भांगरभूंय | प्रतिनिधी
पणजीः जुन्ता हावस पोरणी इमारत मोडून थंयसर कॅसीनो हाडपाचो यत्न चल्ला. सरकारान हे आयकॉनीक इमारतीचो वेवसायीक वापर करचोे सोडून हांगा मल्टी स्टोरी पार्कींग सुविधा उबारची, अशी मागणी पणजे म्हानगरपालिकेचे नगरसेवक जॅक सुखीजा हांणी केल्या.पणजे जुन्ता हावजा मुखार आपयिल्ले पत्रकार परिशदेंत उलयतना सुखीजा हांणी सांगलें, १९६० वर्सा तयार जाल्ली जुन्ता हावस ही आयकॉनीक इमारत आनी पणजेची दुसरी व्हड इमारत आसली. २००० वर्सा मेरेन चडश्यो सरकारी कचेर्यो आनी खातीं हे इमारतींत आशिल्लीं. तशेंच हांगासर भौशीक खगोल शास्त्रीय वेधशाळा आशिल्ली.
आतां हे इमारतीचो पुर्नविकास चल्ला. पूण खर्या अर्थान ही भौशीक मालमत्ता आसा. पूण एक हॉटेल, कॅसिनो आनी वयर स्विमींग पुला सयत इमारतीचो वेवसायीक पुनर्विकास चालू आसा. खुपश्या लोकांनी आपलो विरोध उक्तायत हे इमारतीचो वापर भौशीक गजालीं पुरतो मर्यादीत दवरपाची मागणी केल्या. ही इमारत शाराच्या मदींच येता देखून मल्टी स्टोरी पार्कींग इमारतींत ताची उदरगत करची, अशी मागणी सुखीजा हांणी केल्या.
तशेंच बाकीच्यो खुबश्यो सुचोवण्यो आयल्यात तातूंत लोकांनी मागलां की ८० टक्के इमारतीचो वापर पार्कींग सुविधा खातीर करचो तशेंच माळ्यार जार्दीन सयत इव्हेंट स्पॅस तयार करचो, तशेंच हँगींग जार्दीन तयार करून हरीत इमारत करची, तशेंच उक्तें शेतकी केंद्र उबारचें. मात आमच्या भितरले भौवसंख्य लोकांक दिसता, हाचो योग्य वापर मल्टी स्टोर पार्किंगा खातीर करचो आनी कसलेच वेवसायीक उदरगत हांगासर जावची न्ह, अशें मत सुखीजा हांणी मांडलें.
आमी ह्या इमारत प्रकल्पाचो आराखडो पळयला. ह्या आराखड्यांत कुडी सयत ८ माळ्यांचें हॉटेल येवपाचें आसा आनी एका माळ्यार कॅसीनो आसतलो. इमारतीच्या कुशीक कांय कचेर्यो दाखयल्यात. मात त्यो सरकारी खात्यां खातीर आसतल्यो,काय ना हें आमकां खबर ना, अशें सुखीजा हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
