बाल साहित्य सामकें गरजेचें

भांगरभूंय | प्रतिनिधी

बाल साहित्य रचप भोव गरजेचें आनी म्हत्वाचें, कित्याक भुरगीं वर्ततात आमची फुडली पिळगी जीं जावन आसात फुडाराचे खांबे. संवसाराची जाणविकाय आनी तातूंत आशिल्लो चमत्कार जाणून घेवंक तांचो तो हक्क. संवसारांत घडटा तें पळोवंक वाचूंक सगळ्यां लागीं घडना पूण तेंच घडिल्लें आनी कितें घडूं येता, तें एका पुस्तकांतल्यान जाणून घेवं येता.
डॉ सेउस्स हो अमेरीकेचो बरोवपी अशें म्हणटा, “जितलें तूं चड वाचता तितलें चड तूं जाणून घेता आनी जितलें तूं शिकता, तितलें चड जागे तूं पुस्तकांतल्यान भोंवून काडटा.” कोंकणी भास उलयतकच , ती बरोवंक आनी वाचन करूंक यत्न जावंक जाय. बाल – साहित्याचें बरोवप करूंक भुरग्यांक ल्हानच सावन वाचन करूंक प्रोत्साहन दिवंक गरजचें. मार्गारेट फुलेर, अमेरीकेचें पत्रकार अशें उद्गरारता, ‘’आयचो वाचपी फाल्यांचो फुडारी. साहित्याची वाड ताच्या वाचप्यांचे संवयेंतल्यान जाता. पूण वाचन करतलीं जाल्यार तांकां पुस्तकां गरजेचीं तांचे पिराये प्रमाण तांकां पुस्तकां जाय. वाचन भुरग्यांक सुरवातेचें
दार, जें सगळें शिक्षण शिकूंक आनी करूंक आदाराचें. ‘’
बाल साहित्य बरपा वळीची पिराये प्रमाण वांटणी जाय. दाट कागदाचें, चित्रां पुस्तक 03 वर्सांची पिराय. चित्रांचीं पुस्तकां 03 ते 08 वर्सांची पिराय, वाचूंक सुरू करपी भुरग्यांची पुस्तकां 05 ते 08 वर्सांची पिराय, मदले पिरायेच्या भुरग्यांक पुस्तकां 8 ते 12 वर्सांची पिराय, तरणें पिरायेची नवलिका आमी मागीर कादंबरी सारकीं पुस्तकां 12 ते 18 वर्सांची पिराय.
बाल साहित्य बरोवंक थोड्यो सुचना
एक पुस्तक, एक पेन, एक भुरगें आनी एक शिक्षक संवसार बदलूंक शकता. बाल-साहित्यांतल्यान बरपां वळींतल्यान भुरग्यांच्या मनांचेर प्रभाव हाडून, तांचें जिवीत करून आमच्यान समाज घडोवंक येता. बरपावळींतल्यान भुरग्यांच्या काळजां-मनांचेर प्रभाव आयले उपरांत बरपावळ दर्जेदार जाता. भुरग्यांक आवडटा तसलें, भुरग्यांच्या मनार प्रभाव हाडटलें बाल साहित्य निर्माण करूंक सयल दिल्ल्या मुद्दांयेर ध्यान आसूं दी.
भुरगीं खंयच्या वर्सांचीं ताचेर पयलें लक्ष घालूं या. भुरग्यांचे पिराये प्रमाणें तांच्या हातांत पुस्तक पडप गरजेचें. तांच्या मनाचे आकारणें उदेंशी मनांत रीग घेवंक शकता. तेंच तांच्या हातांत पडूंक गरज. भुरग्यांची पुराय पळोवन तांचे पिराये प्रमाणें तांच्या हातांत, पुस्तक पडटा तेन्ना फुडारांचीं बरीं वाचपी आनी बरोवपी तीं जावंक पावतात.
भुरग्यांक समजता तीं आनी मर्यादेची उतरावळ वापरूया. सगळीं उतरांवळ भुरग्यांक समजुवंची ना. समजता तेंच तांकां दिलें जाल्यार तांची बरी वाड जातली. मनांत आठापूंक जाता आनी काळजांत रीग घेता तें तांच्या हातांत पडल्यार तीं रोखडीच ताचो लाब घेतलीं भुरग्यांच्या मनांची वाड जाता देखून मर्यादेची उतरां वापरूंक दर बरोप्यां मनांत दवरूंक फावो.
भुरग्यां भशेन चिंतुया. बाल साहित्याचें बरोवप करपतना भुरग्यांच्या मनांत भितर सरून भुरग्यां परीं चिंतून तांचे आवडिचें आनी बरें तें तांकां दिवूं या. भुरग्यांच्या मनांत वतले विचार, भावना, पात्रां (व्यक्ती) सभाव बरपांत दिसून येवुदी. भुरग्यां भशेन बरोवपी चिंततांत तेन्ना बरे बाल साहित्यकार उत्पन्न जावंक पावतात.
भुरग्यांक चित्रां आवडटात. बाल साहित्य बरपांवळींत चित्रां चड म्हत्वाची. चित्रांतल्यान भुरगीं चड जाणून घेतात. चित्रांचीं आनी उतरांची मिसळणी बरी जाता तेन्ना बरें बाल साहित्य रचून येता.
बरोवचे पयलीं दुसऱ्या लेखकांचीं पुस्तकां वाचूंक गरज. दुसऱ्यांची बरपावळ वाचून तूं गिरेस्त जाता. दुसऱ्याच्या बरपांतल्यान तूं अणभव घेता आनी तांच्या विचारांतल्यान तुजे विचार उंचेल्या दर्जेदार पावतात. दुसऱ्यांच्या अणभवांतल्यान आमची वाड जाता. चुकी घडल्यांत त्यो वाटूंक सोंपे जाता.
व्याकरणाचो वापर नीट रितीन करूया. भुरग्याचें पुस्तक बरयतना सारकें व्याकरण वापरपाची गरज. वाकडें तें तांकां दिल्यार वाडटे पिराये तांच्या मनांत तें छापून उरतलें. आनी तेंच तांकां सारकें दिसतलें. भुरग्यांच्या पुस्तकांत व्याकरणाचो सारको वापर जावंक जाय. ल्हानपणीं जें कितें भुरगें आपणायता, तें तांच्या मनांत उरता देखून सारकें तें तांकां दिवंक दर एका बरोवप्यांची जापसालदारकी.
उगडास उरतात तसलीं पात्रां घालुया. भुरग्यांच्या मनांत सगळेंच उरचें ना. वाचता तें तांच्या मनांत उरपाक भुरग्यांक आवडटा आनी उगडास उरता तसलीं पात्रां तांच्या बरोवपांत येवुदी. बरोवप्यांक आवडटा तें न्हय. पूण भुरग्यांक लक्षांत दवरून भुरग्यांक कितें आवडूंक शकता तें दिवंया.
काणी वाचपी भुरग्यांक तातूंत रिगूंक दिवुया. जेन्ना भुरगें वाचता त्या काणयेंत आपूण रीग घेतलें. तेन्ना बाल साहित्य वाचपाची ओड भुरग्यांच्या मदीं वाडटली. पुस्तक वाचतना त्या बरपावळीं भितर सरूंक फावो. वाचतले काणयेंत भुरगें आपूण एक पात्र कशें रीग घेता. तेन्ना भुरगें वाचपाची कला केन्नाच सोडून दिवंचें ना पूण फुडाराक उमेदीचें वाचपी आनी बरोवपी जातले.
चित्रां मनांतच दवरून बरोवप जावंक दिवुया. भुरग्यांक चित्रां आवडटात. सगळ्या पानांचेर चित्रां घालूंक जायनांत देखून बरयतना चित्रां मनांत दवरून बरोवप जावंक दियात. भुरगीं वाचतना ते बरपावळींतल्यान रचिल्लें चित्र भुरग्यांच्या मनांत येवंक जाय.
संदेस दिवंक चड भर घाली नाकात. बाल साहित्य बरयतना भुरग्यांक जें कितें वाचता तातूंतल्यान संदेस सोदून काडूंक तांकां संद दियात. वाचपांतल्यान तांचे विचार वाडूंक आनी फावो तो संदेस घेवंक तांच्या मनाक भरपूर तांक आसता.
भुरग्यांक मनरिजवण, मज्जा आनी गंमत जाय. वाचपांतल्यान थोडीं भोव मज्जा घेवंक दर भुरग्यांक आवडटा. तांकां गरज तितलें मनरिजवण बरपांतल्यान दिल्यार भुरगीं साहित्या वटेन आर्कक्षीत जातलीं.
भुरग्यांक आपल्या परसय व्हडले पिरायेच्या भुरग्यांचें वाचूंक आवडटा. भुरग्यांक भुरग्यांचीं भास आनी उतरावळ आवडटा. देखून तांचे पिराये परसय व्हड आसात तांचें बरोवप तांकां आवडटा.
भुरग्यांची काणी धाकटी, ल्हान वाक्यांची दवरूंया. भुरग्यांक लांब वाक्यां वाचूंक आवडनात. चड व्हडली काणीय तांकां वाचूंक उबगण येता. देखून तांच्या मनांत वात तें तांकां दिवंक बरोवप्यांन यत्न करूंक फावो.
भुरग्यांक काल्पनीक पात्रां आवडटात. बाल साहित्य बरपांवळींत जितलीं काल्पनीक पात्रां आसतलीं तितलीं भुरग्यांक तीं आवडटलीं आनी बरपांवळ चडान चड भुरग्यां मेरेन पावतली.
भुरग्यां कडल्यान तपासून घेवया. बाल साहित्य छापूंक वच्चे पयलीं तें भुरग्यां कडल्यान एक फावट तरी तपासून घेवन, तांचें आयकून आनी तांचें समजून घेतल्यार भोव फायद्याचें. बाल साहित्य बरपावळ वाडूंक प्रयत्न गरजेचे कित्याक वाचना उदेशीं भुरग्यांची वाड जाता. आकारणी घडून येता. फुडाराक बरे नागरीक ते जावंक पावतात. भुरग्यांचीं उतरांवळ वाडूंक, वाचता तें मनांत दवरूंक, सारकें व्याकरण शिकूंक आनी वाक्यां सारकीं घडोवन हाडूंक भुरग्यांक बाल साहित्य बरपावळ म्हत्वाची. काणयां वरवीं भुरग्यांचे विचार, भावना, कल्पना, सृजनशीलपणां वाडटात. नैतीक वाड भुरग्यांची ल्हानपणांत सावन सारकी जाल्यार भुरग्यांचो फुडार बरो फुलात. नैतीक तत्वां, शेगुण आनी वायट-बऱ्या मदीं अंतर करपाची तांक भुरगेंपणां सावन भुरग्यांच्या सभावांत आकारून हाडूंक बाल साहित्य एक उपाय.
साहित्य भुरग्यांक वेग-वेगळ्या संस्कृती आनी परंपरे वटेन ओडून व्हरता. तांकां जाणविकायेन वाडयता. समाजीक मळार बरोवपांतल्यान भुरग्यांच्या मनांचेर बरो प्रभाव हाडूं येता. दरेका बरोवप्यान भुरग्यांक साहित्य सरशीं लागीं हाडूं येता. भुरगें पळोवन, अदीक शिकता देखून बरोवप्यान पयलो वाचपी जावन तांकां देखीवंत नमुनो जावंक जाय.
भुरग्यांच्य सवें वाचपाचें मन रचून हाडून वाचपाचें वातावरण निर्माण करप, बाल साहित्या पुस्तकां भुरग्यांक उपलब्द करप, वेग वेगळे साहित्याचें प्रकार तांचे मुखार दवरप, काणयो जिवितांत घडटा त्या परिस्थितीक सर करप. काणयो बरोवंक आनी सांगूंक भुरग्यांक संद दिवप, बरोवंक वाचूंक कार्याशाळा वा बाल शिबिरां घडोवन हाडप. तंत्रीक विद्या वरवीं तांकां बरपावळीशीं लागीं हाडप. साहित्य सर्त भुरग्यां पासत घडोवन हाडप. आनी बरपावळींचेर भासाभास जावंक जाय प्राथमीक पावल आसा. बाल साहित्य रचून हाडूंक आनी भुरग्यांक फुडाराक बरे बरोवपी कशे आकारून हाडूंक एक आव्हान स्विकारूया. साहित्य निर्माण करूंक नी साहित्यांतल्यान मनशा कूळ आनी समाज घडोवन हाडूंक दरेका बरोवप्याचें काम आनी जबाबदारी म्हण वळखून घेवुया.

फादर मायरॉन जेसन बार्रेटो