भांगरभूंय | प्रतिनिधी
काळ बदलता तशें तंत्रज्ञान बदलता. एका काळार गोंयकारांक लायट लागताली ती बल्ब, ट्यूबलायट पेटोवन घरांत उजवाड करपाक. मागीर फॅन, मिक्सर, फ्रीज, टिव्ही आयले. आतां संगणक, एसी, कुलर, ई गाडी, मोबायल फोन, ई शेगडी, ओवन, वाॅशिंग मशीन, डीश वाॅशर, उदकाचो पंप, फॅर्र, हेर ड्रायर, गीझर आनी हेर बऱ्याच उपकरणांक वीज लागता. देखून 10 मिनटां पसून लायट गेल्यार हालींचे गोंयकार वयर सकयल जातात. फ्लॅट, घरांय तेर्रासाचीं जाल्ल्यान फॅन, एसी बगर रावप शक्य ना. सांगपाचें म्हणल्यार, वीज आधुनीक जिविताचो एक मुळावो घटक जाला. सगलेच वीज वापरतात. बिलूय भरतात. म्हणटकच तांकां अचूक बील, पारदर्शक दर रचणूक, 24 वरां विस्वासार्ह सेवा मेळप गरजेचें. विजेची निर्मिती, खरेदी, वितरण वेवस्था, सरकारी अनुदान हाचेरुय खर्च जाता. म्हारगाय आनी हेर खर्च खूबच वाडला. ताका लागून वीज आनी अर्थीक शिस्त हांचे मदीं समतोल सांबाळूंक जाय. ही सरकारा वयली जापसालदारकी. नागरिकांनी विजेचो वापर कटकसरीन करप ही सगल्यांचीच लागणूक. घरांतलो फॅन जावं वा रस्त्या वयली ट्यूबलायट गरज नासतनाय पेटत उरता, हें चुकीचें. विजेची बचत करप म्हणजे फक्त बील उणें करप न्हय, तर देशाची उर्जा सुरक्षीत दवरप!!
हणजूणकारांनी काल आंदोलन केलें. वीज बिल वाडोवन वीज खातें लोकांक पेजेक लायतलें, असो आरोप करून पणजे कार्यालया भायर सगले पेज जेवले! सदचे परस तिपटीन बील आयलां, असो तांचो आरोप. थारायिल्ले मर्यादे परस चड वीज वापरली म्हूण दंड वसूल केला, अशेंय तांणी सांगलें. वी खात्याचें म्हणणें, आमी सगलें कायद्यान केलां. खात्यान तो दंड माफ करून उरिल्लें बील भरपाक दोन म्हयन्यांचो काळ दिवचो, अशी हणजूणकारांची मागणी. बील भरूंक ना म्हूण कनेक्शन तोडल्यार आंदोलन करतले, अशी शिटकावणीय तांणी दिल्या. आतां घडये हेर कडल्यानूय अश्योच कागाळी येवपाक शकतात. स्मार्ट मिटराकूय एकेक गांव विरोध करीत आसा. ह्या सगल्या प्रकरणां फाटल्यान मूळ कारण आसा, तें बिलाचे दुडू. लायटीचो आपालिपा चालूच आसता, बिलांची रक्कम मात केन्ना उणीं येना, अशेंय तांचें म्हणणें.
अतिरिक्त वीज भार वा इलेक्ट्रीक ओव्हरलोड म्हणल्यार मिटराचेर थारावन दिल्ले तांकी परस चड वीज वापरप. देखीक, एखाद्या घराक पांच किलोवॅट लायट थारायल्या आनी थंय एसी, गिझर, इंडकशन, मोटर आनी हेर उपकरणां चालू केल्लान वापर आठ किलोवॅटा मेरेन गेलो, तर तो अतिरिक्त वीज भार. ओव्हरलोडाक लागून मिटराचें लुकसाण जावं येता, फ्यूज वता, एमसीबी ट्रीप जाता. उपकरणां इबाडूं येतात, वीज वितरण वेवस्थेचेर लोड येवंक शकता. ट्रान्सफाॅर्मराचेर लोड येता. ताका उजो बी पेट्टा तो हाकाच लागून. ते खातीर कनेक्शन घेतना पयलींच लोड वाडोवन घेवंक जाय. वायरींग दर्जेदार जाय. एकाच वेळार उपकरणां वापरूंक जायनात. वीज खात्यानूय आपलीं उपकेंद्रां वाडोवपाक जाय. वायरी आनी हेर उपकरणां आधुनिक करपाक जाय. अंडरग्रावंड केबल घालपाचें काम बऱ्याच शारांनी पुराय जावपाचें आसा. कोण वीज चोरता, विकता जाल्यार ताका दंड घालपाक जाय. हातूंत सामान्य गिरायकां परस व्हडले ठकसेनूच चड आसतले. कांय वर्सां पयलीं एकल्याचेर आरोप जाल्ले. केशूय जाल्ली. मात उपरांत तो पावन जालो!!
वीज खातें कसले चार्जीस, ड्युटी, सेस बिलांत लायता, ताचेर तशेंच स्मार्ट मिटरांचेर खाशेली ग्रामसभा घेवप गरजेचें. मतदारांक आकर्शित करपाक तरातरांच्यो सवलती, अनुदान, येवजण्यो (रेवड्यो) दितात, तातूंत थोडी कपात करून तो पयसो वाटायल्यार, वीज बिलां इल्लीं तरी सवाय करपाक मेळटलीं.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
