भांगरभूंय | प्रतिनिधी
पणजीः गोंय सरकारच्या पर्यटन खात्यान मळा, पणजी हांगा एक खाशेलो आनी भोव-उपेगी एकात्मीक फुड अँड बॅव्हरेज (एफ अँड बी) अणभव सुविधा उबारपाचो हावेस उक्तायला. हो प्रकल्प सरकारी मालमत्तेचो योग्य वापर आनी खाजगी क्षेत्रांतल्या कामाची कुशळटाय हांचो मेळ सादपा खातीर ’भौशीक-खाजगी भागीदारी’ (पीपीपी) मॉडेल आनी ’लीव्ह अँड लायसन्स’ तत्वा खाला पुराय जातलो.
पर्यटन खात्यान ह्या प्रकल्पा खातीर निविदा जारी करून ही म्हायती दिल्या. १५ वर्साच्या काळा खातीर ही सरकारी सुवात प्रकल्प बांदपा खातीर आनी तो चलोवपा खातीर दितले. गरज पडल्यार हो लिजाच्या काळांत १५ वर्सांची अतिरिक्त वाड करतले.
ही येवजण राजधानी शारांतल्या शारी पर्यटन क्षेत्राक उर्बा दिवपा खातीर आनी लोकां खातीर बरे तरेन सांबाळिल्ली सुवात सुरू करपाच्या उद्देशान तयार केल्या. थळावे आनी विंगड-विंगड खाणा-पिवपाचे पर्याय, आनी त्याच वांगडा आधुनीक सुविधांक लागून हो एफ अँड बी हब आंतरराष्ट्रीय पर्यटक आनी थळावे ह्या दोगांकय एक बरो अणभव दितलें.
ह्या एफ एन्ड बी हबांत खाणा-पिवपाचीं केंद्रां आसतलीं जातूंत गोंयचे आनी आंतरराष्ट्रीय खाणां-पिवपाचे अणभव दाखोवपी विंगड-विंगड खाणांची पेयांची सेवा आसतली. तशेंच उच्च दर्जाच्यो भौशीक सुविधा, आनी पर्यटन-पुरक पांयाभूत सुविधांचो आस्पाव आसतलो. तशेंच लवचीक आनी एकठांय बसून काम करपा सारकी को-वर्कींग बसका वेवस्थेचो आस्पाव आसा.
ह्या प्रकल्प मॉडेल प्रमाण, गोंयचें पर्यटन खातें जमनीची मालकी आपले कडेन दवरतले, जाल्यार वेंचून काडिल्लोे खाजगी भागीदार हांचें पुराय डिझायन, अर्थसहाय्य, दिसपट्टें संचलन आनी सुविधेचो सांबाळ पळयतलो.
ह्या प्रकल्पाचो उद्देश दर्जेदार खाण-पिवपाची सेवा, सुदारीत सुविधा आनी एक बरे तरेन संचलन केल्ली भौशीक सुवात तयार करून पर्यटनाचो अणभव सुदारप आसा. हो प्रकल्प भोंवडेकारांक एकठांय येवपाक, जोडपाक आनी एका सुटसुटीत तशेंच उत्पादक वातावरणांत हे सुवातेचो वापर करपाक संद दितले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
