भांगरभूंय | प्रतिनिधी
नवी दिल्ली: नवी दिल्लींतल्या तुघलकाबाद एक्सटेंशन वाठारांत १२ जुनाक लागिल्ल्या उज्यांत तिगांक मरण आयिल्ल्या प्रकरणा विशीं धक्को दिवपी म्हायती मुखार आयल्या. सुरवातेक हो प्रकार अपघात म्हूण मानिल्लो. मात पुलीस तपासांत हो ‘नियोजीत उजो’ लायिल्ल्याचें उक्तें जालां.
१२ जुनाक मध्यानरातीं सुमार २:२४ वरांचेर एके इमारतींत हो उजो लागलो. हातूंत ८ जाण जखमी जाले. हातुंतल्या तिगांक उपचारा वेळार मरण आयलें. सुरवातेक हो उजो अपघात आशिल्ल्याचें समजून पुलीस तपास करीत आशिल्ले.
तपासणे मजगतीं, एके सीसीटीव्ही फुटेजींत एक तरणाटी चली इमारतींत वचून भायर येतना दिसली. ही फुटेज पळोवन पुलिसांनी तपासणी केली तेन्ना हो उजो मुद्दम लायिल्ल्याचें उक्तें जालें.
ह्या प्रकरणांत पुलिसांनी १७ वर्सांचे एके चलयेक ताब्यांत घेतल्या. तांणी आपल्या गुन्यांवाची कबुली दिल्या. तिणें इमारतींत दवरिल्ले एके दुचाकीक पेट्रोल घालून उजो लायिल्लो. चवकशे वेळार तिणें सांगलें, सरिता (२७) हिच्या सांगण्यावेल्यान तिणें हें केलें. सरिताक ही सुचवणी निरंजन (३३) आनी ताचो भाव राजकुमार (२७) हांणी दिल्ली.
पुलिसांच्या मतान हो प्रकार एका अर्थीक वादांतल्यान जाला. निरंजन हाचो एका मनशा कडेन वयक्तीक वायटपण आशिल्ले. ताका लागून ताणें सूड घेवपाच्या हेतान हो कट रचिल्लो. जरी तांचो उद्देश फकत गाडी पेटोवपाचो आशिल्लो, तरी उजो सगले इमारतीक पातळिल्ल्यान व्हड पघात जालो.
सध्या पुलिसांनी १७ वर्सांचे चलयेक ताब्यांत घेतलां आनी सरिता, निरंजन आनी राजकुमार हांकां अटक केल्यां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
