भांगरभूंय | प्रतिनिधी
कॉंग्रेसीनूच दामू नायक हांकां अशें वक्तव्य करपाक लायलां आसतलें
मडगांव : दामू नायक हांणी केल्ल्या विधानाक लागून भाजपाक फायदो जावचो ना, मात विरोध पक्षांतल्या सगल्यांत व्हडलो पक्ष कॉंग्रेसीक फायदो जातलो. गोवा फॉरवर्ड ही भाजपाची ’बी टीम’ आसा, अशें म्हणपाक राजकीय कारण मेळचे खातीर कॉंग्रेसीनूच दामू नायक हांकां अशें वक्तव्य करपाक लायलां आसतलें अशी शक्यताय आसा, असो आरोप गोवा फॉरवर्डचे अध्यक्ष तशेंच आमदार विजय सरदेसाय हांणी केलो.
आपल्या भाजप प्रवेशाच्या चर्चांचेर स्पश्टीकरण दितना आमदार सरदेसाय हांणी म्हणलें, येवपी विधानसभा वेंचणुके खातीर गोवा फॉरवर्डची कॉंग्रेस वांगडा युती आसतलीच, हाची आजूनय कसलीच हमी ना, अशें विधान आपणें केल्लें. हाचो अर्थ हांव भाजपांत प्रवेश करतां वा तांचे कडेन युती करतां असो अजिबात जायना. आपूण राज्यांत भाजपाचो सामको कट्टर विरोधक. कला अकादमींतलो भ्रश्टाचार हांवेंच उक्तडार हाडलो आनी ताचे आड न्यायालयांत दाद मागली.
दामू नायक हांच्या वक्तव्यान म्हाका धक्को बसूंक ना, अशें सांगून सरदेसाय हांणी फुडें म्हणलें, वेंचणुको लागीं पावल्यो काय फातोर्डा मतदारसंघांत कांय विरोधक एकठांय येतात आनी आमचे आड काम करतात. मात जनतेन तांकां सदांच न्हयकारलां. फकत लोकांक भुलोवन वेंचून येवपाक मेळटलें असो दामू नायक हांचो समज आसल्यार आमचीय लढपाची पुराय तयारी आसा. भाजपा वांगडाची आमची युती केन्ना तुटल्या. फाटले वेंचणुकेंत आमी कॉंग्रेसी वांगडा आशिल्ले आनी आतांय आसात. मात फुडाराक कितें जातलें हें सांगू नज, कारण कांय फुडार्यांच्यो पड्ड्या फाटल्यान हालचाली चालूच आसात.
शेतकरांच्यो जमनी परत करपाच्या मुद्याचेर उलयतना सरदेसाय हांणी, दामू नायक हांकां सरळ आव्हान दिलें. हांव विरोधी पक्षाचो आमदार आशिल्ल्यान शेतकारांक जमीन परत मेळोवन दिवपाची तांक म्हज्यांत ना. मात संवसारांतल्या सगल्यांत व्हडल्या पक्षाचे प्रदेशाध्यक्ष आशिल्ली ती तांक दामू नायक हांचे कडेन नक्की आसा. मुख्यमंत्र्यांनी खंयच्याच निविदे बगर दामू नायक हांकां एक पेट्रोल पंप मंजूर केला. हें प्रकरण दक्षीण गोंय नियोजन आनी उदरगत प्राधिकरणाचे बसकेंत आयिल्लें. हाका लागून नायक हांणी सरळ मुख्यमंत्र्यांक पत्र बरोवन शेतकारांच्यो जमनी परत करपाची मागणी करची. जर तांचे कडलयन हें जायना जाल्यार तांणी सत्ताधारी पक्ष सोडचो आनी आमचे वांगडा येवचें. आमी सरळ रस्तो रोको करून शेतकारांक तांचे हक्क मेळोवन दितले, अशें म्हणून सरदेसाय हांणी दामू नायक हांकां गरज नाशिल्लीं वक्तव्यां करून जनतेक भुलोवची न्हय असो सल्लो दिलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
