भांगरभूंय | प्रतिनिधी
सा दो कोयर उडयतना फक्त मातशी फुकट प्रसिद्धी मेळची म्हूण ‘नैतिकतेचो ठेकेदार’ जावन ‘मोरल पॉलिसिंग’ करपी एका तरणाट्यान तो व्हिडिओ अविचारीपणान समाज माध्यमांचेर घालो आनी पालिका कामगारांनी कोयर स्विकारुंक नाशिल्ल्यान तो नाईलाजान रस्त्यार उडोवंक आयिल्ल्या सॅम्युअल डा गार्विन ब्रागांझा ह्या 22 वर्सा पिरायेच्या कॉलेज तरणाट्याक ताचें व्हड मोल चुकोवचें पडलें. इतलें व्हड की ताका आत्महत्ये सारकिल्लें गंभीर आनी कुटुंबाचेर दीर्घकाळ आघात करपी पावल उखलचें पडलें.
पुराय गोंयांत अजून ह्या प्रकरणाची चर्चा चलतना म्हाकाय हाचेर मत उक्तावचें कशें दिसलें तें ह्या गजालीक लागून की काय समाजीक तत्वां सॅम्युअलाक ताच्या कृत्याक लागून जापसालदार धरतात. हांव ताची चूक न्हयकारीना. ताणें चूक केल्लीच. भौशीक सुवातेर कोयर उडोवप ही चूक, न्हय तर आयज कायद्याचे कक्षेंत तो एक दंड करपा सारको अपराध वा गुन्यांव. हो तर्क हांव मान्य करतां. सॅम्युअलाक ते सुवातेर येवन कोयर कित्याक उडोवचो पडलो, कारण नगरपालिका कामगारांनी कोयर घेवपाक न्हयकार दिलो. तो उपाय नासून कोयर उडोवपाक आयलो तेन्ना समाजाक नैतिकतेचे धडे दिवपी कांय ‘तथाकथित’ मॉरल पुलीस आसतात (हे स्वता कितले नैतिकतायेन जगतात, देवाक खबर) तसो ह्या प्रकारांतल्या एका मनशान ताका कोयर उडयला म्हूण लक्ष्य केलो. सॅम्युअलान शक्य जाता तितली तकली शांत दवरून ताका हाताळपाचो यत्न केलो आनी वाद सोंपतगीत तो एकदाचो घरा गेलो. हें दुश्टचक्र हांगांच थांबलें ना. त्या ‘शाण्या’ मनशांन पुलिशेंत कागाळ करपाचें सोडून हो व्हिडिओ समाज माध्यमांचेर व्हायरल केलो आनी सामान्य लोकांनी कांयच समजून घेय नासतना सदाचे प्रमाण आपल्या हाताक लागिल्ली नवी ‘शिकार‘ उरबडून, बुड्डून खाली.
म्हापशें पुलिसांनी स्वेच्छेन दखल घेवन सॅम्युअलाचेर गुन्यांव दाखल केलो आनी लुकसाण भरपाय भरपाक लागून सोडून दिवचे बदला खून, बलात्कार सारकिल्लो गंभीर गुन्यांव केल्ल्या खांप्या गुन्यांवकारा भशेन ताका दनपार ते रातचे मेरेन पुलीस स्टेशनाचेर बसोवन दवरलो.
पुलिसांची प्रक्रिया नेमकी कशी आसता हाचेर सदांच प्रस्नचिन्न उपरासता आनी तें ह्याय प्रकरणांत उपरासता. ड्युटीचेर आशिल्ले दादले आनी बायल पुलीस कर्मचारी सॅम्युअला कडेन नेमके कशे वागले, हाची खर चवकशी जावची. तांणी त्या भुरग्याक भंय घालपाचो यत्न केलो काय, हें सोदुन काडपाचे कर्तव्य जितलें सॅम्युअलाच्या घरच्यांनी नेमिल्ल्या वकिलांचें आसतलें तितलेंच कॅमेऱ्या फुडल्यान न्याय, अन्यायाच्यो गजाली करपी पत्रकारांचेय बी आसतलें. सॅम्युअला कडेन अशे सामके टोकाचें पावल उखलपाक कारण थारपी पिस्तुल वा गन कशें आयलें? ताका इतलें व्हड पावल उखलपाक नैराश्य हें एकूच कारण आशिल्लें काय ताका कोणी तरी प्रवृत्त केलो? पिस्तुल घरांत दवरपाचे आनी ती भुरग्यांक आनी नेण्टे पिरायेच्या तरणाट्याक सोंपेपणी कशी मेळटात, हाचेरुय बी विचार जावचो.
एका विनोदी रिल्स करपी कलाकारान ह्या प्रकरणाचेर भाश्य करतना म्हत्वाच्या मुद्द्याचेर बोट दवरलें. तुमका निरशेवणी आयल्या जाल्यार घरांतल्या जाणट्या मनशा कडेन उलयात, तें मनांत भितरुच दाबून दवरून मनाचो कोंडमारो करूं नाकात. आत्महत्ये सारकिल्लें टोकाचें पावल उखलूं नाकात भुरग्यांनो.
सोशल मिडीयाचेर घालचे परस त्या मनशान तो व्हिडिओ पुलिसांक दाखोवन रीतसर कागाळ कित्याक दिली ना? पुलिसांनी कागाळ घेवन सॅम्युअला कडल्यान कोयर उडोवपाच्या दंडाची रक्कम घेवन आनी समज दिवन सोडूं येतालो. कोणाक समजून घेय नासतना रोखडोच ताका आरोपीच्या पांजऱ्यांत उबो करप सामकें चुकीचें. हे अशे चुकीक लागून आयज एके आवयन आपलो तरणाटो भुरगो तर भयणींनी आपलो भाव वगडायलो. एक उमेदी तरणाटो आपलो जीव घालोवन बसलो. ‘कोयर उडोवन गेल्ल्या एका बेजबाबदार तरणाट्याची वकिली करता मरे तू?’ अशी टीका कोणें म्हजेर केल्यार म्हाका चलता.
सॅम्युअलार कसलो ताण वा चेंपण आयलें? ताचेर कोयर उक्त्यार उडोवपाचो वेळ कित्याक आयलो? व्हिडिओ पुलिसांक दाखोवपाचें सोडून सोशल मीडियाचेर घालून सॅम्युअलाक बदनाम करून ताची खाजगी जीण भौशीक करपाचो आनी भौशिक स्तराचेर ताका अपमानित (humiliate) करपाचो अधिकार त्या समाजसेवा करपी मनशाक कोणे दिलो? ह्या प्रस्नाचो जापो खूब म्हत्वाच्यो आसात. एक समाज म्हूण हांव आयज तुमका विचारतां, तुमी ह्या प्रस्नांच्यो जापो दिवंक शकतात? स्वताक विचारात. देट्स ऑल, मिलोर्ड.
सनतकुमार फडते
7020438469
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
