भांगरभूंय | प्रतिनिधी
पणजी : गोवा लोकसेवा आयोगा वतीन (जीपीएससी) विवीध खात्यांत ३६ सुवातांचेर भरती करतले.
हातूंत भलायकी खात्यांतल्या २४ सुवातांचो आसपाव आसा. जाल्यार तंत्र शिक्षण खात्यांतले, उच्च शिक्षण, खाण खात्यांतल्या दरेकी ४ सुवातांचेर भरती करतले. सगल्या सुवातां खातीर आयोगाचे वेबसायटीचेर ऑनलायन पद्धतीन अर्ज करपाची निमाणी मुजत २६ जून २०२६ मेरेन आसा. उमेदवारांनी अर्ज भरचे पयलीं आयोगाच्या वेबसायटीवेल्यो सगल्यो सुचवण्यो वाचप गरजेचें आशिल्ल्याचें आयोगान स्पश्ट केलां.
भलायकी खात्यांत होमिओपॅथी डॉक्टरांच्या १५ सुवातांचेर भरती करतले. हातुंतल्यो ८ सुवातो अनारक्षीत आसात. हाका लागून होमिओपॅथी विशयांतल्या वर्सांची पद्वी, केंद्रीय वा राज्य संस्थेकडेन नोंदणी तशेंच तीन वर्सांचो अणभव आसप गरजेचें आसा. हे खातीर पे मॅट्रिक्स १० प्रमाण वेतन दितले. आयपीएचबींत सहाय्यक फार्मासिटिकल केमिस्टच्या एक तर सायकीयाट्रिक नर्सिंग विशयाच्या सहाय्यक प्राध्यापक पदा खातीर भरती करतले. तशेंच सायकीयाट्रीक समाजीक कार्य विशयाच्या सहाय्यक प्राध्यापकांच्यो दोन सुवातो भरतले.
दंत महाविद्यालयांत ओरल पॅथॉलॉजी विशयाच्या लेक्चरर पदा खातीर एक तर भलायकी विभागांत विवीध तीन विशयांच्या सहाय्यक प्राध्यापकांची दरेकी एक आनी वरिश्ठ मानसोपचार तज्ञाची एक सुवात भरतले.
सरकारी महाविद्यालयांत भुगोल, वाणिज्य आनी अर्थशास्त्र विशयाच्या सहाय्यक प्राध्यापकाची दरेकी एक सुवात भरतले. सरकारी पॉलिटेक्निकांत अन्न तंत्रज्ञान, सिव्हिल आनी मॅकानिकल अभियांत्रिकी विशया खातीर दरेकी एका लॅक्चराची भरती करतले. जाल्यार खान खात्यांत सहाय्यक अभियंता, जिओलॉजिस्ट आनी कायदो अधिकार्यांची भरती करतले.
सगल्या पदां खातीर अर्जाचे शुल्क ऑनलायन वा ऑफलायन पद्धतीन भरले उपरांत अर्ज गृहीत धरतले अशें आयोगान स्पश्ट केलां. आयिल्ल्या अर्जांची छाननी करून फुडली भरती प्रक्रिया करतले, अशें आयोगान स्पश्ट केलां.
अपवाद सोडल्यार सगल्या पदां खातीर कोंकणी भाशेचें ज्ञान आसप गरजेचें. चडश्या पदां खातीर पिराय मर्यादा ४५ वर्सां आसतलीं. ह्या भरती प्रक्रिये विशींची तपशीलवार म्हायती आयोगाचे वेबसायटीचेर उपलब्ध आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
