भांगरभूंय | प्रतिनिधी
एनडीएच्या कार्यकाळांत गोंय तशेंच गोंयकारांकूय जालो व्हड लाव
पणजी : ३७० कलम रद्द करून अखंड भारताचें सपन साकार करप, देश दहशतवाद आनी नक्षलवाद मुक्त करप आनी राम मंदीराचें सपन साकार करप हें प्रधानमंत्री नरेंद्र मोदी हांच्या कार्यकाळांतलीं तीन म्हान कामां आसा. एनडीएच्या फाटल्या १२ वर्सांच्या काळांत गोंयची लेगीत बरीच उदरगत जावपा सयत गोंयकारांकूय लेगीत बरोच लाव जालो, अशें तांणी सांगलें.
देशहिता खातीर ह्या देशांत ‘दो विधान, दो निशान आनी दो प्रधान’ आसप योग्य नाशिल्लें. हाचे खातीर प्रधानमंत्री नरेंद्र मोदी हांणी ३७० कलम रद्द करून जम्मू काश्मिराक भारताच्या मुखेल प्रवाहांत हाडलें. देशांतलो नक्षलवाद आनी आतंकवाद लेगीत तांणी सोपयलो. तशेंच राम मंदीराची उबारणी करून कोट्यांनी जनतेचें सपन पुराय केलें, अशें मुख्यमंत्र्यांनी सांगलें.
प्रधानमंत्री नरेंद्र मोदी हांच्या फुडारपणाखाला सरकाराक १२ वर्सां पुराय जालीं. दिल्लींत जाल्ले परिशदेक हाजेरी लायले उपरांत मुख्यमंत्री डॉ. प्रमोद सावंत हांणी शुक्रारा गोंयांत येतकच पत्रकार परिशद घेतली. उदका पुरवण खात्याचे मंत्री सुभाष शिरोडकार, वीज मंत्री सुदिन ढवळीकार आनी येरादारी खात्याचे मंत्री मॉविन गुदिन्हो ह्या वेळार हाजीर आशिल्ले.
केंद्र सरकारान फाटल्या १२ वर्सांत देशांत राबयल्लीं उदरगतीचीं कामां तशेंच विवीध कल्याणकारी येवजणेंची उपलब्धी मुख्यमंत्र्यांनी सादर केली. फाटल्या १२ वर्सांत देशांत ७० लाख कोटींची थेट विदेशी गुंतवणूक (एफडीआय) जाल्या. विमानतळांचो आंकडो दुपेटीन वाडोवन वैजकी म्हाविद्यालयांचो आंकडो ८४२ वेल्यान २१००चेर पावला. २००४ ते २०१४ मेरेन राज्यांक २०७६ कोटींचो निधी शुल्काच्या रूपांत मेळिल्लो. फाटल्या १२ वर्सांत ११८१२ कोटींचो निधी शुल्काच्या रूपांत राज्यांक मेळ्ळा.
गोंयांक जाल्लो लाव
आखाती झूझ आनी हेर कांय गजालींक लागून पेत्रोल, डिजेलाच्यो किमती वाडल्या तरी पूण आयकरांत सूट मेळपाच्या येणावळींत वाड तशेंच हेर सवलती सामान्यांक सरकारान दिल्या, अशें मुख्यमंत्र्यांनी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
