भांगरभूंय | प्रतिनिधी
पणजीः कुळेंच्या मेटावाडो वाठारांतल्या पुला लागसार आशिल्ले न्हंयेंत पेंवपाक देंविल्ल्या वास्को वाठारांतल्या चार तरणाट्यांक बुडून मरण आयलें. दुर्दैवी म्हळ्यार मरण आयिल्ल्यां मदीं चिखली-मुरगांवांतले तीन सख्खे भाव आसात. ही घडणूक बिरेस्तारा 12 जूनाक घडली.
पुलिसांनी दिल्ले म्हायती प्रमाण, वास्को आनी चिखली वाठारांतले पांच तरणाटे आपल्या इश्टां वांगडा कुळें हांगा न्हंयेंचेर पर्यटना खातीर आयिल्ले. न्हंयेच्या पात्रांत पेंवपाचो आनंद घेतना उदकाचो आनी प्रवाहाचो अदमास तांकां येवंक ना आनी ते पांचूय जाण न्हंयेंत बुडपाक लागले. ह्या वेळार तांचेनी मजती खातीर आड्ड्यो मारल्यो. त्यो आयकून थळावे थंय धांवून आयलें आनी एका तरणाट्याक सुरक्षीतपणान उदकांतल्यान भायर काडलो. पूण हेर चार जाणांक ते वाटोवंक शकले ना आनी तांकां बुडून मरण आयलें.
रामन पारसू मदेर (19), लक्ष्मण पारसू मदेर (19) आनी हिरन्ना पारसू मदेर तिगूय रावपी आदर्श नगर, चिखली, मुरगांव आनी विजय साजिली (न्यू वाडो, गणेश मंदीर लागसार रावपी) अशी मरण आयिल्ल्यांची नांवा आसात. कुळें पुलीस फुडलो तपास करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
