भांगरभूंय | प्रतिनिधी
पणजी : गोंयांत फाटल्या २४ वरांनी घडिल्ल्या पांच विवीध भिरांकूळ अपघातांनी सुमार ८ जाणांनी आपलो जीव वगडायलो. जाल्यार एके बायलेन मांडवी पुला वयल्यान उडी मारून आत्महत्त्या करपाचो यत्न केलो. आयज आयतारा सकाळीं पुलिसांचें ’रोबर्ट’ वाहन अनमोड वाठारांत गस्त (पेट्रोलिंग) घालतना तांकां देंगणांत ट्रक कोसळिल्ल्याचें दिसलें. पुलिसांनी बेगोबेग सकयल वचून पळयलें तेन्नाच चालक मरण आयिल्ले अवस्थेंत सांपडलो. सुदीप कापोज (रा. पश्चीम बंगाल) अशें ह्या मरण आयिल्ल्या चालकाचें नांव आसा. मुळावे म्हायत प्रमाण, हो अपघात शेनवारा, १३ जुनाक रातचो घडलो. हे घडणुकेची म्हायती मेळटांच कुळें पुलिसांनी घडणुके सुवातेर वचून कुडीचो पंचनामो केलो.
जाल्या दुसरो अपघात आयज सकाळीं कळंगूटे वाठारांत जालो. सांवतावाडो, बागा हांगा गाडी आनी दुचाकीच्या धपक्यान दुचाकी चालक केतन गावडे (२५, कुंभारजुव्यां) ह्या टुरिस्ट पुलीस कॉन्स्टेबलाक मरण आयलें. फरारी कोल्हापूरच्या गाडी चालकाचो कळंगूट पुलीस सोद घेतात.
मजगतीं, तिसरो अपघात आयज धारबांदोड्यां जालो. दोन दुचाकीं मदीं जाल्ल्या भिरांकूळ अपघातांत विजय चव्हाण (६९, रा. पणसुलें-धारबांदोड्या) हाकां मरण आयलें. जाल्यार एकलो गंभीर जखमी जालो. ह्या अपघाता विशीं मेळिल्ले म्हायती प्रमाण, पोरणें गोंयच्या डोंगरी वाठारांतल्या १० ते १२ तरणाट्यांचो एक ग्रूप आयतारा सुटये निमतान बायक रायडींगाक भायर सरिल्ले. तेन्नाच थळावे विजय चव्हाण हे आपले दुचाकीवेल्यान पेट्रोल पंपाचे दिकेन वताले. वाटेर एके कडेन दोन दुचाकींनी एकामेकाक सामकार धपको दिलो. हातूंत एकल्याक मरण आयलें आनी एकलो जखमीआसा. हे विशीं पुलीस फुडलो तपास करतात.
कुळ्यां शेनवारची सुटी मनोवपा खातीर आयिल्ल्या ५ जाण तरणाट्यां मुखार संकट येवन उबें रावलें. दुदसागर न्हंयेंत पेंवपा खातीर देंविल्ल्या चार जाणांक मरण आयलें. हातूंत तिगां खाश्या भावांचो आसपाव आसा. मजगतीं काल सांजेवेळार कोलवाळे पुलार रस्तो हुपतना गाडयेचो धपको बसून कोलवाळच्या आदल्या पंचांक मरण आयलें.
तशेंच शेनवारा रातीं उसरां पोरण्या मांडवी पुलावेल्यान न्हंयेंत उडी मारून एके बायलेन आत्महत्त्या करपाचो यत्न केलो. आजूनय ताची कूड मेळृंक ना. तिचो सोद घेवप चालू आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
