भांगरभूंय | प्रतिनिधी
कृष्णायण
(ते रातीं कडेन पांडव उपप्लाव्य नगरांत रावले आनी झुजाच्यो गजाली करीत करीत न्हिदले…. आतां मुखार…)
पांडव जेन्ना दुर्योधनाक सोदपाक तळ्या वटेन गेल्ले त्याच वेळार अश्वत्थामा कृपाचार्य आनी कृतवर्मा तळ्यांत उबो राविल्ल्या दुर्योधनाक ‘परत झुजाच्या मळार यो’ अशें सांगतालें. पूण तो तांचे सांगणें आयकुपाचे मनस्थितींत नाशिल्लो. इतल्यांत तांच्या कानांर रथांच्या चाकांचो आवाज पडलो. दुर्योधनाक सोदीत पांडव थंय पावले काय कितें असो विचार तांच्या मनांत आयलो. ते सगले भियेले. अश्वत्थामा, कृपाचार्य आनी कृतवर्मा थंय सावन बेगिबेगीन फासळ्ळे. पयस वचून लिपून रावले. दुर्योधन आनीक मात्सो पयस खोल उदकांत वचून उबो रावलो.
कांय वेळान पांडव थंय पावले, मागीर भीम आनी दुर्योधन हांचे मदीं झूज जालें. भीमान आपले गदेन दुर्योधनाच्यो दोनूय मांडयो चेंचून उडयल्ल्यो. शेवटाक भीम दुर्योधनाचे तकलेर गदेचो धपको घालून ताका मारून उडोवपाक सोदतालो. पूण कृष्णान ताका तशें करूंक दिलें ना. दुर्योधनाक तसोच अर्द मेल्ल्या स्थितींत सोडून ते थंय सावन आपल्या शिबिरांत गेले. पांडव पयस पावले हाची खात्री जातकच सगळे पळयत आशिल्ले अश्वत्थामा, कुपाचार्य आनी कृतवर्मा धांवत धांवत दुर्योधना कडेन आयले. येदो व्हडलो दुर्योधन, हस्तिनापूर राज्याचो युवराज एका तळ्याचे कुशीक धुळींत लोळत पडिल्लो. ताच्यो मांडयो फोडून उडयल्ल्या कारणान ताका आपले सुवाते वयल्यान हालुकूय मेळनाशिल्लें. तो व्हडल्या- व्हडल्यान पिरंगतालो. तो चड काळ जगत अशें दिसनासलें.
दुर्योधनान तांकां पळोवन म्हणलें, ‘पळयात, पळयात त्या भीमान म्हाका कसो अधर्मान मारला तो! भीष्माक, द्रोणाचार्याक, कर्णाक ह्या सगळ्यांक पाडवांनी अधर्मान सोंपयल्यांत. म्हाका असली तिडक येता म्हणून सागूं? पूण कितें करतलो. म्हजी अशी ही दशा जाल्या. अश्वत्थाम्या, आतां हांव तुका म्हज्या उरिल्ल्या सैन्याचो मुखेल म्हणून नेमता. तुज्या वांगडा ह्या दोगांकूय घे आनी त्या पांडवांक जल्माची बुद्द शिकय.’
अश्वत्थाम्यान मागीर ताका म्हणलें, ‘दुर्योधना, तू कांयच हुस्को करू नाका. म्हाकाय तांकां बुद्द शिकोवपाकूच जाय. म्हज्या निशस्त्र बापायक तांणी मारुन उडोवंक ना? तांणी अधर्म केला न्ही, आतां आमी लेगीत तांकां अधर्मानूच सोंपोवपाक जाय. येतां आमी!’ अशें म्हणून अश्वत्थामा, कृपाचार्य आनी कृतवर्मा हांकां घेवन थंथ सावन गेलो.
ते कुरुक्षेत्राचेर पावता म्हणसर काळोख जालो. आता कितें करपाचें तें दुसऱ्या दिसाच करपाक मेळटलें असो विचार करून तांणी थंयच एका झाडा पोदां न्हिदपाचें थारायलें. कृपाचार्य आनी कृतवर्मा हांकां रोखडीच न्हीद लागली. पूण अश्वत्थाम्याक झेम पडली ना. दुर्योधनाक सांगिल्ल्या प्रमाण पांडवांक कसो धडो शिकोवपाक मेळटलो हाचोच तो विचार करतालो. सरळ मार्गान पांडवांक मारपाक जमचें ना हें ताका खबर आशिल्लें. ताणें आडमार्ग पत्करपाचो थारायलें. रातच्या वेळार पांडवांच्या शिबिरांत घुसप आनी तांकां न्हिदल्यांत थंयच मारून उडोवप अशें तांच्या मनांत आयलें. ताणें बेगिबेगीन कृपाचार्य आनी कृतवर्मा हांकां आपली येवजण सांगली. अश्वत्थाम्यान सांगिल्ले त्या दोगांकूय मान्य नाशिल्लें. पूण दुर्योधनान अश्वत्थाम्याक तांचो मुखेल केल्लो तेन्ना तो सांगता तें करपाक तांकां राजी जावचेंच पडलें.
तांणी आनीक कळाव केलो ना. ते तशेंच पांडवांच्या शिबिरा वटेन गेले. आपले रथ ताणीं मात्शे पयसूच दवरले. शिबिरांत सामसूम आशिल्ली. दुर्योधन मेलो, झूज सोपलें, पांडवांक जैत मेळ्ळें हे खोशेन, सगल्यांक ते रातींक सुस्त न्हीद लागिल्ली. अश्वत्थाम्यान कृपाचार्याक शिबिराच्या दारार दवरलो, दारांतल्यान भायर वतल्या दरेकाक मारून उडय अशें ताका सांगून तो भितर सरलो. पांडव उपप्लाव्य नगरांत गेल्यांत हें अश्वत्थाम्याक खबर नाशिल्लें. शिबिरांत भितर सरतकच तांकां मशालींच्या उजवाडांत, धृष्टद्दुम्न, शिखंडी आनी द्रौपदीचे पांचूय पूत न्हिदिल्ले दिसले. हरशी म्हणून आपल्या बापायक धृष्टद्युम्नान मारिल्लो हाचो राग अश्वत्थाम्याक आशिल्लोच. ताणें आनीक वेळ काडलो ना. ताणें दृष्टद्युम्नाची गोमटी आंवळून ताचो जाग्यारूच जीव काडलो. इतले म्हणसर शिखंडी जागो जालो.
मुखार चलता….
अनिल नायक
9049079789
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
