भांगरभूंय | प्रतिनिधी
पणजीः रेंट अ कॅबाक लागून राज्यांत अपघातांची माळ सुरू जाले उपरांत येरादारी खात्याक जाग आयल्या. रेंट अ कॅब तशेंच टॅक्सीनी आशिल्लो स्पीड गव्हर्नर निश्क्रीय करून दवरिल्ल्याचें खात्याचे नदरेक आयलां. स्पीड गव्हर्नर बसोवपा विशींचें उल्लंघन नदरेक आयल्यार ख्यास्तीची कारवाय करपाचे निर्देश येरादारी संचालनालयान दिल्या.
सगलीं वेवसायीक वाहनां रेंट अ कॅब आनी टॅक्सी हांकां स्पीड गव्हर्नर सक्तिचें केलां. खूब जाणांनी हे स्पीड गव्हर्नर बसयल्यात. स्पीड गव्हर्नर बसयल्यार वाहनांची गती ८० किमी दर वरां मेरेन मर्यादीत उरता. मात काय रेंट अ कॅब आनी टॅक्सींनी हे स्पीड गव्हर्नर निश्क्रीय करून उडयल्यात देखून नेटान गाडयो मारून अपघात जावपाच्यो घडणुको घडल्यात.
हे विशीं येरादारी संचालनालयान भौशीक कळोवणी जारी करून सगल्या रेंट-अ-कॅब आनी टॅक्सी चालकांक कळीत केलां, केंद्रीय मोटार वाहन नेम, १९८९च्या नेम ११८ खाला दरेक येरादारी वाहनांत वेळार वेळार दुरुस्त केल्ल्या मानक एआयएस ०१८/२००१ प्रमाण, कमाल पूर्व-निर्धारीत गती आशिल्ले ’स्पीड गव्हर्नर’ बसोवप सक्तीचें आसा.
सद्या येरादारी खात्याचे नदरेक अशें दिसून आयलां, ’स्पीड गव्हर्नर्स एकतर बसोवंक ना वा ते अकार्यक्षम आसात. ते प्रमाण, सगल्या रेंट-अ-कॅब तशेंच टॅक्सी चालकांक निर्देश दिता, तांणी रेंट-अ-कॅब आनी टॅक्सींत ’स्पीड गव्हर्नर’ बसयिल्लो आसचो आनी तो कार्यक्षम आसा हाची खात्री करची.
वयले निर्देश पाळपाक अपेशी थारल्यार, परवानो निलंबीत वा रद्द करपा सयत योग्य कायदेशीर कारवाय करतले, अशी शिटकावणी येरादारी संचालक अरविंद खुटकार हांणी कळोवणे वरवीं दिल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
