भांगरभूंय | प्रतिनिधी
विजेचो लोड तपासून बिलां तपासपाचे खात्याक आदेश
भांगरभूंय । प्रतिनिधी
पणजी : स्मार्ट मिटराक लागून बिलां चड येवपा सयत काय प्रमाणांत घोळ चालू आसा. सध्या तरी स्मार्ट मिटराची कार्यवाही स्थगीत दवरपाचे आदेश हांवे वीज खात्याक दिल्यात, अशें मुख्यमंत्री डॉ. प्रमोद सावंत हांणी सांगलें. लोड तपासून वीज बिलांची तपासणी करपाचे आदेश मुख्यमंत्र्यान खात्याक दिल्यात.
स्मार्ट मिटराक विरोधी पक्षां सयत हेर संघटणांनी लेगीत हरकत घेतल्या. स्मार्ट मिटराक लागून चड बील आयिल्ल्याच्यो कागाळी आसात. हे फाटभुंयेर स्मार्ट मिटराची कार्यवाही सध्या तरी स्थगीत दवरपाचे आदेश मुख्यमंत्र्यान दिल्यात. विजेचीं बिलां तशेंच स्मार्ट मिटरांचो नियाळ घेवन फुडली कार्यवाही जातली, अशें मुख्यमंत्र्यान म्हणलां.
लोड वाडोवपाच्या दंडाक लागून खूब जाणांक विजेचीं चड बिलां आयल्यात. हणजूणेंच्या लोकांनी बिरेस्तारा मुखेल वीज अभियंत्याक निवेदन दिवपा सयत निशेध केलो. हाचे उपरांत शुक्रारा भौशीक बांदकाम खात्याचे मंत्री तशेंच मडगांवचे आमदार दिगंबर कामत हांचे सयत लोकांनी मडगांव वीज अभियंत्याची भेट घेवन जाब विचारलो. हाचे उपरांत आपणे स्मार्ट मिटराची कार्यवाही स्थगीत दवरपाचे आदेश दिल्ल्याचें मुख्यमंत्र्यान सांगलें. हांवें स्मार्ट मिटराचो पुराय नियाळ घेतलो. जांणी मान्यताये परस लोड वाडयला, तांकां दंड लागू जाला. लोड तपासपा सयत बिलांची तपासणी करपाचे आदेश वीज खात्याक दिल्यात. जांकां चड बिलां आयल्यांत तांणी वीज खात्याच्या संबंदीत विभागांत वचून बिलां तपासचीं. पयलीं एसी नाशिल्ली, आतां एसीक लागून लोड वाडला. एजन्सी तशेंच अभियंत्यां वरवीं लोडाची तपासणी जातली. हाका वेळ लागतलो. दंडाक लागून आयिल्लें चड बील भरलें ना, तरी सध्या विजेची जोडणी तोडचे ना. गिरायकांनी संबंदीत विभागाक भेट दिवन बील तपासचें, अशें मुख्यमंत्र्यान म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
