भांगरभूंय | प्रतिनिधी
कोल्हापूर : ‘दक्षिण काशी’ म्हणून वळख आशिल्ल्या कोल्हापूरच्या देवी श्रीअंबाबाई देवळाच्या मुखेल तेमकाचेर सुमार अडेज कोटी रुपयांचो शुद्ध भांगराचो कळस बिरेस्तारा मध्यान रातीं कडक बंदोबस्तांत आनी शास्त्रोक्त पद्धतीन बसयलो.
अदीक मासांतल्या दानाक हिंदू धर्मांत विशेश म्हत्व आशिल्ल्यान ह्या निमतान हो देड कील वजनाचो भांगराचो कळस गोंयच्या एका आदल्या मुख्यमंत्र्यान देवीच्या पांयां कडेन अर्पण केल्ल्याची म्हायती महाराष्ट्रांतल्या खबरां पत्रांनी दिल्या. धर्मीक परंपरेचें पावित्र्य राखून, शुक्रारा सकाळीं विशेश मंत्रांनी आनी धर्मीक विधी करून ह्या कळसाची पुजा केली.
पावसाच्या उदकाक लागून देवळाच्या मूळ फातराच्या तेमकाचेर पावसाचें उदक सांठून उरचें न्हय आनी ते बरे तरेन व्हांवून वच्चें म्हूण कळसाचेर तांब्याचें संरक्षण बसोवपाची संकल्पना देवस्थान समितीन मुखार हाडिल्ली. ह्याच काळांत गोंयच्या एका भक्तान भांगराचो कळस दान करपाची इत्सा उक्तायिल्ल्यान हे मोहिमेक ‘भांगरा’च्या सुवाळ्याचें रूप मेळ्ळें. देवळाच्या मूळ वास्तुकलेचो तोल राखप हें सगल्यांत व्हड आव्हान आशिल्लें.
सुमार स फूट उंचायेच्या ह्या इतिहासीक मुखेल तेमकाची प्राचीन वास्तुरचणूक आनी ताचो परीघ लक्षांत घेवन मंगळुरूच्या कुशळ कारागिरांनी ह्या कळसाची निर्मिती केल्या. मुखेल कळसाक भितरल्यान आधार दिवपा खातीर आनी पावसाच्या उदकाचो संपर्क जावचो न्हय म्हूण २०० किल वजनाचें तांब्याचें गोल आवरण तयार केल्लें. हें पुराय काम नाजूक आनी आव्हानात्मक आशिल्लें. कारण देवळाच्या मूळ हॅरिटेज वास्तूक कसलेच तरेचें लुकसाण करिनासतना हो कळस बसोवपाचे आशिल्ले.
बिरेस्तारा रातच्या सुमार ८ वरांचेर ‘कळसारोहण’क सुरुवात जाली. रातच्या वेळार देवळांतल्या भाविकांची गर्दी उणी जाले उपरांत ‘हेवी- ड्यूटी क्रेनी’चे मजतीन हो जड तांब्याचो सांचो आनी उपरांत भांगराचो कळस देवळाच्या पांख्यार व्हेलो. थंयच्यान क्रेनीचे मजतीन मुखेल तेंमकाच्या वयल्या टोकाचेर तो बसयलो. कळसाक कसलोच धोको निर्माण जावचो न्हय म्हणून सेफ्टी बेल्ट्स आनी आधुनीक साधनांचो वापर केल्लो.
पश्चीम महाराष्ट्र देवस्थान समितीचे सचिव शिवराज नायकवडी हांचे देखरेखी खाला सुमार ४० तांत्रीक कर्मचारी आनी कामगारांचो पंगड हे मोहिमे खातीर रातभर कार्यरत आशिल्ले. कांसव मंडपावेलें कळसाचें पयलें आवरण रातच्या सुमार एक वरांचेर पुराय जाले उपरांत मुखेल तेमकावेलें काम सकाळ मेरेन पुराय केलें. ह्या भांगराच्या कळसाक लागून अंबाबाई देवळाचें इतिहासीक वैभव आनी सौंदर्य आतां आनीक फुल्लां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
