चैतन्यमय पयलो पावस

भांगरभूंय | प्रतिनिधी

हो पयलो पावस धर्तरेचेर जिणेंची नवी आस्त जागयता आनी सगळे कडेन सुखाचें वातावरण निर्माण करता.

धर्तरेर जीवसृश्टीची राखण करपी सैमचक्रांतल्या ऋतुंक खाशेलें म्हत्व आसा. बदलत्या ऋतू मदलो एक ऋतू म्हणल्यार पावसाळो. तातूंत पयलो पावस सैमाक अद्भुत तरेन फुलयता, फळयता. पयलो पावस शेंदता तेन्ना मनांत चैतन्याची भावना निर्माण करता. ती उतरांनी वर्णन करुन सांगप कुस्तार. कारण दरेकल्याची भावना वेगळी आसता. म्हज्या मतान हो पयलो पावस फकत हवामानांतल्या बदलाचो संकेत दिना, तर मनशाच्या जिवितांत नवी उर्जा आनी आस हाची भरसण करता.
माया म्हयन्यांत कडक, खर वतान तापिल्ले मातयेर पयल्या पावसाची दडक रकता तेन्ना वातावरण परमळान भरून वता. जमनीचेर पडपी थेंबे जशे- जशे जमनींत रिगतात तशे- तशे मातेयेचे कुडीक आनी सैमातल्या जिवांक ताजेंपण येता. ह्या पावसाक लागून रानां, न्हंयो, तळीं, झरी, झाडां, फुलां सगलीं नवी जीण घेतात. पावसाचेर निंबून आशिल्लो चिड्डो, तायकिळो, तेरो, रानभाजयो, हेर वनस्पत किल्लता. पयलो पावस धर्तरेचेर पाचवो रंग पातळटा.
पयलो पावस मनशाच्या मनांतूय नवी आशा जागयता. गिमाची खर उश्णताय आनी रेंवट परिस्थिती खिणां भितर बदलता. घरांनी, शेतांत, रस्त्यार, न्हंयेच्या उदकान सगळे कडेन उमेद शिंवरता. शेतकार नव्या पिकांची आस्त बाळगुन पावसाळी शेताचे पेरणेची तयारी करतात. भुरगीं कागदी होडयो करून पावसाच्या उदकांत सोडटना फाटी वयलें पुस्तकांनी भरिल्लें दप्तर पावसाच्या उदकांत भिजलें तरी तांकां कसलोच फरक पडना. पावसाच्या थेंब्यांनी भिजपाक भुरग्यांक खूब आवडटा. हो पावस सैमाक नवी जीण दिता, तेच प्रमाण मनशाच्या मनांत नवी उर्जा निर्माण करता.
पयल्या पावसांत वातावरणांत एके तरेची शांती आसता आनी तो नवो संदेश घेवन येता. मळब काळ्या कुपांनी भरिल्लें आसता. ह्या खिणाक हवामानांत अचकीत बदल घडटा. उश्ण हवामान मात्शें थंड जाता, काळ्या कुपांचो मेळ एकठांय जाता. मळबांतलो गडगड आनी वारें वाडटा. हो सगलो बदल मनशाचें मन उत्तेजीत आनी जिज्ञासू करता. ह्या खिणाक सैमाचे अद्भुत अणभव घेवंक मेळटात. हो पयलो पावस धर्तरेचेर जिणेंची नवी आस्त जागयता आनी सगळे कडेन सुखाचें वातावरण निर्माण करता.
आदल्या काळा सावन शेतकार पयल्या पावसाक शुभ मानून ताका होरायतात. पयलो पावस शेतवडीक बरी पिकावळ दिता. केन्ना हिसपा भायर पावस रकल्यार शेताचें लुकसाणूय जाता. पावसाचें उदक जमनी भितर जिरून ओलसाण हाडटा आनी पिकांक बरें पोशण मेळटा. देखून हो वेळ शेतवडी खातीर भांगराची संद. शेतकार समाजाक समृद्धी मेळची म्हूण पावस देवाची पुजा करून आशीर्वाद घेता, कारण मनीस जातीचें जिवीत पावसाचेर निंबून आसा. ह्या काळांत सगळे कडेन आनंद, उमेद आनी समाधान दिसता. पावस जिणेंतली नवी आस आनी प्रेरणा घेवन येता. ह्या पयल्या पावसाक पुराय रुखामळ येवकारता. थोड्या खिणां खातीर ह्या पयल्या पावसा विशीं थोडो भंय आसलो तरी ताचे परस चड खोस आनी उमेद आसता. पावसाक लागून वातावरण नितळ जाता, हवामान थंड, सोबीत, जायशें दिसपी जाता.
अशे तरेन पयलो पावस हो फकत हवामानांत बदल जावपाचो संदेश न्हय, तर जिणेंत एक नवो अध्याय सुरू करपाचोय संदेश घेवन येता. पावस हें सैमांतलें एक मोलादीक भांडार. जाका लागून मनशाक जिणेंच्या खऱ्या मुल्यांची जाणविकाय जाता. ह्या पावसाक लागून धर्तरेक नवी जीण मेळटा, मनशाच्या काळजांत आशेच्यो नव्यो कोमऱ्यो पालेता आनी जिणेंत मोगाचो, एकचाराचो संदेश दिता.
ह्या सगल्या कारणांक लागून पयल्या पावसाक मनशाच्या जिवितांत खाशेली सुवात आसा. ताचेबगर जिवीत पुराय जांवक शकना. कारण तें सैमाचें दान, जें जिवित जगपाची उर्बा वाडयता.

सुदिन वि. कुर्डीकार.
8275425404