भांगरभूंय | प्रतिनिधी
पर्वरी : सुकूर-पर्वरेच्या जोशवाडा वाठारांत दोन मांजरां झगडटालीं. ह्या रागान एका मनशान शेजारच्या माजराक लाकडाच्या दांड्यान बरेंच मारलें. हातूंत त्या माजराचो जीव गेलो. ह्या प्रकरणांत पिडेस्त मांजराच्या धनयान पर्वरे पुलीस स्टेशनांत दुबावीत शेजार्या आड कागाळ दाखल केल्या.
हे विशीं मेळिल्ले चड म्हायती प्रमाण, शेनवारा सकाळीं ११ ते ११:३० मजगतीं ही घडणूक घडली. कागाळदार कुटुंबांतली बायल आनी तांचें कुटूंब घरांत विसव घेताले. तेन्नाच भायर माजर आड्डुपाचो आवाज आयलो. भायर पळयल्यार कागाळदाराचें माजर आनी शेजारचें माजर झगडटालीं. ह्याच वेळार दुबावीत हातांत व्हड दांडो घेवन आयलो आनी तांणी तातूंत कागाळदाराच्या माजराक मारपाक सुरवात केली. कागाळदार कुटुंबान त्या मनशाक आडावपाचो यत्न केलो. मात त्या मनशान माजराचे तकलेर फाटोफाट दोन नेटान वार केले. हातूंत त्या माजराचे तकलेक गंभीर दुखापत जाली आनी तें जमनीर तळमळपाक लागलें. कांय मिनटांनी ताका थंयच मरण आयलें.
पिडेस्त बायल आनी तिच्या पुतान दिल्ले म्हायती प्रमाण, संबंदीत मनशाची मानसीक स्थिती आनी वागणूक पयलीं सावनूच हिंसक आसा. ह्यान पयलींय तांणी खुबश्या जनावरांक मारल्यांत. घरा लागसारच्या वाठारांत कोयतो घेवन भोंवप, फांतर मारप अश्या ताच्या वागणुकेची सीसीटीव्ही फुटेजूय उपलब्ध आसा. चार दिसां पयलीं थळावे पंचायतींत आनी पुलिशेंत ताचे आड कागाळ केल्ली. हे घडणुके उपरांतूय तांणी कुटुंबाक घरा भायर येवपाचें आव्हान दिवन धमकावपाचो यत्न केल्लो.
हे घडणुके उपरांत पिडेस्त कुटुंबान रोखडोच पुलिसांक संपर्क केलो. पर्वरी पुलिसांनी घडणुके सुवातेर वचून सहकार्य केलें. सीसीटीव्ही फुटेजीच्या आदारार फुडलो तपास पुलीस करतात. मरण आयिल्ल्या माजराचेर कुटुंबान निमणे संस्कार केले. ह्या घरांत तरणाट्यो चलयो आनी ज्येश्ठ नागरीक रावता. ह्या हिंसक शेजार्या कडल्यान आमच्या जिवाक धोको निर्माण जाला. असो भंय ह्या कुटुंबान उक्तायला. तशेंच, अशा क्रूर प्रवृत्तीच्या मनशाचेर खर कायदेशीर कारवाय जावचे खातीर गोंयच्या जनावरां इश्टांनी आनी संघटनांनी आपल्याक न्याय मेळोवन दिवपा खातीर मजत करची, असो उलो पिडेस्त कुटुंबान केलो.
मजगतीं, पोशिल्ल्या जनावराक बडयेन जिवे मारिल्ल्या प्रकरणांत शेजार्या आड एफआयआर नोंद करची, अशी मागणी उत्तर गोंय ’जिल्हो जनावरां छळ प्रतिबंधक सोसायटी’न पर्वरी पुलिसांकडेन केली. ह्या प्रकरणांत भारतीय न्याय संहिता, २०२३ च्या कलम ३२५ आनी जनावरांचो छळ प्रतिबंधक कायदो, १९६० च्या संबंदीत कलमां खाला गुन्यांव दाखल करपाची मागणी केली.
हो गुन्यांव दखलपात्र आसूनय पुलिसांनी ह्या प्रकरणांत फकत अदखलपात्र कागाळ नोंद केली. हाचेर आक्षेप घेवन बेगोबेग खर कायदेशीर कारवाय करपाचो उलो संस्थेन मारला. घडणुके सुवातेवेले सीसीटीव्ही फुटेजींत ही पुराय घडणूक कैद जाल्या. पुलिसांनी हो पुरावो म्हणून राखून दवरचो, अशें ’डीएसपीसीए’न म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
