भांगरभूंय | प्रतिनिधी
पणजी : बिबटे, गवे रेडे तशेंच हेर जनावरां लोकवस्तींत येवपाक लागल्यांत. रानवटी जनावरांच्या हालचालिंचेर कॅमेर्या वरवीं नदर दवरून अभ्यास जातलो. मनीस आनी रानजीव हांचे मदल्या संघर्शाचो अभ्यास जातलो. हाचे खातीर जनावरांचे हालचालिंचेर नदर दवरतले, अशें राना खात्याचे मंत्री विश्वजित राणे हांणी सांगलें.
रानां खात्याचे मंत्री विश्वजित राणे हांणी खात्याच्या अधिकार्यांसयत बसका घेवन कामांचो नियाळ घेतलो. हालींच्या दिसांनी गव्या रेड्यांनी मनशांचेर हल्लो करपाच्यो घडणुको वाडल्यात. बिबट्यांक लेगीत मरण आयलां. हाचे खातीर थारावीक वाठारांत कॅमेरे बसोवन रानजिवांच्या हालचालिंचो अभ्यास जातलो. हो अभ्यास जाले उपरांत रानां जिवांखातीर खासा कॉरीडोर तयार करपाचो प्रस्ताव आसा.
फाटल्या वर्सा रानां खात्यान पावसांत ६ लाख झाडां लायिल्लीं. हातुंतलीं ७० टक्के झाडां जिवीं आसात. अंदूं ‘एक पेड मॉं के नाम’ उपक्रमाखाला ५ लाख झाडां लावपाची मोख आसा.
पावसांत तशेंच हेर दिसांनी पर्यटक तशेंच हेर लोक रानां वाठारांत ट्रॅकींग तशेंच भोवडेचें आयोजन करतात. ह्यान फुडें पासयो तशेंच ट्रेकिंगा खातीर रानां संरक्षकाची परवानगी घेवची पडटली. रानां वाठारांत आल्लीं तळीं तशेंच उदक स्रोतांचो सोद घेवन तांची जतनाय करपा विशीं बसकेंत चर्चा जाली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
