भांगरभूंय | प्रतिनिधी
शिक्षणीक मळार एक प्रभावी व्यक्तिमत्व म्हणून तांची प्रतिमा आसली, तरी सरकाराचेर आनी समाजीक मुद्द्यांचेर खर टिका वा स्पश्ट उलयिल्ले खातीर ते चर्चेंत उरतात.
बिहारांतले शिक्षक आनी युट्युबर खान सर हांच्या संबंदांतलें प्रकरण सध्या चर्चेंत आसा. सोशल मिडियाचेर तें गाजता. तें पाटणांतल्या कोचिंग संस्थां मदली खर सर्त आनी तातूंतल्यान निर्माण जाल्ल्या हिंसाचाराक जोडिल्लें आसा. 2 जूनाक पाटण्यांत खान सर हांच्या कोचिंग संस्थे भायर फाटपेट, तोडफोडीची घडणूक घडली. उपरांत विद्यार्थ्यांनी व्हडलें आंदोलन केलें.
मुसल्लापूर हाट परिसरांतले हे कोचिंग संस्थेचेर 20 ते 25 जाणांच्या टोळक्यान गुंडे मारले. तोडफोडूय केली. एका सुरक्षा रक्षकाक लोखंडाच्या वारांवान बडोवन गंभीर जखमी केलो. ह्या गोंदळा वेळार खान सरांच्या दोन खाजगी सुरक्षा रक्षकांनी हवेंत फारपेट केलो. तो व्हिडिओ व्हायरल जालो. उपरांत, पुलिसांनी खान सराचेर खुनाचो यत्न आनी आर्म्स ॲक्ट खाला गुन्यांव दाखल केल्लो. पूण, उपरांत कोर्टान तांचे अटकेक स्थगिती दिली. सध्या प्रकरण न्यायालयांत आसा.
वादाचें कारण
खान सराच्या मतान, तांचे संस्थेंत उणी फी घेवन शिक्षण दितात आनी हजारांनी विद्यार्थी स्पर्धा परिक्षांनी यशस्वी जातात. देखूनच वेवसायिक दुस्मानकायेंतल्यान प्रतिस्पर्धी कोचिंग संस्थांच्या (ज्ञानबिंदु कोचिंग क्लासेस) लोकांनी हो हल्लो घडोवन हाडिल्ल्याचो गंभीर आरोप तांणी केलो. पुलिसांनी ते संस्थेच्या तिगांक अटक केल्ली.
व्हिडिओक लागून सुरक्षा रक्षकांक ताब्यांत घेतिल्ले. तांणी ‘खान सरांच्या सांगण्यानूच आमी फारपेट केलो’, अशें सांगलां. ह्या जबाबाच्या आदारार पुलिसांनी कदमकुआं पुलीस ठाण्यांत खान सरा गंभीर कलमां खाला एफआयआर केल्या.
न्यायालयाचो निर्णय
खान सराच्या वकिलांनी ह्या एफआयआरक ‘राजकी आनी वेवसायिक सुडबुद्धीन तांकां आडकावपाचें कारस्थान’ अशें म्हणलां. अटकेची तरसाद हुमकळटनाच पाटणा न्यायालयान खान सराचे अटकेक स्थगिती दिल्या. पुलीस तपास चालू आसून, दोनूय कोचिंग संस्थां मदलो (खान सर आनी ज्ञान बिंदु) वाद शिक्षण मळार सध्या चर्चेचो विशय थारला.
कोण हे खान सर?
‘पटनावाले खान सर’ म्हणून ते प्रसिद्ध आसात. सादारण 35 वर्सांचे. तांचे मूळ नांव फैसल खान. हालींच तांचें लग्न जालां. जल्म उत्तर प्रदेशांतल्या देवरिया जिल्ह्यांतल्या भाटपार राणी गांवांतलो. बापूय बांदकाम काॅण्ट्रेक्टर, आवय गृहिणी. ‘Khan GS Research Centre’ हे कोचिंग संस्थेच्या माध्यमांतल्यान यूपीएससी, एसएससी, रेल्वे, बँकिंग आनी हेर स्पर्धा परिक्षांक बसपी विद्यार्थ्यांक ते मार्गदर्शन करतात. उणी फी आनी गरिबांक फुकट शिक्षण, ही तांची खाशेली वळख. शिकोवपाच्या सोप्या आनी विनोदी शैलीक लागून ते देशभर लोकप्रीय जाल्यात. युट्यूबाच्या माध्यमांतल्यान ते ऑनलायन शिक्षणूय दितात.
सध्या ते ऑफलायन कोचिंग, ऑनलायन ट्युटोरियल्स, मोबायल अॅप आनी एका हॉस्पिटल प्रकल्पा कडेनूय संबंदीत आसात. खान सराच्या वेगवेगळ्या युट्यूब चॅनेल्सांचे मेळून 3 कोटीं परस चड सबस्क्रायबर आसात, खान जीएस कोचिंग सेंटराचे अडेज कोटी जाल्यार इन्स्टाग्रामचेरय तांचे 10 लाख फॉलोअर्स आसात. शिक्षणीक मळार एक प्रभावी व्यक्तिमत्व म्हणून तांची प्रतिमा आसली, तरी सरकाराचेर आनी समाजीक मुद्द्यांचेर खर टिका वा स्पश्ट उलयिल्ले खातीर ते चर्चेंत उरतात.
सवाय हाॅस्पिटल
तांणी पाटणा शारांत उण्या दरांत भलायकी सेवा सुरू केल्या. दुयेंतींच्यो चांचण्यो सवाय भितर जातात. दोतोराचो सल्लो ₹ 50, रक्त तपासणी ₹ 7, ईसीजी ₹ 25, एक्स रे ₹ 35, अल्ट्रा सावंड ₹ 100, डायलेसीस ₹ 350, सीटी स्कॅन ₹ 900, एमआरआय ₹ 1000 आनी पुराय बाॅडी चेकअप ₹ 1000. ही म्हायती तांच्या इन्स्टाग्रामाचेर आसा. वैजकी मळा वयले जायते जाण तांचेर सामके बेजार आसात.
खान सर आयज फक्त शिक्षक उरिल्ले नात, तर स्पर्धा परिक्षांच्या विद्यार्थ्यां खातीर एक प्रभावी शैक्षणिक व्यक्तिमत्व जाल्यात. ह्या प्रकरणा वयल्यान विद्यार्थ्यांनी ज्यो प्रतिक्रिया दिल्यात, ताचे वयल्यान हें कळटा. ते तांकां देवूच मानतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
