भांगरभूंय | प्रतिनिधी
ह्या म्हयन्यांत ही अधिसुचोवणी येवंक जाय, ना जाल्यार हें आरक्षण लांबणेर पडटलें, इतलें मात खरें. हे खातीर कितें करपाची गरज आसा?
भुंयपूत कोण आनी ते कित्याक फाटीं उरले हो इतिहास सगळ्यांक खबर आसा. मात आतां, इतलीं वर्सां पडून आशिल्लें राजकी आरक्षण कित्याक मेळना वा हे विशीं संसदेंत कायदो जावनूय ताची अंमलबजावणी कित्याक जायना हाचेर इल्लीशी चर्चा जाय. 2003 वर्सा हेर मागास वर्गांतल्यो तीन जमाती – गावडा, कुणबी आनी वेळीप हांकां एसटी दर्जो फावो जालो. खरें म्हणल्यार तेन्नाच राजकी आरक्षण मेळूंक जाय आशिल्लें. पूण दोळे पुसूंक फकत पंचायत पावंड्यार तें लागू केलें आनी विधानसभे खातीर राखून दवरलें. हें अशें कित्याक घडलें तें आतां सवका सवका उगतें जावंक लागलां. भारतीय जनता पक्षान फाटल्या वर्सा खासगी रितीन लक्ष घालून एसटी लोकाक विधान सभेंत राजकी आरक्षण मेळपी विधेयक पास केल्ल्यान खूब आरोप- प्रत्यारोप आतां मेरेन आयकूंक येतात. हो कायदो जरी जालो जाल्यार पासून एक अधिसुचोवणी येवंची आसा जी वेंचणूक आयोगाक विधान सभेची राखीवता जाग्यार घालूंक मार्ग मेकळो करून दितली. बीजेपीचें मन प्रामाणीक दिसता, पूण कांय दीस आदीं कोणें तरी एक विडियो वायरल केलो, बीजेपी दक्षीण गोंयांत आपलें स्थान घट करूंक जाय म्हण हें आरक्षण लागू करूंक धांवपळ करता म्हण. खरें हें?
गोयांत काँग्रेस पक्षान बरींच वर्सां राज चलयलें. दक्षीण गोंयच्या साश्ट म्हालांत आजून लेगीत काँग्रेसीचें दालें जड आसा, थंय बीजेपीक प्रवेश बरोच मुश्कील आसा. तरी फाटले वेंचणुकेंत नावेलीं बीजेपीच्या खात्यांत आयलें. आयज एसटी समाजाचे भोव करून क्रिस्तांव लोक कोणा बराबर आसात? काँगेसी बराबर. जाल्यार काँग्रेसीक कित्याक नाका एसटी लोकाक आरक्षण मेळिल्लें? इतलीं वर्सां कोणें हें आडावन दवरलें? आयज स्वार्थान आसूं वा एसटी लोकाच्या मोगान आसूं, जर बीजेपी फुडाकार घेता तें आरक्षण दिवंक जाल्यार तांकां शाबासकी दिवंक जाय. ह्या कार्या खातीर मुखेल मंत्री डॉ. प्रमोद सावंत खासा लक्ष घालतात आनी तांचे बराबर गोंय विधानसभेचे सभापती गणेश गांवकार, केंद्रीय मंत्री श्रीपाद नायक, बीजेपी प्रदेशाध्यक्ष दामू नायक, मंत्री रमेश तवडकार आनी आमदार गोविंद गावडे हांचें एक शिश्टमंडळ हालींच केंद्र गृहमंत्री अमित शाह हांकां मेळ्ळें आनी तांणी जाता तितले बेगीन आवश्यक ते सोपस्कार रोखडेच पुराय करतलो म्हणपाचें उतर दिलां, ही अतिउत्तम गजाल. तांकां यश मेळचें अशीच अपेक्षा.
चडांत चड, ह्या म्हयन्यांत ही अधिसुचोवणी येवंक जाय, ना जाल्यार हें आरक्षण लांबणेर पडटलें, इतलें मात खरें. हे खातीर कितें करपाची गरज आसा? तोळो तापिल्लो आसा. न्हय फकत बीजेपीच्या फुडाऱ्यांनी आवाज केला म्हण, बगर विरोधी एसटी फुडाऱ्यांनी लेगीत आवाज वाडयला. कांय दीस आदीं एके वटेन विरोधकांनी पणजेंत धरणें धरिल्लें जाल्यार तांकां शांत करूंक केप्यां एसटी संमेलन घडोवन सगळ्यांक एके माचयेर बसोवपाचो यत्न जालो. ही बरी गजाल घडली, पूण ताचो फायदो जायना जाल्यार निश्कर्श कितें काडपाचो?
एसटी आरक्षणाची कार्यवाही ताकतिकेन करीनासतना आरक्षण समाजाचे लोकसंख्ये प्रमाणें जावंचें अशी मागणी गोमंतक मराठा समाजान केले उपरांत बरोच बोवाळ सुरू जालो. अशें जातकच आडखळी निर्माण जातात. एक गजाल आसा, कांय सत्ताधारी आमदारांकूय झळ लागतलो. नुवें मतदारसंघ आरक्षीत जालो जाल्यार आलेक्स सिक्वेराक घरा बसचें पडटलें. कुडटरे मतदारसंघ आरक्षीत जालो जाल्यार रेजिनाल्द लॉरेस कुडटरे वेंचणूक लडोवंक शकचो ना, केपें मतदारसंघ आरक्षीत जाल्यार आमदार ऍल्टन डिकॉस्ताक फाटीं रावचो पडटलो. हाका लागून बीजेपी धरून बऱ्याच राजकी फुडाऱ्यां मदें धुसफूस चालू जाल्या आनी जण एकलो आपलें ट्रंप कार्ड वापरपाचो यत्न करतलो. पूण जाचो शेक वेंचणूक आयगाचेर चलतलो ताचेंच ट्रंप कार्ड फळतलें. कित्याक आरक्षण मुख्यमंत्री थारायना, तें काम वेंचणूक आयोगाचें. काणकोण, कुडटरे, नुवें, प्रियोळ, केपें, सांगें ह्या मतदारसंघांनी चड एसटी लोक आसात, तांतूंतले खंयचेय चार राखीव जातले.
ह्या सगळ्या वाठारांत सत्ताधारी तशेच विरोधी पक्षांचे बरेच एसटी फुडारी लोकसेवेंत दिसतात आनी तांची छाप आसा. ते भायर सध्याक आमदार म्हूण एसटी फुडारी आसात. तरी नुवें मतदारसंघांत एकूय प्रभावी फुडारी दिसना. कुडटरेंत एँथोनी बार्बोजा आसा, प्रियोळांत आमदार गोविंद गावडे, काणकोणांत मंत्री रमेश तवडकार, सावड्ड्यां सभापती गणेश गांवकार, केप्यांत प्रकाश वेळीप, कृश्णा वेळीप, प्रभाकर गांवकार आदी फुडारी म्हण बीजेपीचे खांबे आसात जाल्यार विरोधकां मदें कुडटरेंत जोजफ वाज, केप्यांत वकील जॉन फेर्नांडीस आसात. गोंयच्या हेर भागांनी जायते एसटी फुडारी आसात, पूण तांचे मतदारसंघ राखीव जावपाची संभावना ना.
बीजेपी इतल्यो खटपटी करता आसतना आरक्षण मेळ्ळें ना जाल्यार कितें जातलें? भौसा मुखार एक चुकीचो संदेश वतलो की, बीजेपी सगळीं नाटकां करतालो. आतांची स्थिती पळयली जाल्यार बीजेपीक आरक्षण दिवपाचो पुळको आयिल्लो आसा हें होलमता. पूण तें शक्य जायना, जाल्यार कित्याक जायना? हें आरक्षण हे वेंचणुकेक जालें ना जाल्यार बीजेपीकूच चड लुकसाण जातलें. कुठ्ठाळेचो एसटी पूण अपक्ष आमदार आंतोन वाज आपलीं हुकुमी पानां भायर काडूंक शकता. फातोड्डेंचो आमदार विजय सरदेसाय एसटी लोकां मदीं वावुरता, ताचो हेरां कडेन संपर्क आसा, ताचेरूय नदर आसतली.
कशेय परीं 2027 चे वेंचणुकेंत एसटी आरक्षण जावंक जाय आनी उणेच चार एसटी आमदार गोंयचे फुडले विधानसभेंत वचूंक जाय. बीजेपी सरकारान एसटी लोकाक खूब कितें दिलां आनी रमेश तवडकार मंत्री जायत सावन खुबूच उदरगतींचीं पावलां पडूंक लागल्यांत. सगळ्या मळांचेर एसटी लोकांचो विकास जावंचो म्हूण ताणें हालींच विजन डॉक्युमॅन्ट फॉर ट्रायबल डेव्हेलॉपमेन्ट जांतूंत रोड मॅप फॉर ट्रायबल विजन 2037 तयार करूंक पावल घालां तें तोखणाय पात्र आसा. ह्या विजना वरवीं एसटी लोकां खातीर कितें तरी बरें जातलें अशी अपेक्षा बाळगुंयेता. देखून येता ते विधानसभेंत आरक्षण लागू जालें जाल्यार हें विजन मुखार वचपा पसून कोण आडावंक शकचो ना. हे विशीं दुसऱ्या जनजातींनी दुखवपाची वा खंतवपाची गरज ना. कित्याक एसटी लोकाच्या जल्मसिद्ध हक्काक न्याय मेळूंक वता. आनी तो बीजेपीच दितली हाची खात्री आसा. आतां ह्या मुखावेल्या दिसांत नकारात्मक नदर हाडीनासतना, केंद्र सरकारान आरक्षणाची अधिसुचोवणी बेगिनांत बेगीन काडूंक तांचीं मनां उजवाडाय म्हण देवाक प्रार्थन करुंया.
—
– विन्सी क्वाद्रूस, राय, साश्ट
मो. – 9822587498
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
