भांगरभूंय | प्रतिनिधी
दंड माफ करचो, बील भरपाक वेळ दिवचो : गजानन तिळवे हांचें निवेदन
पणजी : हणजूण वाठारांतल्या वीज गिरायकांक ह्या म्हयन्यांत सदां परस तिपटीन चड बिलां आयल्यांत. अतिरिक्त वीज वापरिल्ले खातीर गिरायकां कडल्यान दंड वसूल केला. मात अशें करचे पयलीं हे विशीं जागृताय करप गरजेचें आशिल्लें. खात्यान दंड माफ करून उरिल्लें बील भरपा खातीर दोन म्हयन्यांचो काळ दिवचो अशी मागणी गजानन तिळवे हांणी केली. बुधवारा तांणी मुखेल अभियंते स्टिफन फर्नांडीस हांकां हे विशीं निवेदन दिलें. ह्या वेळार अमित पालेकार, वाल्मिकी नायक हांचे सयत हणजूणचे ग्रामस्थ हाजीर आशिल्ले.
हे विशीं तिळवे हांणी सांगलें, हणजूण वाठारांत ज्या घरांत आदीं एक ते देड हजार बिलां येतालीं, थंय आतां ५ हजार रुपया बिलां आयल्यांत. खात्याने अतिरिक्त भार वापरिल्ले खातीर दंडात्मक शुल्क लायिल्ल्याचें आमकां समजलां. कांय जाणांक १३२ रुपया जाल्यार कांय जाणां दोन हजार रुपयां मेरेन दंड लायला. मात अशें करचे पयलीं गिरायकांक तांचो भार कितलो आसा, अतिरिक्त वीज वापरल्यार कितलो दंड जावपाक शकता, दंडाची रक्कम कशी थारायतात. हाची म्हायती दिवप गरजेचें आशिल्लें. नाजाल्यार दंड वसूल करप चुकीचें.
खात्याचे बिलींग प्रक्रियेंत मात्तूय पारदर्शकताय ना. स्टीट लायटीचे पसून पयशे सगल्या लोकां कडल्यान घेतात. हे विशीं खात्या कडल्यान स्पश्टीकरण मेळप गरजेचें. सरकार इव्हेंटाचेर करोडांनी रुपया खर्च करता. वीज खातें लोकांक फटोवन आपली तिजोरी भरता. आमी आमचें निवेदन मुख्यमंत्री तशेंच वीज मंत्र्यांकूय दितले. आयज वीज बिल भरपाचो निमाणो दीस आशिल्लो. मात आमी ग्रामस्थांनी बिल भरचे नात हें स्पश्टपणान सांगलां. बिलां भरिल्ल्यान आमची वीज जोडणी तोडपाक आयल्यार खर आंदोलन करतले. तेन्ना कायदो आनी सुवेवस्थेचो प्रस्न निर्माण जाल्यार ती सरकाराची जापसालदारी, अशेंय तिळवें हांणी सांगलें.
नेमां प्रमाणूच दंड
स्टीफन फर्नांडीस हांणी सांगलें, अतिरिक्त भार वापरिल्ले खातीर जावपी दंडा विशीं वीज खात्यान ह्यान पयलीं जागृती केल्या. आमी दंडाची रक्कम जेईआरसी आनी वीज कायद्या प्रमाण थारायल्या. तरी ग्रामस्थांची मागणी आमी सरकारा मेरेन पावयतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
