भांगरभूंय | प्रतिनिधी
योग्य प्रक्रीया करून एसटी आरक्षणाची कार्यवाय करची
पणजी : अनुसूचीत जमातींक (एसटी) आरक्षण दिवपी विधेयक संसदेंत संमत जावन ताचें कायद्यांत रूपांतरण जालां. आदिवासी समाजाक तांचो हक्क मेळपाकूच जाय. हाका लागून योग्य प्रक्रीया पुराय करून एसटी आरक्षणाची कार्यवाय जावपाक जाय, अशें केपेंचे आमदार एल्टन डिकोस्ता हांणी म्हणलां.
कायदो संमत जाले उपरांत ताची कार्यवाय करपा खातीर एक प्रक्रीया आसता. एसटी आरक्षणाची कार्यवाय लेगीत हे प्रक्रीयेमार्फत पुराय जावपाक जाय, अशें तांणी सांगलें. घटना आनी कायद्याप्रमाण एसटी काय मतदारसंघ आरक्षीत दवरचे पडटलें. हातूंत केपें मतदारसंघ आरक्षीत जालो तरी म्हजी कांयच हरकत ना, अशें आमदार एल्टन डिकोस्ता हांणी स्पश्ट केलां.
हांव १९९९ सावन सामाजीक वावर करीत आसां. हांव पयली पंच, सरपंच आशिल्लों. आतां आमदार जालां. सामाजीक वावर करपा खातीर आमदार जावपाकूच जाय अशें ना, अशें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
