भारतीय तारवट्यांची सुरक्षा : राश्ट्रीय हिताचो प्रस्न

भांगरभूंय | प्रतिनिधी

अतिधोकादायक वाठारांतल्यान बोट धाडटना फावोशी सुरक्षा उपाययेवजण, विमा संरक्षण आनी खलाशांक विशेश प्रशिक्षण दिवप बंधनकारक करपाचें.

आखाती प्रदेश, तांबडो दर्या (रेड सी) आनी अरबी दर्या वाठारांत गेल्या कांय वर्सांत वेपारी बोटींचेर हल्ले, क्षेपणास्त्रां- ड्रोन हल्ले आनी चाचेगिरीच्यो घडणुको वाडल्यात. ताका लागून संवसारीक वेपारा वांगडाच हजारांनी भारतीय तारवट्यांचे सुरक्षेचो प्रस्नय गंभीर जाला. भारत हो संवसारांत चडांत चड तारवटी पुरवण करपी देशांतलो एक मानतातता. हजारांनी भारतीय तारवटी विवीध आंतरराश्ट्रीय बोटींचेर काम करतात. (भितर बरेच गोंयकार आसात.) ताका लागून दर्यांतलो कसलोय संघर्श हो भारता खातीर फकत परराश्ट्रीय धोरणाचो विशय उरना, तर तो मानवी जिवीत, रोजगार आनी अर्थवेवस्थेक जोडिल्लो एक म्हत्वाचो मुद्दा थारता.
संवसारांतली सुमार 80 टक्के म्हाल येरादारी दर्या मार्गांतल्यान जाता. भारताच्या आयात- निर्यातीचोय व्हड वांटो ह्याच मार्गांतल्यान जाता. आखाती देशांतल्यान येवपी खनिज तेल, सैमीक वायू आनी हेर गरजेच्यो वस्तू भारताचे अर्थवेवस्थे खातीर म्हत्वाच्यो. ताका लागून ह्या दर्यामार्गांत अडथळे निर्माण जाले, जाल्यार ताचो थेट परिणाम इंधनाच्या दरांचेर, म्हारगायेचेर आनी वेपाराचेर जावंक शकता.
भारतीय तारवटी संवसारांतल्या जायत्या देशांच्या मालकीच्या बोटींचेर काम करतात. बोट खंयच्या देशाचें आसा, खंयचे कंपनीचें वा खंयचो म्हाल व्हरता, हाचेर तांचें नियंत्रण नासता. पूण संघर्शाच्या वेळार सगळ्यांत व्हड धोका तांकांच स्विकारचो पडटा. बोटींचेर हल्लो जाल्यार जायते दीस दर्यांत आडकून रावप, मानसीक तणाव, अपहरण जावपाची भिरांत वा जीव वगडावपाचो धोका तांचे मुखार उबो आसता. जायते फावट तांच्या कुटुंबांकय जायते दीस खात्रीशीर म्हायती मेळना.
हालींच जाल्ले घडणुके विशीं पळोवया. ओमानच्या दर्यादेगे लागसार ‘MT Settebello’ ह्या वेपारी तेलवाहू बोटीचेर अमेरिकन लश्करान कारवाय केले उपरांत तीन भारतीय तारवट्यांचो जीव गेलो. हे टँकर बोटीर 24 भारतीयां सयत 28 कर्मचारी आशिल्ले. अमेरिकेच्या म्हणण्या प्रमाण, बोटीन परत- परत दिल्ल्या सुचोवण्यांक पाळो दिवंक ना आनी ती इराणी तेल येरादारी करता असो दुबाव आशिल्लो. कारवाये उपरांत बोटीचें व्हड लुकसाण जालां. सुरवातेक तीन भारतीय तारवटी बेपत्ता आशिल्ले; उपरांत सोदमोहिमेंत तांच्यो कुडी मेळ्ळ्यो. तातूंत मुख्य अभियंते पटनाला सुरेश, डेक कॅडेट आदित्य शर्मा आनी फिटर शिवानंद चौरसिया हांचो आस्पाव आसा. हे घडणुके उपरांत भारतान खर निशेध नोंदोवन भारतीय तारवट्यांचे सुरक्षेचो प्रस्न आंतरराश्ट्रीय पातळेर मांडला.
पयलींय सोमालियन चाच्यांनी जायत्या वेपारी बोटींचें अपहरण केल्लें. कांय भारतीय तारवट्यांकय ताचें फळ भोगचें पडिल्लें. त्या अणभवांतल्यान भारतान नौदलाची उपस्थिती वाडयली आनी जायत्यो बचाव मोहिमो येसस्वीपणान केल्यो. निमाण्या काळांतय नौदलाने संकश्टांत सांपडिल्ल्या वेपारी बोटींक मदत केल्या. ताका लागून भारतीय नौदलाची तांक आनी तत्परता संवसारान पळयल्या.
तशें आसलें तरी, फकत संकश्ट उपरासले उपरांतूच कारवाय करून जावची ना. भारतान कांय दीर्घकालीन उपाय, येवजण्यो करप गरजेचें आसा. पयली गजाल म्हणल्यार, संघर्शग्रस्त दर्यामार्गांचेर नौदल आनी तटरक्षक दलाची गस्त चड खर करची. इश्ट देशां वांगडा संयुक्त दर्या सुरक्षा वेवस्था विकसित करची. दर्यांतली म्हायती एकमेकांक दिवप आनी गुप्तहेर यंत्रणांत ताळमेळ वाडोवपय गरजेचें आसा.
दुसरी गजाल म्हणल्यार, परदेशी बोटींचेर काम करपी भारतीय तारवट्यांची नोंद आनी आपत्कालीन संपर्क वेवस्था चड सक्षम आसची. संकश्टाच्या वेळार तांच्या कुटुंबांक तत्काळ म्हायती दिवपा खातीर स्वतंत्र नियंत्रण कक्ष सुरू आसचो. परराश्ट्र मंत्रालय, नौकानयन म्हासंचालनालय आनी भारतीय दूतावास हांचे मदीं ताळमेळ वाडोवपय तितलेंच म्हत्वाचें.
तिसरी गजाल म्हणल्यार, बोट कंपनींचेरय कांय बंधनां हाडपाची गरज आसा. अतिधोकादायक वाठारांतल्यान बोट धाडटना फावोशी सुरक्षा उपाययेवजण, विमा संरक्षण आनी खलाशांक विशेश प्रशिक्षण दिवप बंधनकारक करपाचें. भारतीय तारवट्यांक संकश्ट वेवस्थापन, दर्या सुरक्षा आनी आपत्कालीन परिस्थितींत कशी वागची हाचें नियमित प्रशिक्षण दिवंक मेळटा.
ह्या प्रस्नाक फकत सुरक्षा म्हणून न्हय, तर राश्ट्रीय अर्थिक हिताचे नदरेंतल्यान पळोवपाची गरज आसा. दर्यामार्ग सुरक्षित उरले, जाल्यार वेपार सुरक्षित उरतलो आनी वेपार सुरक्षित उरलो, जाल्यार देशाची अर्थवेवस्था चड थीर उरतली. ताचे वांगडाच हजारांनी भारतीय कुटुंबांक पोसपी तारवट्यांकूय सुरक्षित वातावरण मेळटलें.
भारतीय तारवटी हे संवसाराच्या दर्या वेपाराचे शांत सैनिकी आसात. ते शिमेचेर नाशिल्ले तरी, दर्याचे उमाळे सोंसून देशाच्या अर्थिक चक्राक गती दिवपाचें काम करतात. तांचे सुरक्षेची जापसालदारकी फकत सरकाराची न्हय, तर संवसारीक दर्या समाजाचीय आसा. बदलत्या संवसारीक परिस्थितींत भारतान सक्षम नौदल, सक्रीय मुत्सद्देगिरी आनी प्रभावी सुरक्षा वेवस्थेच्या बळग्यार आपल्या तारवट्यांच्या हिताचें रक्षण करप, ही काळाची गरज आसा.