भांगरभूंय | प्रतिनिधी
ऑक्टोबरा सावन दितात लोड वाडयल्यार दंड
भांगरभूंय । प्रतिनिधी
पणजी : लोडा प्रमाण वीज बील (डिमांड बेस्ड) घेवपाची कार्यवाही ऑक्टोबर सावन सुरू जाल्ल्यान आतां वीज बील चड येवपाक लागलां. लोड वाडयलो जाल्यार ते प्रमाण दंडाचे रकमेचो वीज बिलांत आस्पाव जावपाक लागला. मान्यताय दिल्ले परस जांणी लोड वाडयला (सँक्शनड लोड) तांकां वीज बिला सयत दंड लागू जाता. हाका लागून खूब जाणांक विजेचीं चड बिलां आयल्यांत, अशी म्हायती खात्याच्या अभियंत्यांनी दिली.
पयलीं जितले युनीट जाताले ते प्रमाण बील येतालें. एक ते शंबर युनिटा मेरेन एक दर आसता, 101 ते 200 युनीट मेरेन वेगळो दर आसता, हे प्रमाण बील येतालें. ऑक्टोबर 2025 सावन वीज बील लागू करपाचे पद्दतींत बदल जालो. डिमांड बेस्ड वीज बिलाची पद्दत लागू जाली, अशी म्हायती खात्याचे संबंदीत साहाय्यक अभियंते मिलिंद देसाय हांणी दिली. विजेची जोडणी दितना थारावीक लोड मंजूर करतात. 1 केडब्लू, 2 केडब्लू असो लोड मंजूर करतात. हो लोड गिरायकाक वाडोवपाक मेळना. लोड वाडोवपाचो जालो जाल्यार घर/ आस्थापनाच्या फिटिंगा प्रमाण फिटींग करपी कंत्राटदारा कडल्यान टेस्ट रिपोर्ट घेवन तो खात्याक सादर करचो पडटा. हाचे खातीर खात्याच्या संबंदीत विभागा कडेन अर्ज करचो पडटा. हे विशींची कळोवणी/ जायरात वीज खात्यान जारी केल्या. विजेची जोडणी घेतले उपरांत खूबशा गिरायकांनी लोड वाडयला, मात ताचे खातीर सोपस्कार करून खात्याची मान्यताय घेवंक ना. घरांनी पयली एक एसी आशिल्लो आतां एसींचो आंकडो वाडयला. आतां खूब जाण इंडक्शन स्टोव वापरपाक लागल्यात. हे भायर इलेक्ट्रीक हिटर आसता. लोड दुपेटीन, तिपेटीन वाडयल्ल्यान आतां बील चड येवपाक लागलां. जितलो लोड वाडयता ते प्रमाण दंड लागू जाता. 1 किलोवॉट (केडब्लू)च्या जाग्यार 3 वा 4 किलोवॉट विजेचो वापर जालो जाल्यार दरेकी किलोवॉटा खातीर दंड लागू जाता. दंडाची रक्कम ही वापर केल्या युनिट दराच्या दुपेटीन लागू जाता, अशें साहाय्यक अभियंते मिलिंद देसाय हांणी सांगलें.
मान्यताय दिल्लो जितलो लोड आसता ताचे तुळेंत कितले पटीन लोड वाडयलो, ताचेर आदारीत दंडाची रकम आसता. हाका लागून चड प्रमाणांत लोड वाडयला तांकां चड दंड लागू जाला. जांणी उण्या प्रमाणांत लोड वाडयला तांकां उणो दंड लागू जाला. जांणी मंजूर जाल्ल्या लोडा इतलीच जांणी वीज वापरल्या, तांकां युनिटा प्रमाण बील आयलां, अशें तांणी सांगलें.
सगल्या राज्यांनी आतां डिमांड बेस्ड (वापरा प्रमाण) बिलाची पद्दत लागू जाल्या. हाचेर उपाय म्हणजे गिरायकांनी खात्या कडेन अर्ज करून चड लोड मंजूर करून घेवचो. गरजेचे सोपस्कार करून लोड वाडोवन घेतलो काय दंड लागू जावचो ना. पयली परस चड बील येतलें मात विजेच्या वापरा इतलेंच तें आसतलें. विजेच्या वापरा परस दंडाची रक्कम चड आसता.
मे म्हयन्यांत एसीच्या वापराक लागून विजेचो वापर वाडटा. हाका लागून दर वर्सा मे म्हयन्यांत चड बील येता. पुराय राज्याचो विचार केलो जाल्यार मे म्हयन्यांत ‘पीक आवर्सा’क विजेची गरज चड आसता, अशी म्हायती खात्या कडल्यान मेळ्ळी. दर एकल्यान लोड वाडयलो जाल्यार ट्रान्सफॉर्मर ट्रीप जावपा सयत हेर तंत्रीक समस्या निर्माण जातात. एका ट्रान्सफॉर्मराचेर जितल्यो जोडण्यो आनी लोड आसता, ते प्रमाण ताची आंखणी जाता. हाका लागून लोड वाडयलो जाल्यार ताची म्हायती खात्याक दिवप गरजेचें आसता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
