भांगरभूंय | प्रतिनिधी
हालीं कोंकणी कादंबरी आनी नवलिकांक बरे दीस आयल्यात. एक काळ असो आसलो की कोंकणींत सामक्यो हाताच्या बोटार मेजपा इतल्यो कादंबऱ्यो आनी नवलिका आसल्यो. शणै गोंयबाबाची ‘संवसारबुट्टी’ ही देवनागरी कोंकणींतली पयली कादंबरी.
गोंय मुक्त जाले उपरांत नव्या दमाच्या लेखकांनी कादंबरी बरोवपाक सुरवात केली. बरोवप्यांची आनी पानांची संख्या सामकी उणी आशिल्ली. हरशीं धीर गंभीर ज्येश्ट लेखक ज्ञानपिठकार रवीन्द्रबाब केळेकार हांका लेगीत एक नवलिका बरोवची पडली. खरें म्हळ्यार तांचो पिंड कादंबरी वा नवलिका बरोवपाचो न्हय. पूण कोंकणींत कादंबरी आनी नवलिकांचो आंकडो उणो तो भरून काडपाक तांका ‘तुळशी’ ही नवलिका बरोवची पडली.
आदले कोंकणी लेखक हे मुळांत फ़ायटर आनी मागीर रायटर. आदल्या कोंकणी लेखकांचो चडसो वेळ आपले भाशे खातीर झगडपाक गेलो. देखून तांकां कादंबरी बरोवपाक वेळ मेळूंक नाशिल्लो आसूं येता. पूण हालीं प्रस्थापीत लेखकां वांगडा कादंबरीच्या मळार नवे लेखक आयल्यात. उदयबाब भेंब्रे आनी अरविंदबाब भाटीकार हे म्हालगडे साहित्यीक कादंबरीच्या क्षेत्रांत भितर सरल्यात ही एक बेस बरी गजाल. थोड्याच वेळा भितर भाटीकारबाबान तीन आनी उदयबाबान दोन कादंबऱ्यो उजवाडाक हाडल्यात.
हें सगळें बरोवपाचें कारण म्हळ्यार मडगांवचे डॉ. व्यंकटेश पांडुरंग हेगडे हांची ‘मळब भरून आयलें’ ही नवलिका हालींच उजवाडाक आयल्या. डॉ व्यंकटेश हेगडे हें एक भोवआयामी व्यक्तिमत्व. मडगांवचो सेवाभावी दोतोर. तशेंच ‘आर्ट ऑफ लिव्हिंग’ हे आध्यात्मीक संस्थेचो प्रचारक. उत्कृश्ट गायक, नट, निर्मातो. नाट्यमाचयेची आनी संगीताची सेवा करतना ताणें बरपावळय केल्या. ही नवलिका लेखकान प्रथम पुरुशी शैलींत बरयल्या. ताका लागून खंयच्याय आत्मकथना विशीं जी उमळशीक उप्रासता तीच उमळशीक ही नवलिका वाचतगीर वाचकाक येता.
ही नवलिका नायकाच्या आजी आनी आजो हांच्या भोंवतणी घुंवता. नायकाचो आजो हो कुर्डी गांवचो भाटकार. त्याभायर त्या गांवचो सरपंच. गांवांत वट आशिल्लो. ह्या नायकाच्या आज्याचें गांवांतल्या एके किरिस्तांव बायले (कोंयसांव) कडेन संबद जुळटात. पूण ही गजाल तो सगळ्यांपासून लिपोवन दवरता. पूण ताचे बायलेक म्हणजे नायकाच्या आज्जेक हें सगळें खबर आसता. पूण आपल्या कुटुंबाची छि-थू जावंची न्हय म्हण ती सगळें सोंसता. ह्या अनैतीक संबंदापासून नायकाच्या आज्यापासून त्या बायलेक म्हळ्यार कोंयसांवांक एक चली जाता. तिचें मागीर कितें जाता हें कळपाक पुराय कादंबरी वाचपाक जाय.
ह्या नवलिकेंत पात्रांची गर्दी ना. नवलिकेचो आंवांठूय व्हडलो ना. त्या खातीर पात्रांची वळख वाचकाक स्पश्ट मेळटा. पात्रांचें चित्रणय बेस बरें आनी वास्तववादी जालां. पात्रां कल्पनेंतलीं आसलीं तरी तांका वास्तवादी रुप दिवपाक लेखक येसस्वी जाला. लेखकांन गांवगिर्या वाठाराचें, सैमाचें, गांवगिर्या जिणेंचे बेस बरें चित्रण केलां. कसलोय पाल्हाळ नासतता नवलिकेंतल्यो घडणूको जलद गतीन फ़ुडें वतात. त्या खातीर ही नवलिका एकाच बसकेंत वाचून सोंपता. हें कादंबरीचें मोटें यश.
ह्या नवलिकेंतलें नायकाच्या आज्जेचें पात्र समर्थपणांन रंगयलां. आपल्या घोवाची चालचलणूक ती जाणां. आपल्याचेर अन्याय जाता हें तिका खबर आसा. पूण आपलो घर संवसार कोसळचो न्हय म्हण ती हें सगळें सोंसता. सगळो अन्याय ती मनाचे खोलायेंत चिड्डून दवरता. फुगासांव जावनूय सोंसता. ही नवलिकेंतल्या नायकाची आजी लेखकान समर्थपणांन उबी केल्या. ह्या नवलिकेंत कांय घडणूको अश्यो आसात त्यो भडकपणान रंगोवं येताल्यो. तो मोह लेखकान टाळ्ळा म्हण ताचें अभिनंदन करपाक जाय.
दोतोर हेगडेची नवलिका वाचतना परत परत एक विचार मनांत येता तो म्हणल्यार लेखका कडेन इतलें सक्षम कथाबिज आसतना तांणे ती फकत शंबर पानांनी कित्याक सोंपयली? तिचो विस्तार कित्याक केलो ना? हो एक वाचक म्हण म्हाका पडिल्लो प्रस्न. दोतोराले पेशंट म्हणल्यारूच विविध पात्रां. तातूंतले धागे जोडून अमूर्त रूपांत पात्रां रंगोवपाक वाव आशिल्लो. ते भायर दोतोराक सांस्कृतीक आध्यात्मिक मळार तरेकवार सभावांचे लोक मेळ्ळ्यात. तातूंतल्यानूय एक दोन पात्रां वेवस्थीत जोडूं येतालीं.
ह्या नवलिकेक ज्येश्ट कोंकणी कादंबरीकार उदयबाब भेंब्रे हांणी अभ्यासपूर्ण प्रस्तावना बरयल्या. एक वाचपासारकी नवलिका दिल्ले खातीर लेखक डॉ. हेगडे हांकां परबीं. तांणी ही आपली कोंकणींतली साहित्यसेवा फ़ुडाराकूय चालूच दवरची हें मागणें. ही नवलिका संजना पब्लिकेशन्सान उजवाडाक हाडल्या.
सखाराम शेणवी बोरकार
9923306751
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
