भांगरभूंय | प्रतिनिधी
मडगांव : दक्षीण गोंयच्या जिल्लो आनी सत्र न्यायाधीश- ३ तशेंच अतिरिक्त सत्र न्यायाधीश म्हणून कार्यरत आशिल्ल्या आनी सध्या मुंबय उच्च न्यायालयाच्या कोल्हापूर खंडपीठांत विशेश कार्य अधिकारी म्हणून कार्यरत आशिल्ली डॉ. शबनम शेख हांणी कायद्यांतली डॉक्टरेट (पीएच.डी.) मेळयल्या.
तांणी ‘गोंयच्या लग्नांतल्या वादांच्या समाजीक- कायदेशीर आंगांचो एक चिकित्सक अभ्यास’ ह्या विशयाचेर संशोधन करून २ मे दिसा पीएच.डी. पदवी घेतली. ह्या संशोधन कार्या खातीर तांकां व्ही. एम. साळगांवकर कायदो महाविद्यालयाचे प्राचार्य डॉ. प्रा. शब्बीर अली, कर्नाटक विद्यापीठ, धारवाडच्या कायदो विद्याशाखेचे प्रा. विश्वनाथ एम., तसेच साळगांवकर महाविद्यालयांतले प्रा. किम रोचा हांचें मार्गदर्शन मेळ्ळें. तांच्या कुटुंबांनूय डाॅ. शेख हांच्या ह्या शिक्षणीक प्रवासांत म्हत्वाची साथ दिली.
डॉ. एन. कोलवाळकार हांणी ह्या संशोधना खातीर आंतरीक मार्गदर्शक म्हणून मोलाचें योगदान दिलें. डॉ. शबनम शेख हांच्या ह्या शिक्षणीक येसाक लागून न्यायवेवस्था आनी विवीध मळावेल्यान तांकां परबीं भेटयतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
