भांगरभूंय | प्रतिनिधी
खबरां संस्था
दुबयः भारताचो आदलो कॅप्टन विराट कोहलीन आनीक एक संवसारीक विक्रम आपल्या नांवार केला. पाकिस्ताना आडचे टी-20 मॅच खेळनू क्रिकेटीच्या तिनूय फॉर्मेटांत 100 मॅची खेळपी तो संवसारांतलो दुसरो आनी भारतांतलो पयलो खेळगडो थारला. पाकिस्ताना आड ताची 100वी टी-20 मॅच आशिल्ली. न्यूझिलंडाचो आदलो बॅट्समन रॉल टेलर हाणे हो विक्रम केल्लो.
संवसारीक पांवड्यार आतां मेरेन 13 खेळगडे 100 व त्या परस चड टी-20 मॅची खेळ्ळ्यात. तिनूय फॉर्मेटांत 100 मॅची खेळपी टेलर आनी विराट आसात. कोहलीन 12 जून 2010 दिसा झिम्बाब्वे आड टी-20 मॅचींत भारता वतीन पदार्पण केल्लें. आतां मेरेन 50.12चे सरासरीन ताणे 3308 धांवड्यो केल्यात. आंतरराष्ट्रीय टी-20 मॅचींत सगल्यांत चड धांवड्यो करपी खेळगड्यांचे वळेरेंत विराट तिसरे सुवातेर आसा. विराट फाटल्या मार्च म्हयन्यांत मोहाली हांगा श्रीलंके आड 100वी टॅस्ट मॅच खेळल्लो. ताणे 262 वन-डे मॅचींत 12,344 धांवड्यो केल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
