भांगरभूंय | प्रतिनिधी
मडगांव : जे कॉंग्रेसी वांगडा केन्नाच नाशिल्ले, तांकां फकत वेंचणुकेच्या तोंडार पक्षात घेवन तिकेट दिवपाची पद्दत पुरायेन चुकीची आसा. पयशे दिवन- घेवन तिकेटी विकल्यार, वेंचून आयले उपरांत परत पक्षांतराचो भंय कायम उरतलो. हाका लागून येवपी वेंचणुकेंत मूळ आनी निश्ठावंत कॉंग्रेस वावुरप्यांकूच तिकेट मेळपाक जाय, अशी मागणी ज्येश्ठ वकील राधाराव ग्रासियस हांणी केली.
मडगांवां घेतिल्ले पत्रकार परिशदेत अॅड. ग्रासियस हांणी कॉंग्रेसीचे सध्याचे कार्यपद्धतीचेर खर उतरांनी टिका केली. तांणी म्हणलें, तामिळनाडू विधानसभा वेंचणुके वेळार प्रभारी आशिल्ल्या फुडार्यां आड खासदार ज्योती मणी हांणी सरळ थेट पक्षाच्या वरिष्ठ नेतृत्वा कडेन कागाळ केल्ली. वेंचणुकेंत निश्ठावंत कार्यकर्त्यांक भायर मारून नव्या उमेदवारांक संद दिली आनी हे पुराय प्रक्रियेंत व्हडा प्रमाणाचेर भ्रश्टाचार जाल्ल्याचो दुबाव तांणी पत्रांत उक्क्तायिल्लो. गोंयांतूय कॉंग्रेसीन अशोच चुकीच्यो पद्दती दुरुस्त करप गरजेचें आसा.
अॅड. ग्रासियस हांणी मुखार उलयतना लोकसभेचा दाखलो दिलो. राज्यांत लोकसभा वेंचणुकेच्या वेळार कॅप्टन विरियातो फर्नांडीस हांकां जनतेचें व्हड फाटबळ आशिल्लें. कॉंग्रेसीन एका योग्य उमेदवाराक संद दिल्ल्यान ते बर्याच मतांनी वेंचून आयले. गोंयचे राजकी स्थितींत जर खर्यांनीच बदल घडोवन हाडपाचो आसल्यार कॉंग्रेसीक आपल्या संघटनात्मक रचणुकेंत आनी कार्यपद्धतींत बेगबेग बदल करपाची गरज आसा. कॉंग्रेस सध्या पयल्या नंबराचो पक्ष जावपाचे सर्तींत आसूनय, भितरल्या गटबाजी आनी चुकीच्या निर्णयांक लागून कितेंच करिना अशी खंत तांणी उक्तायली.
तशेंच तामिळनाडू आनी पॉंडिचेरी (पुद्दुचेरी) वेंचणुके वेळार सोशल मिडिया मोहिमेचें कंत्राट भायले एजन्सीक दिल्लें. थंयचे थळावे परिस्थितीची कसलीच म्हायती नाशिल्ल्या गोंयचे कंपनीक साडेचार कोटी रुपयांचें हें कंत्राट दिलें. पक्षा खाला फकत केवळ एक ‘रॅकेट’ सुरू आशिल्ल्यान, राज्यांतल्या कॉंग्रेस कार्यकर्त्यांनी आतां आपल्याच पक्षांतल्या ह्या बोवाळाच्या आनी दुबावी कारभारा आड आवाज काडपाची गरज आसा, असोय उलो तांणी मारलो.
वेंचणुको लागीं पावले उपरांत कॉंग्रेसच्यो तिकेटी पोरण्या कार्यकर्त्यांच्या जाग्यार नव्यान पक्षांत येवप्यांक मेळपाची शक्यताय अॅड. ग्रासियस हांणी उक्तायली. पक्षा खातीर राबपी कार्यकर्त्यांक सध्या योग्य सन्मान मेळना आनी तांचे म्हणणेंय आयकून घेनात. पयशांचे दिवन-घेवनूच तिकेटी दितात, अशी सर्वसामान्य जनतेची भावना जाल्या. कॉंग्रेसीन ह्या जनभावनांचा आदर राखून वेळार पावलां उखलचीं, अशें अॅड. ग्रासियस हांणी स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
