भांगरभूंय | प्रतिनिधी
अस्तंत बंगालांतल्या भारतीय जनता पार्टीच्या दणदणीत जैताक लागून राष्ट्रीय राजकारणाक बशिल्ल्या हादऱ्यांचे धक्के अजूनय जाणवतात. सलग 15 वर्सां अस्तंत बंगालची सत्ता निरंकुश पद्धतीन भोगिल्ल्या तृणमूल काँग्रेसींत व्हडली फूट पडल्या. अस्तंत बंगाल विधानसभा वेंचणुकेचे निकाल 4 मे दिसा लागिल्ले आनी फक्त म्हयन्या भरांत तृणमूल काँग्रेसींत घडिल्ल्यो घडामोडी पळयल्यार, हो पक्ष कितलो भुसभुशीत बुन्यादीचेर उबो आशिल्लो, हें दिसून येता. तृणमूल काँग्रेसीचे 80 आमदार हे वेंचणुकेंत वेंचून आयल्यात. तातूंतल्या 60 आमदारांनी एकठांय येवन ‘आमचोच पक्ष हो खरो तृणमूल’ असो दावो करीत ममता बॅनर्जीन वेंचिल्ल्या गट फुडाऱ्याची नेमणूक अमान्य केली. हाचो सरळ अर्थ असो की, वेंचून आयिल्ल्या आमदारांनी आता ममताबाईंचें फुडारपण न्हयकारलां.
ममताबाईंच्या नेतृत्वा खाला आनी तांच्या भाच्याच्या, अभिषेक बॅनर्जीच्या सांवळे खाला काम केल्यार आपणाक फुडार ना, हें लक्षांत आयिल्ल्यानूच ह्या आमदारांनी पक्षाच्या फुडारपणा आड बंडाचो बावटो हुबयलो. ह्या घडामोडींक लागून ममता बॅनर्जींच्या राजकी अस्तित्वाचोच प्रस्न उबो रावला. फाटोफाट 15 वर्सां सत्ता भोगिल्ल्या पक्षाचे दोन तृतीयांश संख्ये परस चड आमदार एका झटक्यांत पक्षाच्या सर्वोच्च नेतृत्वाचो निर्णय न्हयकारतात, तेन्ना त्या पक्षाचो संघटनात्मक आदार कितलो पोकळ आशिल्लो, हें दिसून येता.
भारतीय जनता पार्टीच्या जैता उपरांत अस्तंत बंगालांत तृणमूलाच्या राजवटी आड आशिल्लो असंतोश प्रचंड प्रमाणांत खदखदपाक लागला. अभिषेक बॅनर्जींक जाल्लो मारपेट राष्ट्रीय पांवड्या वयल्या खबरांचो विशय थारली. पूण ताचे भायर थंय घडिल्ल्यो जायत्यो घडामोडी तृणमूलाच्या दडपशाही राजवटी आड सामान्य मनशाच्या मनांत कितली तिडक खदखदता, ताचें प्रतीक आसात. तृणमूलाच्या पदाधिकाऱ्यांनी लोकां कडल्यान वसूल केल्ली खंडणी आनी हप्त्याची रक्कम आतां लोक तांच्या घरांत घुसून परत घेवपाक लागल्यात. अस्तंत बंगालंत सरकाराच्या नांवार गुंडांचें, जिहाद्यांचेच राज्य चलतालें, हें दाखोवपी ह्यो घडामोडी. हे विशीं उद्रेक ल्हवू ल्हवू राज्यभर पातळपाक लागला. ह्या उद्रेकाचो फटको आपणाक बसचो न्हय, म्हणून तृणमूलच्या जायत्या आमदारांनी स्वताक ममता आनी अभिषेका पसून पयस दवरपाचे यत्न सुरू केल्यात. विधानसभा वेंचणुकेंत इतलो व्हड फटका बसूनय ममताबाई आपलो भाचो अभिषेक हाचे कडेनूच पक्षाचीं सुत्रां परत दितात, हें जायत्या आमदारांक आवडूंक ना. तृणमूल हो ममताबाईंच्या कुटुंबाचो खाजगी मालकेचो पक्ष जाल्ल्यान, आपल्या भाच्या भायर खंयच्याच फुडाऱ्याच्या हातांत पक्षाचीं सुत्रां दिवपाक त्यो तयार नात, हें दिशिल्ल्यान ह्या आमदारांक बंडाचो झेंडो हुबोवपा बगर दुसरो पर्याय उरिल्लो ना.
हे फाटभूंयेर भारतीय जनता पार्टीचो आयज वेरचो प्रवास याद जाता. 1979 त जनता पक्षांतल्या जनसंघाच्या फुडाऱ्यांनी राष्ट्रीय स्वयंसेवक संघा कडेन संबंद दवरचो न्हय, अशी मागणी जनता पक्षांतल्या समाजवादी विचारांच्या मंडळींनी केली. ही मागणी अमान्य करत अटलबिहारी वाजपेयी, लालकृष्ण अडवाणी ह्या मंडळींनी जनता पक्षांतल्यान भायर पडपाचो निर्णय घेतलो. ‘राष्ट्रीय स्वयंसेवक संघ ही आमची मातृसंस्था आसून सांस्कृतीक राष्ट्रवादाच्या विचारधारेचेर आमी ठाम आसात’, अशी भुमिका घेत अटलजी आनी अडवाणींनी भारतीय जनता पार्टीची स्थापना करपाचो निर्णय जाहीर केलो.
1980 ते 2025 ह्या 45 वर्सांच्या इतिहासांत भारतीय जनता पार्टीन जायते खाचखळगे अणभवले, टिंगलटवाळी सोंसली. पूण सामके प्रतिकूल परिस्थितींत पक्ष वाडयतना पक्षाचे विचारधारे कडेन केन्नाच तडजोड केली ना. भारतीय जनता पार्टीची स्थापना जातना भारतीय लोकदल, आदीं आशिल्ल्या समाजवादी विचारधारेच्या मंडळींचो जनता पक्ष, दोनूय कम्युनिस्ट पक्ष हे मुखेल विरोधी पक्ष म्हणून राष्ट्रीय राजकारणांत काँग्रेसीक आव्हान दिताले. हातूंतल्या जनता पार्टी आनी लोकदलान जनता दलाच्या रूपांत 1980 च्या उत्तरार्धांत आनी 1990 च्या पूर्वार्धांत राष्ट्रीय राजकारणांत लक्षणीय स्थान मेळयिल्लें. जनता दलान कांय काळ आघाडीच्या रूपांत केंद्रांतली सत्ताय भोगली. पूण हे सगले पक्ष आतां राष्ट्रीय राजकारणांत नगण्य थारल्यात. समाजवादी विचारधारेचे समाजवादी पार्टी आनी राष्ट्रीय जनता दल हे दोन पक्ष उत्तर प्रदेश आनी बिहारांत आपलें अस्तित्व राखून आसात. पूण हे दोनूय पक्ष एकेका कुटुंबा पुरते मर्यादित जाल्यात. कम्युनिस्ट पक्षाचें केरळा भायर अस्तित्वय दिसना.
भारतीय जनता पार्टी मात ह्या 46 वर्सांत सातत्यान वाडत वचपी पक्ष थारला. हाचें कारण भाजपाच्या नेतृत्वान प्रखर राष्ट्रवादाची विचारसरणी सत्ते खातीर केन्नाच सोडली ना. ताचे आदीं जनसंघान 1951 सावन राष्ट्रीय राजकारणांत पावल दवरले उपरांत सामके प्रतिकूल परिस्थितीक तोंड दित पक्ष संघटनेची बांदणी केली. सत्ता मेळपाची मात पसून शक्यताय दिसनासतनाय जनसंघान आपली निश्ठावान वावुरप्यांची फौज देशाच्या खाची- कोनशांनी निर्माण केली. 1984 त अटलबिहारी वाजपेयीं सकट पक्षाचे जायते म्हारगडे फुडारी हारले, तरी पक्षाचो एकूय वावुरपी सत्तेच्या आसऱ्याक वचूंक ना. 2021 त अस्तंत बंगालांत भाजपाचे 77 आमदार वेंचून आयिल्ले. हातूंतल्या कांय आमदारां भायर हेर सगळ्या आमदारांनी पक्षांत रावून तृणमूलआड लडो दिलो.
2021 सावन 300 पयस चड भाजपा कार्यकर्त्यांची हत्या जाली, तरी ममतांचे दहशती आड भाजपाचो आवाज बुलंदूच रावलो. देखूनच अंदुंचे वेंचणुकेंत मतदारांनी भाजपाक तृणमूलाचो सशक्त पर्याय म्हणून वेंचून काडलो. प्रखर राष्ट्रवादाची विचारसरणी हीच भाजपाची भक्कम वैचारिक बुन्याद आसा. ती हेर खंयच्याच पक्षां कडेन नाशिल्ल्यान राष्ट्रीय राजकारणांत अशे पक्ष कशेबशे तिगून आसात. भाजपाचे हे यशोगाथे पसून बोध घेवप तर पयसूच, पूण विरोधी पक्ष फक्त भाजपाक दुशणां दिवपांतूच धन्यताय मानता, हाचे सारकें दुसरें दुर्दैव ना.
(लेखक महाराष्ट्र भाजपाचे उपाध्यक्ष आसात.)
केशव उपाध्ये
[email protected]
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
