स्टॅण्डअप काॅमेडीच्या नांवान….

भांगरभूंय | प्रतिनिधी

सध्या सोशल मिडियाचेर प्रणित मोरे ह्या स्टॅण्डअप काॅमेडियनाचे मे म्हयन्यांत जाल्ले कार्यावळीचें क्लिप व्हायरल जालां. भितरल्या वादग्रस्त, बुरश्या विनोदांक (?) लागून तिगांचेर गुन्यांव नोंद केला. महिला आयोगानूय ताची दखल घेतल्या. भितरलो अर्थांत एक मोरे, दुसरी डाॅ. सेजल पवार आनी तिसरो हिमांशू जांगरा. तिगांयनी नाक घासून म्हणटात, तशी माफी मागल्या. सेजलाक 15 दिसां खातीर केईएम हाॅस्पिटल म्हाविद्यालयांत येवपाक बंदी घाल्या. हिमांशूक नोकरे वयल्यान काडिल्ल्याची खबर आसा. सेजलान पोस्टमार्टेमाक हाडिल्ले कुडी विशीं, तर हिमांशून बिर्याणीचेर जाल्लो खर्च वसूल करपाक नाका? तिका अशीच सोडपाची? अशें म्हणून मोगिके वांगडा कितें केलें तें रंगोवन सांगलां. हो मेल्ल्या मनश्याचो, मोगिका म्हणल्यार बायलांचो अपमान आशिल्लो. नेमके ताकाच लागून लोक तिडकल्यात.
विनोद म्हणल्यार दुसऱ्याचो अपमान करप न्हय, दुखय नासतना चिमटो काडून सगल्यांक खोस दिवपाची ही कला. जो मनशांक जोडटा, मना पसून हांसयता, तोच खरो विनोद. संवादफेक, हावभाव, समाजीक निरिक्षण, निरागसपण हातूंतल्यान विनोद करून खरे कलाकार रसिकांक आनंद दितात. दुख्ख विसरपाक लायतात. तातूंत विनोद वा विनोदी प्रसंग बरोवपी, ते बसोवपी लेखक, दिग्दर्शकाचेंय योगदान आसता. आतां टिव्ही, सोशल मिडियाक म्हत्व आयलां तरी एका काळार सिनेमा लोकप्रीय आशिल्ले. तातूंत एक तरी विनोदी पात्र आसतालेंच. दादा कोंडके, सुनील ग्रोव्हर, मेहमूद, अशोक सराफ, चार्ली चॅप्लिन, लाॅरेल, हार्डी, जासिंत वाझ, ख्रिस्तोफर एटकिन्स (मि. बीन), काॅमेडियन सेल्वी, जीम कॅरी, जाॅन डिसिल्वा, प्रिन्स जाकोब …. हे कांय विनोदी कलाकार. कपिल शर्मा शो ही आयच्या काळांतली सगल्यांत चड प्रेक्षक आनी सोशल मिडिया वरवीं पयसो मेळोवपी विनोदी कार्यावळ. पडोसन, चाची 420, हंगामा अशे शेंकड्यांनी हिंदी (हेर भाशांनीय आसात) विनोदी सिनेमा गाजल्यात. स्टॅण्ड अप काॅमेडीच्यो सर्तीय जाताल्यो. राजू श्रीवास्तव, कपिल शर्मा, सुनील पाल सारके जायते कलाकार तातूंतल्यान मुखार आयले. मात ही स्टॅण्डअप काॅमेडी वेगळी. ती लोकांची श्रद्धा आशिल्ले मनीस, देव, उत्सव हांचेर टिका करता. समाजांतली विसंगती दाखोवं येता. फुडाऱ्यांचेर उपरोधित टिकाय करूं येता. पूण लैंगीक संबंद, बुरशीं उतरां, प- फ- भ- ण हांचो उच्चार करीत विनोद सांगप हाका विनोद म्हणपाचो काय आनीक कितें तें कळना! अभिव्यक्ती स्वातंत्र्याच्या नांवार कितेंय करूं येता, हो एक व्हडलो गैरसमज समाजांत आसा.
समाजांतली विसंगती दाखोवन विनोद करूं येता. पूण गाळी, कोणाच्या दुख्खाची फकांडां, शारिरीक व्यंग, अपमान करून विनोद सांगल्यार तुमी रातयां सुपरहिट जायत, पयसोय मेळत, पूण मान, मोग मेळचो ना. सोशल मिडियाचेर कितेंय व्हायरल जाता. बुरशें, वादग्रस्त विशय वेंचून सादर केले काय लोक हांसतात, म्हणटकच जालो आपूण राष्ट्रीय हिरो, अशें कांय जाणांक दिसता. सिगार फुसकायत हें आयकलें, ताका इंग्लीश कातरीत प्रतिसाद दिलो काय थोड्यांक आपूण बोल्ड, आधुनिक, मुक्त विचारांचो कशें दिसता. बुरश्या विनोदा कडेन वळप म्हणल्यार तुमचे कडेन कल्पनाशक्त ना, असो अर्थ जालो ना. मार्क ट्वेन, पु. ल. देशपांडे, पी जी वूडहावस, अ. ना. म्हांबरो, हरिशंकर परसाई, शरद जोशी असले लेखक खंय आनी हे स्टॅण्डअप काॅमेडीचें लिखाण करपी खंय! ‘हांसोवप सोंपें, पूण कोणाकूच दुखयले बगर हांसोवप ही खरी कला’, अशें वूडहावसान म्हणलां. मर्यादा पाळूनय हांसोव येता. चार इश्ट येवन आपले भितर कितेंय उलयतात तसलें प्रेक्षकां मुखार सादर जाता, तें योग्य न्हय. 19 व्या शेंकड्यात अमेरिका, इंग्लंडांत सुरू जाल्ली ही कला मुखार खंयच्या मार्गान वतली, तें हे काॅमेडियनूच (?) जाणात.