भांगरभूंय | प्रतिनिधी
येजमान अमेरिका पंगडान डी गटांतले मॅचींत पॅराग्वेक 4-1 अशा गोल फरकांनी हारोवन 96 वर्सां पयली जाल्ले संवसारीक फुटबॉल सर्तीच्या इतिहासाची पुनरावृत्ती केली. अमेरिका पंगडान 1930तले संवसारीक सर्तींत पॅराग्वेक एकवटेन जाल्ले मॅचींत 3-0 अशा फरकांनी हारायिल्लो. ते मॅचींत बर्ट पटेनाउड हाणें सर्तीच्या इतिहासांतली पयली हॅट्रीक केल्ली.
32 वर्सांनी घरच्या मैदानाचेर संवसारीक सर्तींत खेळपी अमेरिकेन काल चार गोल केले. संवसारीक सर्तीचे खंयचेच मॅचींत अमेरिकेन केन्नाच चार गोल करूंक नाशिल्ले.
हे मॅची उपरांत अमेरिका डी गटांत पयले सुवातेर पावलो. जाल्यार पॅराग्वे चवथे सुवातेर आसा.
अमेरिकेन आक्रमक सुरवात केली आनी क्रिस्चियन पुलिसीकच्या यत्नांक मेळिल्ल्या आत्मघाती गोलाक लागून 1-0 अशी आघाडी मेळ्ळी. ते उपरांत बालोगुन हाणें 31व्या मिण्टाक आनी पयल्या अर्दाच्या इंज्युरी टायमांत गोल करून स्कोर 3-0 असो केलो. खंयचेय संवसारीक सर्तीचे मॅचीच्या पयल्या अर्दांत अमेरिकेन मेळयिल्ली ही व्हड आघाडी आशिल्ली.
न्यूयॉर्कांत जल्मल्लो आनी इंग्लंडांत वाडिल्लो 24 वर्सां पिरायेचो बालोगुन हाणें आपले संवसारीक सर्तीचे पदार्पणांत दोन गोल करून इतिहास घडयलो. 1930 उपरांतचे संवसारीक सर्तींत एके मॅचींत दोन गोल करपी तो पयलो अमेरिकन खेळगडो थारलो.
दुसऱ्या अर्दांत पॅराग्वे खातीर मॉरिसिओ हाणें एक गोल करून पुनरागमनाचो यत्न केलो. पूण, अमेरिकेन मॅची वयली आपली पकड कायम दवरली. इंज्युरी टायमाच्या अखेरच्या खिणांक जिओ रेयनान चवथो गोल करून जैत निश्चीत केलें.
बोस्नियान कॅनडाक 1-1 आडायलो
संवसारीक क्रमवारींत 64वे सुवातेर आशिल्ल्या बोस्निया-हर्जेगोविना पंगडान आपल्या परस वयले सुवातेर कॅनडा पंगडाक (30वें रॅंकिंग) 1-1 असो बरोबरींत आडायलो. बादाबाद उरिल्ल्यान दोनूय पंगडांक एकेक गूण फावो जालो. ब गटांत कॅनडा पयले जाल्यार बोस्निया दुसरे सुवातेर आसा.
कॅनडा पंगड 77 मिण्टां मेरेन 0-1 असो फाटीं आशिल्लो. 76व्या मिण्टाक मैदानांत देंविल्ल्या सायले लारिन हाणें 2 मिण्टां भितर गोल करून कॅनडाक घरच्या मैदानाचेर संवसारीक सर्तीच्या इतिहासांतलो पयलो गूण मेळोवन दिलो.
कॅनडाचो संवसारीक सर्तीच्या इतिहासांतलो हो फक्त दुसरो गोल आसा. 1986त कॅनडान तिनूय मॅची व्हगडायिल्ल्यो. 2022त लेगीत ताचें आव्हान गट पांवड्याचेरूच सोंपिल्लें. कॅनडा आपली फुडली मॅच 18 जूनाक कतार पंगडा आड खेळटलो, जाल्यार बोस्नियाची मॅच त्याच दिसा स्वित्झर्लेण्ड पंगडा आड जातली.
पयल्या अर्दांत बोस्नियान 21व्या मिण्टाक जोवो लुकिचच्या हेडर गोलाक लागून आघाडी घेतली. मुखेली सियाद कोलासिनाच हाणें कॉर्नर किकीचेर म्हत्वाची भुमिका वठयली. आंतरराष्ट्रीय फुटबॉलांतलो ताचो हो पयलोच गोल थारलो.
कॅनडान बरोबरी सादपा खातीर कायम चेंपण दवरलें. 54व्या मिण्टाक रिची लारियाचो यत्न क्रॉस बाराक लागून भायर गेलो. कॅनडा आपलो स्टार खेळगडो अल्फोंसो डॅव्हिस बगर मैदानांत देंविल्लो. दुखापतीक लागून तो भायर आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
