भांगरभूंय | प्रतिनिधी
जशें व्हडल्यां मदीं ब्रेन ट्यूमर सांपडटा, तशेंच हे दुयेंस भुरग्यां मदींय सांपडटा. भुरग्यां मदीं सगल्यांत चड प्रमाणांत सांपडपी ब्रेन ट्युमरा विशीं उलयतना तज्ञ सांगतात, पालकांनी खंयच्याय असामान्य लक्षणांकडेन आडनदर करिनासतना वेळार वैजकी मजत घेवप गरजेचें. पेडियाट्रिक न्यूरोलॉजिस्ट, डॉ. शिजी चालीपट हांणी हे विशीं म्हत्वाची म्हायती दिली.
‘हे’ पिरायेच्या गटांतल्या भुरग्यांक ब्रेन ट्युमर जावपाक शकता?
भलायकी तज्ञांच्या मतान खंयच्याय पिरायेच्या गटांतल्या भुरग्यांक ब्रेन ट्युमर जावंक शकता. देखून पालकांनी ह्या रोगाच्या लक्षणां कडेन खासा लक्ष दिवपाची गरज आसा. ब्रेन ट्युमराचो आकार, ताच्या आकाराचेर आनी मेंदवांतल्या सुवातीचेर आदारून आसता. कांय म्हत्वाचीं लक्षणां म्हळ्यार सकाळीं तकली दुखप, कसलेंच कारण नासतना सेगीत उलटी जावप, समतोल ना जावप, चलपाक त्रास जावप, नदर ब्लर जावप, फिट येवप (कांपप), वागणुकेंत बदल जावप, अभ्यासांतली उदरगत उणी जावप वा सदचेपरस चड न्हीद येवप. ल्हान भुरग्यांची तकलेची वाड वा शारिरीक उदरगतीक कळाव जावप होय हुस्को करपा सारको विशय आशिल्ल्यान हे खातीर रोखडोच दोतोराचो सल्लो घेवचो पडटा.
भुरग्यां मदीं ब्रेन ट्युमराचे खुबशे प्रकार असतात
भलायकी तज्ञांच्या मतान भुरग्यांच्या ब्रेन ट्युमराचे जायते प्रकार आसतात. तातूंत पायलोसायटीक ऍस्ट्रोसायटोमा हो सगळ्यांत चड प्रमाणांत दिसपी प्रकार मानतात. हो गांठ ल्हव ल्हव वाडयता आनी ती चड करून कॅन्सराची नासता. मुखेलपणान मेंदवाच्या सेरेबॅलम वाठारांत ताची वाड जाता, जो कुडीचें समतोल आनी समन्वय सांबाळटा. तशेंच मेडुलोब्लास्टोमा हो नेटान वाडपी ट्युमर, एपेंडायमोमा जो मेंदू वा फाटीच्या कण्यांतल्या द्रवान भरिल्ल्या पोकळ्यां मदीं विकसीत जाता, तशेंच डिफ्यूज लो-ग्रेड ग्लायोमा हो तुळेन ल्हवल्हव वाडपी ट्युमरूय भुरग्यां मदीं दिसता. निदान करपाखातीर भुरग्याची सविस्तर तंत्रिका तंत्राची तपासणी करतात. तशेंच ट्युमराची सुवात आनी आकार समजून घेवपा खातीर एमआरआय स्कॅनाचो उपेग करतात. केन्ना केन्नाय ट्युमराचो नेमको प्रकार थारावपा खातीर बायोप्सी करची पडटा.
उपचार कशे करतात?
ब्रेन ट्युमराचें निदान जाले उपरांत तज्ञ दोतोर उपचाराची दिका थारायता. गांठीचो प्रकार, ताची सुवात आनी भुरग्याचे एकंदर भलायके प्रमाण उपचाराची येवजण थारायतात. शस्त्रक्रियेच्या आदारान ट्युमर सुरक्षीतपणान काडपाचो यत्न करतात. हालचाल, उलोवप, नदर, शिकपाची तांक अशा म्हत्वाच्या मेंदवाच्या कार्यांची राखण करपाचेर खासा भर दितात.
दुबाव आसल्यार रोखडोच तज्ञ दोतोराचो सल्लो घेवचो…
आयच्या आधुनीक वैजकी तंत्रज्ञानाक लागून ब्रेन ट्युमर चड सुरक्षीत आनी अचूक उपचार करप शक्य जालां. न्यूरोनॅव्हिगेशन, इंट्राऑपरेटिव्ह मॉनिटरिंग आनी हाय-प्रिसिजन इमेजिंग अशा प्रगत तंत्रगिन्यानाचो उपेग करून शस्त्रक्रिया चड प्रभावीपणान करतात. भुरग्यांच्या वयल्या खंयच्याय लक्षणां कडेन पालकांनी आडनदर करची न्हय. हें दुयेंस आशिल्ल्याचें बेगीन कळ्ळ्यार आनी योग्य उपचार केल्यार भुरग्यांच्या जिणेच्या दर्ज्यांत व्हड फरक पडूं येता. देखून कसलोय दुबाव आसल्यार बेगोबेग तज्ञ दोतोराचो सल्लो घेवप गरजेचें.
#HealthNews #BrainTumor #KidsHealth #NewsInKonkani #KonkaniNews
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
