भांगरभूंय | प्रतिनिधी
मडगांव : वीज गिरायकां जितली लायट वापरतात, तितल्याय युनिटाचे पयशे दितात. ते वीज खात्याची आनीक कसलीच रक्कम दिवपाचे नात. ते विजेची चोरी करिनात. तांकां लोड वाडिल्ल्याची म्हायती दिवंक नाशिल्ल्यान तांचे कडल्यान दंड वसूल करप चुकीचें आसा, अशें मत मंत्री दिगंबर कामत हांणी उक्तायलें.
मंत्री दिगंबर कामत हांणी मतदारसंघांतल्या नागरिकां सयत वीज खात्याच्या अधीक्षक अभियंता राजीव सामंत हांची भेट घेतली. ह्या वेळार वाडिल्ल्या बिलांचो प्रस्न चर्चेक आयिल्लो.
कामत हांणी सांगलें, विजेचो लोड दर पांच वर्सांनी तपासून , ते प्रमाण अर्ज भरुन तो वाडोवन घेवन गरजेचें आशिल्लें. मात सर्वेक्षण करिनासतना दर वाडी सयत लोड वाडिल्ल्या ताचेवेल्या दंडाची रक्कमूय लायल्या. जाचें वीजबिल ७०० रुपया येतालें, तें आतां अडेज हजारां परस चड येता.
अशे तरेन गिरायकांक त्रास दिवपाक शकनात. आमी बरें सरकार दिवपा खातीर कटिबध्द आसात. वीज खात्याचे अभियंता कितेंय करतले आनी आमी ओगीच बसपाचें काय? हो प्रस्न आसा.
मडगांवच्या वीज गिरायकांक जीं वीज बिलां दिल्यांत. त्या सगल्या बिलांनी दंडाची रक्कम लायल्या. हो दंड विजेचो वापर वाडिल्लो आसतनाय तांनी लोड वाडोवन घेवंक नाशिल्ल्यान लायला. सगल्यांच्या घरांतलो विजेचो लोड काळा प्रमाण वाडतूच आसता. वीज खात्यान पांच वर्सांतल्यान एकदां दरेका घराच्या वीज मिटराची तपासणी करुन लोड तपासणी करपाची गरज आसा. तेन्ना त्या गिरायकाक ह्यान पयलींचो लोड अनी आतां वापरपी लोडाची म्हायती दिवन अर्ज करुन लोड वाडोवन घेवपा विशीं ही म्हायती दिवपाक जाय. तांचे कडेन कर्मचारी आनी वेळ ना. फकत कागाळ आयले उपरांत ते तपासणी करतात, अशें सांगलें.
मंत्र्यांनी वीज बिलांची रक्कम भरपा खातीर टप्प्याटप्प्यान भरपाची वेवस्था करतले, अशें म्हणलां. मात हो पर्याय योग्य ना, जाल्यार वीज गिरायकांचेर लायिल्ली दंडाची रक्कम ही चुकल्या, अशें म्हजें वयक्तीक मत आसा. आमी मुख्यमंत्र्यां कडेन चर्चा केल्या, भाजप प्रदेशाध्यक्षां कडेनूय चर्चा करतले आनी दंडाची रक्कम घेवप हें अन्यायी आशिल्ल्याचें सांगतले, अशेंय तांणी स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
