भांगरभूंय | प्रतिनिधी
मडगांव : रावणफोंड, मडगंावच्या रेल्वे उड्डाणपुलाचो एक भाग खचिल्लो. आतां तो पुरायेन सुरक्षीत आनी स्थिर केला. हाका लागून ह्या मार्गावेल्या जड वाहनांचे येरादारीचेर आशिल्ले निर्बंध रोखडेच फाटीं घेतले.
दक्षीण गोंयचे जिल्लोधिकारी आनी जिल्लो दंडाधिकारी श्रीनेत कोठावळे हांणी हे विशींचे आदेश जारी केले.
रावणफोंड उड्डाणपुलावेल्यान धांवपी जड वाहनां आनी बशीवेली बंदी आतां काडटले. आतां हीं सगलीं वाहनां आदले वरींच रावणफोंड ते पॉवर हाऊस जंक्शन ह्या मार्गार उड्डाणपुलावेल्यान प्रवास करतलीं.
फाटल्या वर्सा २१ मे २०२५ दिसा घोग्यांनी पडिल्ल्या पावसाक लागून ह्या पुलाच्या जोड रस्त्याचो भर खचिल्लो. हाका लागून सुरक्षिततायेचो उपाय म्हणून पुलावेली एके वटेनची जड येरादारी बंद करून ती हेर मार्गान वळयिल्ली. भशीक बांदकाम विभागाच्या कार्यकारी अभियंत्यांनी ८ जुनाक दिल्ल्या अहवालांत हो पूल आनी रस्तो तांत्रिक नदरेन सुरक्षीत आनी घटमूट आशिल्ल्याचें सोंगलें. उपरांत जिल्लोधिकार्यांनी मोटार वाहन कायद्या खाला मेळिल्ल्या अधिकारांचो वापर करून हो निर्णय घेतलो.
येरादारी पुलीस आनी संबंदीत प्रशासनाक ह्या मार्गावेले तात्पुरते बॅरिकेड्स, डायव्हर्शनचे तखटे काडून येरादारी सुरळीत करपाचे निर्देश दिल्यात. ह्या निर्णयाक लागून मडगांव वाठारांतल्या वाहनचालकांक आनी जड वाहनांक थाकाय मेळटली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
