भांगरभूंय | प्रतिनिधी
घुंवळे वखदां आड केल्ले कारवायेची आंकडेवारी; 68 गुन्यांव नोंद, 80 जाणांक अटक
भांगरभूंय । प्रतिनिधी
पणजीः फाटल्या सप्तकांत हरियाणांतली भाजपा फुडारी तशेंच अभिनेत्री सोनाली फोगट हिच्या खून प्रकरणांतल्या दुबावितांनी घुंवळे वखदां घातिल्लें पेय पियेवपाक दिल्ल्याची कबुली दिल्या. हे फाटभुंयेर गोंयांतली फाटल्या सात म्हयन्यांची घुंवळे वखदां तस्करीची कारवायेची आंकडेवारी पळयली जाल्यार गोंय पुलीस आनी केंद्रीय घुंवळ वखदां तस्करी आनी सेवन प्रकरणांत 1 जानेवारी ते 31 जुलय 2022 ह्या सात म्हयन्यांच्या काळांत 68 गुन्यांव दाखल केले आनी 80 जाणांक अटक केली. तशेंच 3.21 कोटी रुपया मोलाचीं 141.399 किलो घुंवळे वखदां जप्त केलीं.
गोंय पुलिशेचो घुंवळे वखदां विरोधी विभाग, उत्तर आनी दक्षीण गोय पुलीस, गुन्यांव फाटो आनी कोंकण रेल्वे पुलिसांनी मेळून 2022 तल्या पयल्या सात म्हयन्यांत 62 गुन्यांल दाखल करून 67 जाणांक अटक केली. तातूंत सगळ्यांत चड 56.71 टक्के म्हणल्यार 38 जाण बिगरगोंयकार, 23.88 टक्के म्हणल्यार 16 गोंयकार जाल्यार 19.40 टक्के म्हणल्यार 13 विदेशी नागरिकांचो आस्पाव आसा. तातूंत सगळ्यांत चड स नायजेरियन, दोन रशियन, जाल्यार युगांडा, बेलारूस, नेपाळ, नेदरलँड आनी जपानाच्या दरेकी एका नागरिकाचो आस्पाव आसा.
गोंयांत 2 कोटी 51 लाख 62 हजार 721 मोलाचीं 98.059 किलो घुंवळे वखदां जप्त केल्यात. तातूंत 98 टक्के म्हणल्यार 94.313 किलो गांडो आनी 240 ग्राम कॅनाबीस बियांचो आस्पाव आसा. रसायनीक घुंवळे वखदां फक्त 2 टक्के जप्त केल्यात. तातूंत 1.553 किलो चरस, 1.209 किलो हशीश तेल, 257.09 ग्राम एमडीएमए, 125.67 ग्राम कोकेन, 64.91 ग्राम एलएसडी, 49.76 ग्राम एक्टेसी टॅबलेट आनी 246.56 ग्राम हेरॉईन मेळून 98.059 किलो घुंवळे वखदां जप्त केल्यांत.
गोंयांत केल्ले कारवायेंत सगळ्यांत चड 10 गुन्यांव गोंय पुलिशेच्या घुंवळे वखदां विरोधी पंगडान दाखल केल्यात. ताच्या फाटाफाट गुन्यांव फाटो, हणजूणें, कळंगूट आनी पेडणें पुलिसांनी दरेकी 7 गुन्यांव दाखल केल्यात. ते उपरांत 5 गुन्यांव पर्वरी पुलिसांनी, म्हापशें पुलिसांनी 4 गुन्यांव, वास्को आनी फोंडें पुलिसांनी दरेकी 3 गुन्यांव, कोलवाळ आनी पणजी पुलिसांनी दरेकी दोन गुन्यांव जाल्यार आगशी, मुरगांव, वेर्णे, मडगांव आनी मायणा- कुडटरी पुलिसांनी दरेकी एक गुन्यांव दाखल केला. तेच प्रमाण केंद्रीय नार्कोटीक कंट्रोल ब्युरोच्या (एसीबी) गोंय विभागान 2022 च्या सात म्हयन्यांत 6 गुन्यांव दाखल करून 13 जाणांक अटक केल्या. तातूंतले सगळे बिगर गोंयकार आसात. तातूंतले दोन गुन्यांव एनसीबी कडेन गोंय पुलिसांनी वर्ग केल्ले. तातूंत अदीक चवकशी करून एनसीबीन हेर दुबावितांक अटक केल्या. तांचे कडल्यान एनसीबीन सुमार 70 लाख रुपया मोलाचीं 43.34 किलो घुंवळे वखदां जप्त केल्यांत. तातूंत 99.12 टक्के म्हणल्यार 42.95 किलो गांजाचो आस्पाव आसा. जाल्यार रसायनीक घुंवळे वखदां फक्त 0.82 टक्के जप्त केल्यांत. तातूंत 19.10 ग्राम एमडीएमए, 4.18 ग्राम एलएसडी आनी 15.7 ग्राम एक्टसी टॅबलेट्स घुंवळे वखदांचो आस्पाव आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
