनीं नासतना हो अपघात घडलो. कितलें वायट दिसूंक फावो तांकां आनी वयल्यान अपघात करपी मोटारीचो चालक गाळी घालून रस्त्यार झगडटा. आमच्या गोंयांत कितें चल्लां हें?
कोणाय तिरायतान ही वा पयलीं सांगिल्ली ती वा असलेच तरेची हेर घडणूक पळयत जाल्यार ताका प्रस्न पडटलो: गोंयांत प्रशासन आसा काय ना? गोंयांत पुलीस आसात काय नात? काय, जाय ताणें येवचें, अपघात करचो आनी कसलेच तरेचे आडखळी विणें अचळय सुटून गोंया भायर वच्चें. कायदो आनी सुवेवस्था आमी पूर्णपणान गुठलावन माळ्यार उडयल्या काय कितें? अशें गोंया भायल्या तिरायताक दिसतलेंच दिसतलें.
सरासरी काडीत जाल्यार माणकुल्या गोंयांत दिसाक एक अपघात जाता. ल्हान-व्हड जातात जाल्यार खबर ना. अपघात जावपाक जायतीं कारणां आसतात. तातूंतलीं कांय अशीं: 1. सोरो पियेवन वाहन चलोवप. 2. वाहनाची गती मर्यादे भायर वाडोवप. 3. ब्रेक अचकीत मोडप/तुटप. 4. मुखा वयल्या वाहनाचे दिवे दिसनासप आनी ताचेर मोखप. 5. मुखा वयल्या वाहनाच्या दिव्यांनी दिपकावन वचून अपघात घडप. 6. सळसळट्या रगताच्या नेटार गती खुब्ब वाडोवप. कारणां क्र. 1, 2 आनी 4 हांचेर उपाय आसा. जे गजालीचेर उपाय आसा तो सोदून काडुया. जिचेर ना तिचे विशीं काळांतरान उपाय मेळूं येता.
आनीक एक गजाल. प्रधानमंत्री, राष्ट्रपती वा असलीच कोणूय अतिमहनीय व्यक्ती गोंयांत येता तेन्ना मार्गा वयली येरादारी उपकार करून आडावची न्हय. भौसाक कितले त्रास जातात तें भौसाकूच खबर आसता. तें पुलिसांक कळचें ना; प्रशासनाक कळपाचें विसरात. (प्रशासन तुमच्या दारीं, काय दारांत?) गोंयांत नावीक दळाचीं हॅलिकॉप्टरां आसातूच. तीं ह्या अतिमहनीय व्यक्तींचे येरादारी खातीर कित्याक वापरिनात तें समजनासपा पलतडचें. ते व्यक्तीक हवेंतल्यान व्हेल्यार सगल्यांक बरें. भौसाक बरेंच, पूण ते व्यक्तिकूय गोंयचो वाठार हवेंतल्यान पळोवंक मेळटलो. आ! पूण, एक आसा. ते व्यक्तीक कांय बुरश्योय गजाली दिश्टी पडटल्यो. म्हणून काझिनोंच्यो जायराती लिपयिल्ल्यो काय!
दुसरे फावटीं हॅलिकॉप्टर वापरात आनी मांडवींतल्या काझिनोंचेर एक व्हडलो चादर धांपात!!
दामोदर घाणेकार
84599 98914
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
