भांगरभूंय | प्रतिनिधी
आयज सामको सकयले पातळे वयलो, उथळ आनी लिंगिक आशय विनोद म्हूण स्विकारपी, ताची मजा घेवपी इतल्या व्हड प्रमाणांत वर्ग तयार जाला हें दुख्खाचें.
चडशे दादले- बायलोय आपल्या विस्वासांतल्या इश्टां वांगडां कमरा सकयल ओपारी मारून विनोद करतात हें सैमीक, पूण हालीं तें समाज माध्यमाच्या बाजारांत इतलें विकृत जावपाक लागलां की ताणें कन्टेटाचें रूप घेतलां. भारतीय समाजांत जीं फकांडां उघडपणान करनात, देखीक बायल- दादल्याचो शाररिक संबंद वा चलयांचें गुप्त आंगांचो उल्लेख. पूण युटूबार हाचो आस्पाव केले बगर स्टॅण्डअप कॉमेडी नांवाचो शो चलचो ना, असो भंय ह्या लोकांच्या मनांत आसा काय? फकत खाजगी भाग आनी लैंगीक संबंदांचेर फकांडां करूं येतात? म्हाका समजना. भुरगेपणांत खूब बऱ्यो कलाकृती पळोवन आमी आमची विनोदाची बुद्द विकसीत केल्ली, आयज सामको सकयले पातळे वयलो, उथळ आनी लिंगिक आशय विनोद म्हूण स्विकारपी, ताची मजा घेवपी इतल्या व्हड प्रमाणांत वर्ग तयार जाला हें दुख्खाचें.
लाखांनी लोकांनी पळयिल्ल्या शोंत कोण तरी म्हणटा, ‘हांवें तिका 370 रुपया रूपयांची बिर्यानी खावयल्या, ते पयशे फारीक करून घेनासतना तिका घरा वचपाक दितलों?’ कितलो चिप जोक!मागीर तो तिका बागेंत व्हरता आनी थंय कितें कितें केलें, तें सांगता. ह्या विनोदी शोंत एक लेडी दोतोर हांसून म्हणटा, ‘ दोतरकी शिकतना बॉडी दान केल्ले एका काकाचे कुडीच्या खाजगी भागाच्या आकार विशीं उलयतना आमी हांसतालीं’ तें आयकून प्रेक्षकांनी हांसून प्रतिसाद दिल्यान तिका सेलिब्रिटी सारको फील आयलो. हें देवा, मरणा उपरांत असो अपमान घडटा हें लोकांक कळ्ळें जाल्यार ते आपलीं कूड दान करपाक फाटीं सरतले. हें प्रकरण सध्या सोशल मिडियाचेर गाजता. पयलीं कमरे सकयले विनोद बुरशे म्हणटाले, आतां विनोद करपी ताचे भायर पावल्यात. कांय जाण तर गाळी वा बुरशीं उतरांय उच्चारतात.
ह्या प्रकारच्या गजालीक एका सज्जनान ‘सायकोलॉजिकल वेंट’ हें नांव दिलां. तुमगेली उदासीनताय, चिंता, चिडचिडेपण आनी असुरक्षीतताय उक्ती, पयस करपाक अश्लीलताय हो एकूच उपाय? अश्लीलताय हो जिणेचो एक भाग. पूण ताची मान्यताय खाजगी वयल्यान भौशीक जाल्या आनी
पुराय वातावरण बदल्लां. खाजगी रितीन जावपी सगल्यो गजाली लोकांनी भौशीक केल्यो जाल्यार कितें जातलें? शौच, मुतप, लिंगीक संबंद अशे सैमीक विधी उक्त्या सुवातेर, लोकांच्या हाजिरेंत केल्ले जाल्यार कितें जातलें? एकठांय रावतना आमी समाज म्हणून खंयचे नेम पाळचे हाचो विचार करप म्हत्वाचें. बुरशें मनोरंजन नियंत्रीत करपाक कायदो आसूंक जाय अशें म्हाका खूब गंभीरतायेन दिसता. अशे शो आनी रील ह्या पिरायेच्या भुरग्यांक दाखयत रावले जाल्यार दादले बायलांक मान दिवचे नात असो समाज निर्माण जातलो. म्हजे मतान तांचो आनंद घेवपा भायर कसलोच संबंद तयार करपाची तांची प्रवृत्ती आसची ना.
———————-
सुदिन वि. कुर्डीकार
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
