भांगरभूंय | प्रतिनिधी
पणजी: गोंयच्या राष्ट्रीय म्हामार्गांचेर बुधवारा सकाळीं अपघातांची माळ पळोवपाक मेळ्ळी. बांबोळे वेगान वचपी कंटेनर ट्रकान रस्त्याच्या डिव्हायडराक धपको दिलो जाल्यार दुसरे वटेन अनमोड घांटार तांतयां व्हरपी टेम्पो उमथलो. ह्या दोनूय वेगवेगळ्या अपघातांत दोन वाहन चालक जखमी जाले. तशेंच गाडयांचें व्हड लुकसाण जालां.
पयली घडणूक सोमारा सकाळीं सुमार पांच वरांचे बांबोळेच्या हांगाच्या राष्ट्रीय म्हामार्गाचेर घडली. मुंबय वटेन वेगान वचपी कंटेनर ट्रकाच्या चालकाचें गाडयेवेलें नियंत्रण सुटलें आनी ट्रकान रस्त्यार आशिल्ल्या डिव्हायडराक धपको दिलो. हो धपको इतलो नेटान आशिल्लो, हातूंत ट्रकाच्या फुडल्या भागाचो चुरो जालो. ह्या अपघातांत ट्रक चालक गंभीर जखमी जालो. ताका बेगोबेग गोमेकॉंत दाखल केलो. ह्या अपघाताक लागून महामार्गावेली एके वटेनची येरादारी कांय काळा खातीर विस्कळीत जाल्ली. हाका लागून रस्त्याचेर वाहनांच्यो व्हडल्यो रांको लागून बरीच व्हड येरादारी कोयंडी निर्माण जाल्ली.
ह्या अपघाताक लागून पणजे वटेन वचपी वाहनांचो येरादारीचेर कांय प्रमाणांत परिणाम जालो आनी येरादारींत आडखळ निर्माण जाल्या. पणजे वटेन वचपी वाहन चालकांनी गोंय विद्यापीठ रस्तो वा सांताक्रूझ रस्तो एक तर वापरचो. सगल्या वाहन चालकांनी सादूर रावचें, येरादारी पुलिसांच्या सुचोवण्यां प्रमाण चलचें आनी आपलीं वाहनां सुरक्षीतपणान चलोवचीं असो उलो येरादारी पुलिसांनी केलां.
मोलें-अनमोड घाट रस्त्यार अपघात
मजगतीं, दुसरी घडणूक मोलें-अनमोड घांट रस्त्यार घडली. शेजारच्या राज्यांतल्यान गोंयांत तांतयां घेवन येवपी एक माल व्हरपी टेम्पो घाटांल्यान वतना एका धोको निर्माण करपी वोल्ताचेर चालकाचें वाहनावेलें नियंत्रण सुटलें. हाका लागून ह्या व्यस्त रस्त्यार टेम्पो उमथलो. ह्या अपघातांत टेम्पो चें लुकसाण जालें आनी चालकाक दुखापत जाली. अपघाता उपरांत घांटावेल्यान प्रवास करपी हेर वाहनचालकांनी आनी थळाव्या नागरिकांनी रोखडीच घडणुके सुवातेर धांव घेवन मजत करपाक सुरवात केली. पुलिसांनी ह्या दोनूय घडणुकांची नोंद घेतली. फुडलो तपास पुलीस करतात.
#Goa #Bambolim #Molem #Anmod #AccidentNews #AccidentReport #NewsInKonkani #KonkaniNews
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
