भांगरभूंय | प्रतिनिधी
नाजाल्यार मंत्र्याच्या घराचेर मोर्चा
पणजी : मंजुरी परस चड भार (इलेक्ट्रिसीटी ओव्हरलोड) वापरिल्ले खातीर वीज खात्यान गिरायकांक दंड लायला. हाका लागून ह्या म्हयन्यांत सगल्यांकूच चार पटींनी चड बिलां आयल्यांत. वीज मंत्र्यांनी दंड तीन हप्त्यांत भरपाची मेकळीक दिल्ल्याचें सांगलां. मात हो दंड पुरायेन माफ करप तशेंच हेर प्रकिया पुराय करपा खातीर तीन म्हयन्यांचो काळ दिवप गरजेचें. हे विशीं मंत्र्यांनी आयज सांजेवेळार मेरेन घोशणा केली ना जाल्यार फाल्यां तांच्या घराचेर मोर्चा व्हरतले अशें आप प्रदेशाध्यक्ष वाल्मिकी नायक हांणी सांगलें. शुक्रारा पणजे जाल्ले पत्रकार परिशदेत ते उलयताले.
नायक हांणी सांगलें, वीज गिरायकांनी नवी जोडणी घेतली तेन्ना थारावीक वीज भार मंजूर केल्लो. मात फाटल्या २० ते २५ वर्सांनी हातूंत नक्की बदल जाला. कुटूंब वाडलें, लायटीचीं उपकरणांय वाडलीं. हाका लागून आतांचो वीज वापर वाडला. अतिरिक्त भार वापरिल्ल्यान खात्याचें अर्थीक लुकसाणूय जावंक ना. दंड लावचे पयलीं गिरायकां मदीं जागृती करप गरजेचें आशिल्लें. हो एके तरेन खंडणी वसूल करपाचो प्रकार आसा. हाचो आमी निशेध करतात.
फाटल्या पांच वर्सांच्या काळांत खात्यान नवे बदल लागू केल्यात. अनालॉग वेल्यान डिजिटल मिटर करप, विवीध शुल्क वाडयिल्ल्यान बिलां अदीक येतात. वयल्या काळांत खात्याचो महसूल ३३ टक्क्यांनी वाडला. हाचे मजगतीं गिरायकांचो आंकडो ३३ टक्क्यांनी वाडला काय? हें खात्यान स्पश्ट करचें. भाजपचें उदरगतीचें मॉडेल हें फकत जनतेक फटोवपाचें आसा. आप मॉडेलाक लागून पंजाब, दिल्लींत ३०० युनिट वीज फुकट दितात. भाजप सरकार जनतेच्या पयशांचा अपव्यय करता, असो गंभीर आरोपुय वाल्मिकी नयाक हांणी केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
